Read Komrem ESTHER 8 Bible Online

ESTHER 8 - Komrem bible

ESTHER 8

¹Khava ning tak khan Jehudihei inrepuipa Haman nei leh hao rakip Xerxes rengpa khan Esther rengnu hneng aleipek pet jo. Esther in rengpa hneng Mordecai leh innkō anchangna kha ahrisōt jo, khana khava ninga inphut Mordecai kha rengpa hnenga hlutna sik hnōmpek kachang jo.

²Rengpa khan mêrchîkna akabek akutkhi (Haman hnenga inphut alomale kha) alosōt a Mordecai hnenga apek jo. Esther in Haman nei leh hao katinta sik a Mordecai kha angansê jo.

³Khava sōa Esther kha rengpa ke kunga inkuna kaṭap a ahri nôk. Agag sōn leh pâr Haman in Jehudihei chunga inrepuina sik a akaṭhamak ṭōn mantlukna hei kha manbângna sik a rengpa hneng aleingek.

⁴Rengpa khan Esther hneng sana khōnghre kha aleikalâng pek khana amanu khan hong kangira ahnenga ahri,

⁵“Reng Kalûr nang in nahnōm pek eng inchu, khana nang in kei hi nahrung eng inchu, khana hivahi kadik tia nalo’nchu, khava Agag sōn leh pâr Hammedatha sapa Haman in rengram shunga Jehudi rakip suk manramna sik ṭong amasō kha antlosōt makna sik, tingna sik a ṭongphông inkhat amasō pek roh.

⁶Hiva inrengna hi kamihei chunga ahong tlunga khana ka-u kanaikhet hei anthat he’nchu heikhonga mo kade tor sik?”

⁷Reng Xerxes khan Rengnu Esther leh Jehudi Mordecai hnenga ahri, “Enroh, Jehudihei dōina marûk ṭōn intlukpa Haman kha ke’n kamakhei hlon jo; khana ama nei leh hao hei kha Esther hneng kapek jo.

⁸Tâk-kha rengpa rahminga ṭong phôngna khana reng mêrchîkna katat jo hei khachu losōtthei changmak jo. Achang ravâng, Jehudihei hneng namadu seng kha chithi mazet roh; kei rahminga namazet leh reng mêrchîkna kha achunga nakatat thei sik.”

⁹Hivahi Sivan inti 3 tlukna Maṭai thla kani 23 tluk ning aleikasōk omchen kae. Mordecai in rengpa lekha inzet hei kha abek hei khana Jehudihei hnenga leh vaikarônhei, ṭōn katintahei khana India inphut Ethiopia katlunga aka-om ramṭhen 127 a ṭōnkarôn rakip hei hnenga chithi mazet sik kha aleimanthei hei. Chithihei kha ram rakip ṭong et a leh anmani mazetna ngai dungjuia anleimazet a kae khana Jehudihei hneng anṭong leh anmazetna dân tak a anleimazet hei.

¹⁰Mordecai in chithihei kha Reng Xerxes rahminga aleimazet hei khana achunga reng mêrchîkna kha akatat heia kae. Khahei kha reng shakor rōng shunga shakor tlân kahrâtpen kachōng mihei anman choi heia anlei mansem hei.

¹¹Hiva chithihei hin khōpui rakip a aka-om Jehudi he’n antaksa inhrungsōtna sik a anmani intûp thei sik hei tia ahri manchên. Ramṭhen shunga tu jât inkhat in re hmangchâk anmatua Jehudihei, annuhmei ansahei chunga anbuhlu he’nchu, Jehudi he’n re kasōhei kha andōi malet heia ansuk manhmangthei sik hei; Jehudi he’n mi aka-om rakip anthat thei hei khana annei anhao rakip anlothei sik tia mantheina ka-om.

¹²Hiva ṭong masōna hi Persia ram pumpuia Jehudihei thatna sik kani tepna thla 12 tlukna Adar, Diva shunga, kani 12 tluk ninga inphut hmang sik kha kae.

¹³Khava kani kha ahong pha leh an-inrepuihei chunga phu anhlō theina sik a, Jehudihei inrin theina sik a ramṭhen rakip a mi rakip hnenga dân inkhat kapōa phôngsōt sik kha kae.

¹⁴Reng ṭongpek dungjuia shakor kachōng he’n reng shakorhei kha anchōnga inrangtak a leikase hei. Reng khōpui Susa a ṭong masōna kha mipui hnenga anleiphôngsōt jo.

¹⁵Mordecai kha renghei pōn, vapuirei leh akabang kha a’nsia, hruipōn innem zakkō a’nhak a, akalûrtak sana lukhu a’nkhua, reng-innpui kha adahlon jo. Khana Susa khōpuia hlamdung heia inpâkna leh ningṭhatna rasa inhring jo.

¹⁶Jehudihei sik a chu inpâkna leh hukna khana retorna malung rônna kha kachang jo.

¹⁷Khōpui kalen rakip leh ramṭhen rakip a rengpa ṭong masō teisōtna rakip a Jehudi he’n inpâktak a châm inhngana leh sâklôm tlona kani inkhat anleinei. Adiktak a chu mihlop katamtak Jehudi hongkachang jo hei, ajârchu tûnchu Jehudihei kha anṭit jo heia kae.