Read Komrem ESTHER 2 Bible Online

ESTHER 2 - Komrem bible

ESTHER 2

¹Rengpa hnuknat kha adaisō jo kahnunga’m Vashti’n aleitlo omchen leh amanu chunga aṭong phôngna hei kha rengpa’n amandonṭhak heia kae.

²Khava jâra, a’nhnaipui mansena kanei ṭhahrep he’n mantlukna anneia antipek, “Heisik a mo hme kaṭha nuhngâk intheng najong mak.”

³Rengram shunga ramṭhen rakip a ṭōnkarôn nakadei thei hei, anmani kha nuhngâk hme kaṭha seng reng khōpui Susa a nang nuhmeihei innden a nahei manṭhōi thei hei. Anmani kha nang nuhmeihei katintapa, reng ṭōnkarôn, taksa insyem Hegai ensuina thōia da hei roh, anhme ṭhatna sik a razenna nei hei rasoh.

⁴Khava sōa namadupen nuhngâk inkhat kha inlo roh, ama kha Vashti kahlanga rengnu manchang roh.” Rengpa khan hivahi akaṭha ṭongpek kae tia amandona ajui jo.

⁵Susa khōpuia Jair sapa arahming Mordecai inti Jehudi inkhat leika-om; ama hi Kish leh Shimei sōn leh pâr khana Benjamin phunga mi kae.

⁶Babylon reng Nebuchadnezzar in Jerusalema inphut Judah Reng Jehoiachin leh rehringa antasur ṭhahrep akeiṭhōi hei pha, Mordecai kha ankâra inveisa.

⁷Ama sik a asernu kasōk Esther inti Hebrew rahminga chu Hadassa inti inkhat leika-om; ama hi hme kaṭha leh enkahōi nuhngâk inkhat kae. Anu leh apa anthi jo kahnunga Mordecai in asanu kapōhrep a ahongvei manlen kae.

⁸Rengpa ṭong phôngna ather kha amasō pha, nuhngâk katamtak Susa a anheiṭhōi hei, ankâra Esther kha’m inkhat kae. Reng nuhmeihei innden katintapa Hegai ensuina thōia ama kha’m anleida jo.

⁹Hegai in Esther chunga amalung katlai, alumlona kha aleichen. Amanu hme ṭhatna sik tak kanôtna leh sâk leh in ahlopdet pekna kha apha heite manhmang mak a kae. Ama kha nuhmei innden shunga hmun kaṭhapen kha aleipek, khana amanu inzen sik reng innshunga inphut nuhngâk 7 alei kadeisōt pek hei.

¹⁰Tûnchu, Mordecai ṭongpek dungjuia, Esther in Jehudi achangna kha alei-ip a kae.

¹¹Ani tina Mordecai khan amanu kha heimo akachang jo khana heimo akachang sik ti hi manhretna sik a nuhmei innden hma a khan kalôn lele ṭhak a kae.

¹²Nuhmeihei hmeṭhatna razenna kha kum khat kahlut — myrrh thai vânga thla 6 khana balsam thai vânga thla 6 hi antak ankanôt pek hei. Khava sō leh Reng Xerxes hneng nuhngâk-hei kha inkha-khat a antaṭhōi sik hei kae.

¹³Amanu khan nuhmei innden a inphut reng-innpuia ase pha, ama’n amadutak inretna aneithei sik.

¹⁴Nuhngâk inkhat kha khōhleia rengpa hneng vakase sik, khana ajînga jîngkâra reng nuhmei manbohei katinta taksa insyem Shaashgaz, reng ṭōnpui karônpa thōia hmunhlop a anda sik. Reng in pui katluk a amadu joa arahming vâng ahei bek tei loa chu ahnenga avea semak jo ning.

¹⁵Esther hi Abihail sanu, Mordecai sernu akasōk, asanu kapōa avei manlen kha kae; Esther hi akahmu rakip in antei hêra kae. Ama pha kha ahong sōk jo pha, nuhmei innden katintapa taksa insyem Hegai mantheina dungjuia pōn leh der kha ale’nvon jo.

¹⁶Khang’khan Xerxes in reng achangna kum 7 tlukna, thla 10 tlukna, Tebeth thla a khan Esther kha reng-innpuia Reng Xerxes hnenga anheiṭhōi jo.

¹⁷Rengpa khan nuhngâk alak-hei kanek a ama kha aleimadu jo, alak-hei kanek a ama lungsetna leh lum lona kha achen jo. Ama’n alu chunga reng lukhu amankhua Vashti kathlenga rengnu aleimanchang jo.

¹⁸Khava sōa Esther kajana rengpa khan sâklôm kalentak aleitlo khana avaikarônhei leh aṭōn karônhei seng aleibek hei. Ama’n rengram pumpuia inhngana kani inkhat a aphôngsōt a rahōi kasōk reng kutchoi kha aleisempek hei.

¹⁹Khava lai khan rengpa’n Mordecai kha vairônna ṭōnhmun inkhat a aleikadei.

²⁰Esther chu Jehudi kae ti hi lamanthei mak heia kae. Mordecai in tûte hnenga hrimak roh aleitipek, nuhmei naipang achanglai ama ensuina thōia aṭong leijui kapōa khavakha aleijuia kae.

²¹Mordecai in reng-innpuia ṭōnhmun alo pha, taksa insyem Bigthana leh Teresh, reng-innpuia ṭōnkarônhei, reng innden hlutna kekot kahngâk pase 2 hei kha, Reng Xerxes inrepui hongkachang heia ama thatna sik a ṭōn anleimantluk jo.

²²Hivahi Mordecai in ahong manhret a Rengnu Esther hneng aleihri pek, amanu hin rengpa hneng Mordecai tahmu sōt seng kha ahri pek nôk a kae.

²³Jongsuina inkhat anleinei, khana ṭong thangkōina kha kadik ti hi anhmusōt jo, khava jâra pase 2 hei kha thina ber chunga anmakhei hlon jo hei. Rengpa khan khava omchen kha rengram shunga vairônna lekharabu shunga mazetna sik a ṭong apek jo hei.