Read Komrem ESTHER 6 Bible Online

ESTHER 6 - Komrem bible

ESTHER 6

¹Khava ning jân khan rengpa kha leije tor mak jo, khava jâra arengrama vairônna lekhahei kha ahei manchoi heia ahnenga aleimantei hei.

²Anmani heiteina kâra aṭim inkhat a khan rengpa thatna sik a ṭōn mantlukna kha heikhong mo Mordecai in aleihmusōt ti hi inveisa jo, reng inn kahngâk ṭōnkarôn 2 hei taksa insyem Bigthana leh Teresh hei ṭōn mantlukna kha.

³Rengpa khan ader hei, “Hiva sik a Mordecai kha kajana leh tloman heikhong mo nileipek jo?” Asōk-hei khan anleimasôn, “Ama sik a heite la’ntlo mak,” anti.

⁴Rengpa khan ader hei, “Reng-innpuia kaṭōn karôn mi tu inkhat aka-om hei mo?” Khava laitak Haman kha lâmtea khan heikahlut; ama kha rengpa hnenga mi makheina antasyemsō jo ber a khan Mordecai kha makhei hlonna sik akader sik a kahonga kae.

⁵Khava jâra asōk he’n anmasôn, “Nang inhmupui sik a Haman in ahngâk che,” anti. “Ama kha heimanhlut ruh,” rengpa’n ati.

⁶Khana Haman hongkahlut jo khana rengpa’n ahnenga ahri, “Ke’n kajana kapek hnōmhêr mi inkhat ka-om! Hiva mipa sik a hin ke’n heimo katlo pek sik?” Haman in abinga amandon, “Tûn rengpa’n kajana apek hnōmhêr hi tu mo aleikachang sik? Kei kachang sik eng.”

⁷Khava jâra rengpa kha amasôn, “Khava mipa sik a rengpōn, nangkhet in na-insi hei kha heimanchoi hei roh. Khana reng inretna kha nang shakor khet chunga manret hei rasoh.

⁹Khava sōa navai karônhei kâra akalenpen inkhat in khava mipa kha manret sona, shakor chunga manchōng sona khōpui kalen tetlânga ṭhōi rasoh. Khanga anselai mikalenpa khan ông sona hri rasoh: ‘Rengpa’n kajana apek hnōm mi inkhat kha heikhong mo tloman apek ti hi enruh!’ ti rasoh”.

¹⁰Khava sōa rengpa khan Haman hneng ati, “Inrang roh, pōn leh shakor kha heichoi jo hei roh, khana hiva kajana hei hi Mordecai Jehudipa hneng pek roh. Nang in nahri kapōa khan ama sik a heirakip tlopek roh. Reng-innpui hlutna kekot a ama in-onga ka-om navahmu sik.”

¹¹Khang’khan Haman in pōnhei leh shakor kha ahei choi jo hei, khana ama’n pōnhei kha Mordecai amansi jo hei. Mordecai in shakor achōng jo khana Haman in khōpui kalen tetlânga aleiṭhōi joa ansena senga khan leika-ônga, “Rengpa’n kajana apek hnōm mi inkhat kha heikhong mo tloman apek ti hi enruh!” atia kae.

¹²Khava sōa Mordecai kha reng-innpui hlutna kekot a khan inle jo khana Haman khachu malung kachâmtak a ahmai amakhua inrangtak a innting kase jo.

¹³Ahnenga ṭōn kasōk rakip kha anuhmei leh aṭhōnhei seng hnenga ahri pek jo hei. Khan chu aṭhōn kasinghei leh anuhmei in ahnenga anleihri pek, “Nang ratha neina kha Mordecai kut a inhmang naphut jo. Ama chu Jehudi kae, nang in ama tor mak tin che. Ama’n sôilo jen a ator nger sik che kae,” anti.

¹⁴Khanga anmani’n anhrilai khan taksa insyem reng ṭōnkarônhei kha Esther sâklôm sik a Haman kaṭhōisōt sik a inranga heikahlut hei.