Read Komrem ESTHER 4 Bible Online

ESTHER 4 - Komrem bible

ESTHER 4

¹Ṭōn a’ntlo senghei kha Mordecai in amanhret jo pha, athang tômna apōn akeihler jo. Khava sōa borapōn asia alu kha ravut akanoa, khōpui kalen shunga kalôna, inhnaktak a leh inrengtak a,

²reng-innpui kekot aheitlung mak kârseng kaṭap jo. Borapōn kasi tûte inkhat ashunga anmanhlut mak hei jâra ama kha ashunga leihlut mak a kae.

³Ramṭhen rakip a, reng ṭong masōna akathei jo hmun rakip a, Jehudihei kha ka-ông heia kaṭap jo hei. Anmani bu anhngōia, kaṭap hei, ṭajai ansuia ka-om hei khana akatam lang in borapōn ansia ravut kâra kaje jo hei.

⁴Mordecai in atlo kha Esther sōknu leh ṭōnkarônhei khan Esther hneng anhri pek pha, amalung hōihêr mak jo. Amanu’n Mordecai hnenga borapōn kahlânga asi akei sik a pōn ajing aleimanrôn, tâk ama’n leirahlâng pek mak a kae.

⁵Khava sōa ama’n taksa insyem Hathach inti reng-innpuia ṭōnkarôn, amanu sōk sik a reng takadei inkhat kha abek a Mordecai hneng avakase sik a leh heimo akasōk khana heikhonga mo tia avakajong sōt sik a aleitir.

⁶Hathach kha khōpui lâmtea reng-innpui kekot a aka-om Mordecai hneng leikase.

⁷Mordecai in ahnenga akasōk rakip kha aleimanthei khana Jehudihei seng hi anthat he’nchu Haman in rengpa sêrkōk a sêr heija mo ada manhlut sik tia anle’ntepna kha aleihri pek jo.

⁸Jehudihei suk manhmangna sik a Susa khōpuia inphut antamasō lekha inkhat kha Hathach hnenga aleipek. Mordecai in khavakha Esther hneng achoina sik, khana ahnenga omchen kasōk kha avahri manchên pekna sik, khana amanu’n reng hnenga avahri leh amihei chunga lungsetna aneina sik a avaderna sik a ahri pek jo.

⁹Hathakh in khanga aleitlo jo,

¹⁰Esther in Mordecai hnenga hiva ṭong hi avamanhri nôk,

¹¹“Tu achang inum, pase leh nuhmei, rengpa inphut ahei inbek achangmak inchu, shung intonga lâmtea ahlut a rengpa ava’nhmupui inchu, khava mi kha akathi nger sik kae. Khavakha dân kae; rengpa mansena kaneiheia inphut ram shunga aka-om mi rakip in khavakha anmanhret. Hiva dân a inphut inphesōtna sik inkhat lim chu ka-om: rengpa khan asana khōnghre kha ahei malâr jo’nchu khava mipa hringkhō kha ṭhensōt sik kae. Tâk-kha rengpa’n kei abekna eng kha thla khat rōk lakachang.”

¹²Esther ṭong manrôn kha Mordecai in arahlâng pha,

¹³ama’n amanu hneng hiva gîkna hi aleitir: “Nang in reng-innpuia na-om jâra khan Jehudi alak-hei kanek a inhukna nachen chet sik tia mandon mak roh.

¹⁴Hiva kapō pha hin nang in sip nati’nchu, marvâna inphut inthōpuina Jehudihei hneng kajōng sik khana anmani kha ahuk sik hei, tâk-kha nang chu kathi sik che khana napa innshung kha kamōi reng sik jo. Achang ravâng tu’n mo amanhret, hiva kapō pha hongsōk sik jâra hin nang hi rengnu aleimanchang che’m kachang theia kae.”

¹⁵Esther in Mordecai hneng hiva ṭong masônna hi aleitir,

¹⁶“Se roh, Susa shunga aka-om Jehudi seng mantûp hei roh; bu hngōi hei sona kei sik a aderpek hei rasoh. Sûn 3 leh jân 3 sâk leh in tlomak ruh. Kasōk nuhmeihei leh kei um khava kapōa kantlo sik. Khava sō leh dân in ahnōm mak ravâng, kei rengpa hneng kase sik eng. Hiva tlo jâra thi sik achang inum, kei kathi sik jo eng!”

¹⁷Khava sōa Mordecai kha kasea Esther in tlo sik a amanthei rakip kha avatlo jo.