Read Komrem ESTHER 7 Bible Online

ESTHER 7 - Komrem bible

ESTHER 7

¹Khang’khan rengpa leh Haman kha,

²vōi 2 tlukna Esther leh bu sâklôm sik a leikase hei. Ju in pum a rengpa khan Esther hneng aleider nôk, “Tûnchu, Rengnu Esther, heimo namadu? Kahnenga hri jo roh a’npe sik che kae. Karengram aṭimkhat kapha’m kapek sik che.”

³Rengnu Esther in amasôn, “Reng Kalûr in kei mi katlasam ngekna che natlâipek eng inchu, kei maduna khachu kei hringna sik leh kamihei hringna sik kha kae.

⁴Kamihei leh kei hi that sik a jōrsōt kachang jo ung. Hivahi sōk changna sik a injōrna kakhea akakhôkdet achangmak inchu kei hi sip kalei ti sik kae, hiva chungchânga ke’n ôt mak che ning, tâk keini hi suk manhmang sik khana manram sik kachang jo ung!”

⁵Khava sōa Reng Xerxes khan Rengnu Esther hneng aleider, “Tu’n mo khanga atlo ngam? Khava mi kha khon mo aka-om?”

⁶Esther in amasôn, “Keini inrepui, keini kathat sik mikaṭhamakpa khachu hina Haman hi kae!” Haman in rengpa leh rengnu kha ṭittak a alei-en jo hei.

⁷Rengpa kha ahnuk kana hêra inding jo, innden kha adahlon jo, vângtinga reng rahōnting kasōksōt jo. Rengpa khan hiva sik a achunga karâkna apek nger sik jo eng ti hi Haman in aleihmu jo, khava jâra Esther rengnu hneng ahringkhō inhukna ngekna sik a khanga leika-om.

⁸Amanu lungsetna ngekna sik a ama’n Esther jekhuma inbok a leika-om, khava pha rengpa kha rahōnna inphut hong inle jo. Omchen kha ahmua, rengpa kha ka-ônga, “Hiva mipa hin kahmai kungtak a, kei reng-innpuitak a hin rengnu hi setpui rong mo ati jo?” ati. Rengpa khan hivahi ahrisō lim leh reng ṭōnkatlo taksa insyem hei khan Haman lu kha anmakhupek jo.

⁹Khava sōa anmani kâra Harbona intipa khan ahri, “Reng Kalûr, nang hringkhō kahukpa Mordecai thatna sik a Haman in a-inna mi makheina ber kapha’m ado jo kae. Khavakha metre 22 inshânga kae.” “Khava chunga Haman kha makhei hlon ruh,” tia rengpa’n ṭong apek hei.

¹⁰Khava jâra khan Mordecai sik a aleido mi makheina ber a khan Haman kha anleimakhei hlon jo. Khava sōa rengpa hnuknat kha leikadai jo.