Read Komrem ESTHER 9 Bible Online

ESTHER 9 - Komrem bible

ESTHER 9

¹Adar, Diva thla ni 13, rengpa ṭongphông tlosōtna sik kani, Jehudihei inrepui he’n anratha neina thōia andana sik hei kani kha heikatlung jo. Tâk-kha khava kanek a, Jehudihei khan anmani kha antor jôk hei.

²Rengram shunga Jehudi he’n anmani omna khōpui rakip a anchunga inhmangna sik aheikatlo hei buhluna sik a le’ntluk jo hei. Hmun rakip a mihe’n anleiṭit jo hei, khana tûte inkhatbek in anmani dōi tor mak jo hei.

³Adiktak a chu, ramṭhen ṭōnkarônhei, vaikarônhei, aka-ensuihei, reng innshunga mihei ankhenga Jehudihei kha anlei inthōpui hei ajârchu Mordecai kha anleiṭit a kae.

⁴Mordecai kha tûnchu reng-innpui shunga ratha kaneipen kae khana ratha ahongnei chet-chet jo ti hi rengram pumpuia mihe’n anmanhret jo.

⁵Khava jâra Jehudi he’n an-inrepuihei chunga antatlo hnōm anleitlotor jo. Anmani’n chemjâm vâng anleibuhlu heia anleithat jo hei.

⁶Reng khōpui kalen Susa shunga kapha, Jehudi he’n mi 500 anleithat hei.

⁷Khahei kâra Jehudihei inrepuipa Hammedatha sapa Haman sapase 10 le’nvei hei: Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai khan Vaizatha hei hi kae. Achang ravâng nei leh hao chomna chu leiom mak.

¹¹Khava ning bât a Susa a antathat hei aja kha rengpa hneng anleimanthei.

¹²Khava sō leh ama’n Rengnu Esther hneng ahri, “Susa shung rōk a Haman sapase 10 hei inveina Jehudi he’n mi 500 anthat jo hei. Ramlak heia chu anmani’n heimo anta leitlo sik jo! Tûnhin nang in heimo namadu? A’npe sik che kae. Heimo namadu kahnenga hri roh, nachen sik kae.”

¹³Esther in amasôn, “Reng Kalûr in nahnōm pek eng inchu, Susa a Jehudi he’n tuninga hnōm pekna kapōa ajîng kania hin tlo nôk hei rasoh. Khana Haman sapase 10 hei taksa kha mi makhei hlonna ber a khan makheina sik a ṭong pekna nei roh,” ati.

¹⁴Hivahi intlo rasoh tia Rengpa’n ṭong apek jo hei, khana ṭongphông kha Susa a insō jo. Haman sapa 10 hei taksa kha mipui hnenga anlei malâr hei.

¹⁵Adar, Diva thla ni 14 tluk ning Susa a Jehudihei kha athera intûp nôk hei khana khōpui kalena mi 300 kakhea anleithat nôk hei. Tâk-kha annei chu heite chompek mak hei.

¹⁶Ramṭhen heia aka-om Jehudi he’m le’ntûp heia anbinga le’nhrungsōt hei. Anmani ka-en kada mi 75,000 anleithat hei. Tâk-kha neinâk chu chom mak hei.

¹⁷Hivahi Adar, Diva thla ni 13 tluk ning kae. Ajîng kania, 14 ning khan chu mi inthatna om mak jo, anmani’n inpâkna revei kani anmanchang jo.

¹⁸Achang ravâng Susa a aka-om Jehudi he’n ni 15 tluk ning kha châmhngatna kani anleimanchang, ajârchu an-inrepuihei kha ni 13 leh 14 ning anleithat heia khana ni 15 ning khan inhnga heia kae.

¹⁹Hiva jâra hin khō tetea aka-om Jehudi he’n Adar, Diva thla a ni 14 tluk ning hi, inpâkna, sâklôm tlona leh inkhat leh inkhat thlai kutchoi inpekna kania annit jo.

²⁰Mordecai in omchen kasōk hei hi aleimanzet hei khana Persia Rengram pumpuia akahla leh akahnaia Jehudihei seng hnenga chithi aleimanrôn hei,

²¹akum rakip a Adar, Diva thla a ni 13 leh ni 14 tluk ning hei hi châmhngatna kania anhmangna sik a amanthei hei.

²²Hiva kanihei hi Jehudi he’n an-inrepui heia inphut anbinga an-inhûkna kha kae; hiva thla hi lung dongna leh khōdeng theina kha inpâkna leh ningṭhatna ahong changna pha kha kae. Hiva kanihei hi revei leh sâk leh in tlona hmangna sik a amanthei hei, khat leh khat khana sarahei hnenga sâk thei kutchoi inpekna sik a mihei kha amanthei hei.

²³Khang’khan Jehudi he’n Mordecai mansena kha anleijui, khana khava nitna kha akumtina sedân hongkachang jo.

²⁴Jehudihei suk manhmangna kani manhretna sik Agag sōn leh pâr khana Jehudihei inrepui, Hammedatha sapa Haman khan tla sânna (“purim” um anti) aleinei jo; ama khan anmani kha suk manram sik a aleimantluk a kae.

²⁵Tâk-kha Esther in rengpa hneng leikase, khana rengpa’n a’nzet ṭongpek inkhat aleimasō khava dungjuia Jehudihei sik a Haman mantlukna vângsetna kha abing chunga leikatlung jo, ama leh asapahei kha mi makheina ber a khan anleimakhei hlon jo hei.

²⁶Khava jâra khava châmhngatna kanihei kha Purim anti hei. Mordecai chithi jâra leh anchunga aleikasōk ṭōn jâra,

²⁷Jehudi he’n anmani sik leh antu-ansahei khana Jehudi ahong kachang sik tu inkhat sik a, akumtina hiva kani 2 hei hi Mordecai mantheina dungjuia injônjet a nit sik hei kae.

²⁸Ramṭhen rakip leh khōpui rakip a aka-om Jehudi innkō rakip in akahong sik pha rakip a Purim kanihei hi antamandonsōt nger sik kae tia ṭong mathlâkna annei jo.

²⁹Khava sōa Abihail sanu Rengnu Esther in, Mordecai leh inṭhōia, Purim chungchânga Mordecai talei mazet ahma kakei chithi chunga khan amanu pui katluk ratha neina kha akatat a chithi inkhat aleimazetsa.

³⁰Chithi kha Jehudi pumpui hei hneng anleitira kae, khana chithi pheng kha Persia Rengram shunga aka-om ramṭhen 127 a anleitir. Khava khan Jehudihei kha mōngna leh inhukna sik vâng amanrôn hei

³¹khana anmani’n ṭajai suina pha leh buhngōina dân anta leisyem kapōa anmani leh antu-ansa he’n aphahrep a Purim kanihei hi anhmangna sik a amanthei hei. Hivahi Mordecai leh Rengnu Esther an-inhnia anṭong pekna kha kae.

³²Purim chunga manhnetna Esther ṭongpek-hei kha a’nze lekha chunga inzet a kae.