Read Komrem SŌKSŌT 10 Bible Online

SŌKSŌT 10 - Komrem bible

SŌKSŌT 10

¹Khava sōa RŌNGPU’n Moses hneng, “Se ina rengpa kha va’nhmupui roh. Ke’n ankâra ṭōn inlak-hei seng hi katlosōt theina sik a ama leh aṭōn karônhei malung kamanngar kae,

²khan chu ke’n ṭōn-inlak kalei tlosōt lai khan heikhonga mo Egypt mihei kha akamo kamanchang hei ti kha nang in natu-nasahei hneng namanthei theina sik a katlo kae kei RŌNGPU eng kae ti hi nankhenga nanhong manhret sik,” ati.

³Khava jâra Moses leh Aaron kase heia reng hneng, “RŌNGPU, Hebrewhei Pathen in hing’hin ahri, ‘Heichen katlung mo kahnenga ahong inkun mak sik che? Kamipui he’n kei ankamuk theina sik eng masōsōt jo heiroh.

⁴Nang in nahnōm khakmak inchu, jînga naram shunga khaikhu kajōngtir sik hei kae.

⁵Khangtuk hrep katam sik hei, raleichung hi antadepha sik kae. Anmani’n heirakip, kahre’n adeng manhmang mak hei seng leh aleika-om thingkunghei kapha antasâksō sik kae.

⁶Nareng-innpuihei khana naṭōn karônhei leh namipuihei innhei kasip sik hei. Napa-napu hei taleihmu kanek a anmani kha kakhôk det sik hei,’ ati” tia ahri pek. Khava sōa Moses khan inhea adahlon jo.

⁷Reng ṭōnkarônhei khan ahnenga, “Heichen katlung mo hiva mipa hin khōdeng theina amanhmu sik me? Israel mihei kha an-RŌNGPU an-Pathen kamukna sik a sesōt jo hei rasoh. Egypt a’nhmangsō jo hi lamanhret mak che mo?” anti.

⁸Khava jâra Moses leh Aaron kha reng hneng anheiṭhōi male nôk jo hei, rengpa’n anhnenga, “Nangni nan-RŌNGPU nan-Pathen inmuk kasethei sik chei. Tâk-kha tu leh tu mo akase khet sik chei?” tia ader hei.

⁹Moses’n amasôn, “Keini kansahei, kankater hei leh kankhenga kase sik ung. Kansapa, kansanu, kankemōng, kanke, khana kanse hei kantaṭhōi pet sik hei kae, ajârchu keini’n sâktlâng rehōi RŌNGPU kajana kantanei sik kae.”

¹⁰Rengpa khan, “Kei RŌNGPU a a’ntep enga kahri kae heitikchen a-enum nannuhmei naipanghei chu manṭhōi mak chei ning! Nangni’n re tlona sik nanmantluk jo ti hi intheng jo.

¹¹Changmak! RŌNGPU inmuk sik kha nanta madu achang inchu pase rōk kasethei sik chei,” ati. Kha atisō leh Moses leh Aaron kha reng hmaikunga inphut anhnongsōt jo hei.

¹²Khava sōa RŌNGPU’n Moses hneng, “Khaise hei hongsōkna sik Egypt ram chunga nakut kalâng roh. Khaihei kha kahong heia kahre’n adenghlon banghei seng akahmông rakip kha antasâk manram sik kae,” ati.

¹³Khava jâra Moses’n akhōnghre kha akalâng jo, RŌNGPU’n khava ninga sûnsôt leh jânsôt nisōtinga thlirei kha ram shunga ahei manhrâng jo. Khana ajîng jîngkâra khaikhu katamtak aheitlen jo heia kae.

¹⁴Khahei kha arup-rup a kahong heia ram pumpui anhlōsō pet jo. Khahei kha hma ale’nhmu phung hêrmak, hnunga’m a’nhmu hêrmak sik jo khaise rup-hei kha kae.

¹⁵Khahei khan raleichung kha andâpsō pet a anmandup jo; kahre tadeng ṭhen rakip, thing chunga theikara heirakip ansâksō pet jo. Egypt ram thingkung rakip leh thingchap hei chunga abō ka-êm om mak jo hei.

¹⁶Khava pha rengpa’n inrangtak a Moses leh Aaron kha abek heia, “Kei RŌNGPU nan-Pathen leh nangnihei kadōia kaset jo eng.

¹⁷Tûn hiva kasetna rōk hichu arangei mandam ruh khana kei hnenga inphut hiva karâkna kakhôktak hi alosōtna sik a RŌNGPU nan-Pathen hnenga aderpek ruh,” ati.

¹⁸Moses’n rengpa adahlona RŌNGPU hneng ader jo.

¹⁹Khana RŌNGPU’n nisōtinga thlirei kha tlaitlâk tinga thli amanchang jo, khaise hei kha amantlen heia Suez tuili shunga amantlen jo heia kae. Egypt ram rakip a khaise inkhatbek um dahlon mak joa kae.

²⁰Tâk-kha RŌNGPU’n rengpa malung kha amanngarpek jo, Israelhei kha leimanse sōt mak heia kae.

²¹Khava sōa RŌNGPU’n Moses hneng, “Nakut chungting kalâng roh khana Egypt ram pumpui inthimpak in amakhusō sik kae,” ati.

²²Moses’n akut chungting akalâng jo, Egypt ram pumpui kha ni 3 inthimpak joa kae.

²³Egypt hei kha inkhat leh inkhat inhmutō mak hei. Khana khava shunga khan mi inkhatbek in an-inn dahlon theimak jo hei. Tâk-kha Israelhei chu an-omna heia khan vâr anleichanna kae.

²⁴Reng in Moses kha abek a ahri, “Nangni kasethei sik jo chei khana nan-RŌNGPU nanva kamuk thei sik jo; nannuhmei leh nansahei kapha’m nangni leh kasethei sik jo hei. Tâk-kha nankemōng, ke leh sehei chu hin aka-om nger sik hei kae.”

²⁵Moses’n amasôn, “Kha achang inchu nang in RŌNGPU kan-Pathen hnenga tōk sik a inthoina leh romanvâmna ranhei kha naleipek sik ung kae.

²⁶Changmak, kanranhei kanta’nṭhōi sik hei kae; inkhatbek um dahlon mak ning. RŌNGPU kan-Pathen hneng kanta tōk sik ran kha keini’n kanbinga kanta’ndei sik kae. Keini sova hmun kantlung mak lai seng, khopen mo ahnenga inthoina tōk sik ti kha manhret mak ni’ung.”

²⁷RŌNGPU’n reng malung kha amanngarpek a, anmani leimanse mak jo hei.

²⁸Ama’n Moses hneng, “Kahmai kunga inphut sesōt roh! Avea nahme kha amanhmu mak roh! Kahmu nôk ning che chu, akathi sik jo che kae!” ati.

²⁹Moses’n amasôn, “Nahri kha kadik, nang in kei avea ahmu hêrmak jo tin che.”