Read Komrem SŌKSŌT 12 Bible Online

SŌKSŌT 12 - Komrem bible

SŌKSŌT 12

¹Egypt ram a RŌNGPU’N Moses leh Aaron hneng aleihri:

²“Nangni sik a hiva thla hi kum a hma inkeipen thla akachang sik kae.

³Hiva mansena hi Israel pumpui manthei hei ruh: hiva thla a ni 10 tluk ning mi inkhat et in a-innshung sik kemōngte a-emak leh ke atere akadei sik.

⁴Kemōng pumkhat akasa sik a a-innshung mi antlôm inchu anmija dungjuia mi inkhat et tasâk tor sik kha mantōk a aven inkhat leh ran kha insem thei sik hei.

⁵Nangni’n kemōng a-emak leh ke kum khat katluk ache, heite nōrna kase inkhat et nankadei thei.

⁶Khava sōa, khava thla a ni 14 tluk ning khōhleia Israel pumpui in ranhei kha antathat sik kae.

⁷Mipuihei khan khava ran thisen ṭhahrep antaloa anhme sâkna sik innkot kachohei leh kot chunga a’nkhang thing hei antakano sik kae.

⁸Khava ning jân khan hmeravōihei kha hmeia antarahei manhminna ankhabō hei leh che philo buhlom leh antasâk sik kae.

⁹Hme akasea a-emak leh but a sâk mak ruh, rahei manhmin una sâk ruh, alu, ake, khana ashung alaihei akhenga.

¹⁰Jîngkâr katlunga a’nhlei heite damak ruh; a’nhlei a-om inchu ro manvâm sik kae.

¹¹Khavakha inranga nantasâk sik kae, ajârchu khōhme kasesōt sik a intlukdek sik, nankea kekōk khana khōnghre nankut a nantamatu dek sik kae. Hivahi RŌNGPU kei kajana Rakan Kût kha kae.

¹²“Khava ning jân kei Egypt ram katlung bit a kase sik eng, a’nte hma-inkei pase rakip kathat sik, mihring leh ranhei, khana Egypt a Pathen heirakip karâkna kapek sik hei. Kei RŌNGPU eng kae.

¹³Kotkung kachoa thisen innona kha nangni omna inn mêrchîkna kachang sik. Ke’n Egypt hei karâkna kapek hei pha, thisen inno kha kahmu’nchu, karakan sik hei khana suk manset mak chei ning.

¹⁴RŌNGPU ke’n kalei tlona kha mandonsōtna sik a nangni’n hiva ning hi beklanga sâktlâng inkhat a nit ruh. Akahong sik pha rakip a nit ruh.”

¹⁵RŌNGPU’n ahri, “Ni 7 shunga nangni’n chea ansyem buhlom sâk mak ruh; che philo buhlom rōk sâk ruh. Kani hma-inkei ning che inti rakip nan-innshunga inphut losōt pet ruh. Ni 7 shunga hin mi inkhat in chephi buhlom asâk inchu, ama kha kami inkhat a inlothei mak ning.

¹⁶Kani hma-inkei ning leh ni 7 tluk ning kamukna sik a a’ntûp sik chei kae. Khava kani ning hei khan ṭōn nanta tlomak sik kae, tâk sâk leh in chu nanmantluk thei sik.

¹⁷Hiva rehōi hi hmang ṭhak ruh, ajârchu hiva kani ning hin nangni jât hi Egypt ram a inphut kaheiṭhōisōt chei kae. Akahong sik pha rakip a hiva kani hi sâktlâng tlona nantahmang ṭhak sik kae.

¹⁸Ahma inkeipen thla a ni 14 changna khōhleia inphut ni 21 katlung nangni’n che a’nphi buhlom nantasâk mak sik kae.

¹⁹Ajârchu ni 7 shunga hin che inti nan-innshunga a’nhmu hêrmak sik kae ajârchu tu mo inkhat ram hlop mi a-emak leh khōhme inkhat in che vânga ansyem buhlom aleisâk jo’nchu ama kha kami inkhat a inteimak jo ning.”

²⁰

²¹Moses’n Israel hlamkakei upahei seng abek heia anhnenga ahri, “Nan-innshung et in Rakan Kût nitna sik a kemōngte a-emak leh ketere nantakadeia nantathat sik kae.

²²Ran thisen dana kōklei shunga khan Phibur Hyssop kha phûm una nan-inn kot vei leh changa thing kha leh kot chunga thing kha kano ruh. Mi inkhatbek in jîng khōvâr mak hma seng inn nantadahlon mak sik kae.

²³RŌNGPU kha Egypt hei kathat sik a Egypt katlung bit a ase pha, kot chunga leh kot-sir heia nantakano thisen kha ahmu sik a kha Mikathat Ngeva kha nan-inn manhlut mak ning khana manthat mak chei ning.

²⁴Nangni leh nansa he’n hiva dân hi ahei tik a nantajui sik kae.

²⁵RŌNGPU’n nangni pek sik cheia a’ntep jo ram kha nanhlut pha hiva bekna rōi hi nantatlo sik kae.

²⁶Nansa he’n, ‘Hiva bekna rōi hi heitina mo?’ tia ander chei pha

²⁷nangni’n hing’hin, ‘Hivahi RŌNGPU kajana rakan revei inthoina a’ntlo kae, ajârchu Egypt a Israelhei innhei kha arakan heia kae. Ama’n Egypt hei kha athat hei, khana eini chu aleiṭhensōt me,’ tia nantamasôn sik hei kae.” Israelhei kha inkun heia ankamuk jo.

²⁸Khava sōa, anmani kase heia Moses leh Aaron hneng RŌNGPU’n ṭong aleipek hei kapōa anvatlo jo.

²⁹Ṭhangṭima RŌNGPU’n Egypt asapa a’nte hma-inkei seng athat jo hei, rengsapa, alen in-ongna kahlō sik khana inphut ek-kâra kurkhum a ka-om hei sapahei katlung; ran a’nte ache hma-inkei rakip um athat jo hei.

³⁰Khava jân a rengpa leh aṭōn karônhei, khana Egypt a mihei seng um kathōisō pet jo hei. Egypt ram pumpui inhnaktak a kaṭap jo hei, ajârchu Egypt innshung inkhatbek asapa thimakna om mak jo.

³¹Khava jântak a khan rengpa’n Moses leh Aaron mi ava manbek heia, “Nangni leh nanmi Israelhei seng, sesōt jo ruh! Karam dahlon jo ruh; nantader eng kapōa se una nan-RŌNGPU kha vakamuk jo ruh.

³²Nankemōng, ke, khana sehei inṭhōi una adahlon jo ruh. Kei sik mahâmṭhat um aderpek ruh,” ati.

³³Egypt mipui he’n ram kha inranga andahlonna sik ankahnot jo hei; anmani’n, “Nanidahlon loimak inchu, keini kathisō sik jo ung,” anti.

³⁴Khava jâra Israel mipui he’n anjâmdi che philo hlom kha ankhâng shunga anthōn mansip heia pōn vâng ankasûna andâra anrôn jo hei.

³⁵Moses’n aleimanthei hei kapōa Israel sahe’n anleitlo, Egypt mihei hneng sana dangka khana hlung mankatam khana pōnsi derkei anle’nder hei.

³⁶RŌNGPU’n mipuihei chunga Egypt he’n kajana aleimannei heia, antader rakip kha anleipek hei. Hing’hin Egypt hei nei leh hao kha Israel he’n anleirôn sō jo.

³⁷Khana Israel he’n Ramase a inphut Sukkoth kajōna anke vâng kasesōt jo hei. Anmani kha nuhmei naipang tei loa pase rōk kha 600,000 hei kae.

³⁸Mihlop katamtak, kemōng, ke, leh se katamtak leh inṭhōia leikase jo hei.

³⁹Egypt a inphut anta heirôn jâmdi khana inphut buhlom anleisyem, ajârchu anmani sōkphutrōia Egypt a inphut anhei hnongsōt jo hei jâra sâk leh in syemna pha leihmu mak hei a-emak leh chephi buhlom syemna sik le’ntluk manmak hei.

⁴⁰Egypt ram a Israel sahei kha kum 430 leika-om hei.

⁴¹Kum 430 atluk ning khan, RŌNGPU mi kachang phunghei seng kha Egypt andahlon joa kae.

⁴²RŌNGPU’n amihei Egypt a inphut ṭhōisōtna sik a aleihngâk kha jân pha kae; hiva jân hi akahong sik pha rakip a Israel he’n annitna sik jân inkhat a RŌNGPU hneng antōksōt jo.

⁴³RŌNGPU’n Moses leh Aaron hneng, “Hihei hi Rakan Kût chôndânhei kae: Ram hlop mi inkhat in rakan revei thlai asâk mak sik kae,

⁴⁴tâk nantarachôk jo sōk inkhat kha avun nantan pek dek jo’nchu asâk thei sik.

⁴⁵Pha bongkhat sik a aka-om, nanṭōn katlo mi tûte’n sâk theimak ning.

⁴⁶Hme sōngna innshunga khan thlai kha sâk nger sik kae, vânga choisōt sik changmak. Khana ran aru hei kha inkhatbek vōk mathlek mak ruh.

⁴⁷Israel rup rakip in hiva revei hi antanit nger sik kae,

⁴⁸tâk vun intan mak mi’n hivahi sathei mak ning. Nankâra ka-om ram hlop mi inkhat in Rakan Kût ahmang hnōm jo’nchu a-innshunga pase rakip vun nantatan masa sik hei kae: Khava sō leh ama kha ram a a’nte Israel mi inkhat kapōa lo sik kae khana reveia katla thei sik.

⁴⁹Hiva chôndân mama hi ram shunga a’nte Israel mihei leh nankâra aka-om ram hlop mihei chunga a’nhmang sik kae,” ati.

⁵⁰Moses leh Aaron hnenga RŌNGPU’N ṭong aleipek hei kha Israelhei seng in anjuia anleitloa kae.

⁵¹Khava ning khan RŌNGPU’n Israelhei kha Egypt ram a inphut aṭhōisōt jo hei.