Read Komrem ESTHER 5 Bible Online

ESTHER 5 - Komrem bible

ESTHER 5

¹Abuhngōina ni 3 tluk ning Esther kha rengnu invonna inret a, ama kasea khana reng in-ongna innden ahnget a, reng-innpui ashung intong lâmtea leikangir. Rengpa kha ashunga ka-om, kekot heihlutnating ahnget a areng in-ongna in-ong.

²Vânga Esther kangir kha rengpa khan ahmu pha, amanu’n rengpa lungsetna kha achen joa, rengpa’n asana sungbong kha aleikeisōt a aratō jo. Khan chu Esther kahonga khava sungbong hmor kha aleisit jo.

³Rengpa khan ader, “Rengnu Esther, hivahi heijo mo kae? Heimo namadu kahnenga hri roh, karengram aṭim inkhat achang inum nachen sik kae.”

⁴Esther in amasôn, “Reng Kalûr in nahnōm pek eng inchu tuning jân nang leh Haman sik a busâkna inkhat kamantlukna hin kei hmelâk nankachang sik a kamadu chei.”

⁵Khava sōa anmani kha Esther hmelâk anvachangna sik a, Haman kha inrangtak a ahongna sik, rengpa’n ṭong aleipek jo. Khava jâra rengpa leh Haman kha Esther sâklôma leikase hei.

⁶Ju in pum a rengpa khan ahnenga ader, “Nang in heimo namadu kahnenga hri roh, nahmu sik. Karengram aṭim inkhat achang inum nader eng inchu, kapek sik che.”

⁷Esther in amasôn,

⁸“Reng Kalûr in kaderna che hi pek sik a lum nalo eng inchu, ajînga sâklôm ahlop kamantlukna hin nang leh Haman nankahong sik a kamadu chei. Khava pha khan ke’n kamadu kha kahri pek sik jo che.”

⁹Sâklôm kha andahlon pha khan, Haman kha aning kaṭha jo khana kahlimseng jo. Tâk-kha khava sōa reng-innpui hlutna kekot a Mordecai kha ahmu jo khana ama’n ahma apetana asena khan Mordecai in angir mak pha khana kajana heite amalâr mak pha, Haman kha achunga ahnuk kana hêr jo.

¹⁰Tâk-kha abinga inkhâma a-innting leikase jo. Khava sō leh aman aṭim arehei kha a-inna aleibek hei khana anuhmei Zeresh kha ankâra alei manveisa.

¹¹Anhnenga ama abinga heituk a akanei mi mo, sapase heituk katam anei mo, heikhonga mo rengpa’n ṭōn kalenpen kha apek, khana rengpa vaikarônhei kâra ama kha heituk a apui karôn det mi mo akae, tia inlensaktak a ahri jo.

¹²Haman in ahrisa, “Hiva kakhea heimo, Rengnu Esther in tûte bu kasâk sik a bekmak, tâk rengpa leh kei rōk abek ung khana jîng a’m abek nôk ung.

¹³Tâk-kha Jehudi Mordecai in reng-innpui kekot kunga a’n-ong kahmu lai seng chu hivahei seng hi kei hnenga aṭhatchômna heite om mak.”

¹⁴Khava jâra anuhmei leh aṭhōn he’n mantlukna anleinei, “Heisik a mo metre 22 inshâng mi makhei hlonna rake nasyem mak? Ajîng jîngkâra Mordecai makhei hlonna sik a rengpa hneng nader thei, khava sō leh sâklôma kahōia kasethei sik jo che,” anti. Haman in hivahi akaṭha mandonna kae atia, mi makhei hlonna rake kha alei mansyem jo hei.