Read Komrem SŌKSŌT 13 Bible Online

SŌKSŌT 13 - Komrem bible

SŌKSŌT 13

¹RŌNGPU’n Moses hneng,

²“A’nte hma-inkei pase rakip kha tōksōt ruh; ajârchu Israel a’nte hma-inkei sapa rakip khana nanran a’nte ahma inkei ache rakip keita hei kae,” ati.

³Moses’n mipuihei hneng ahri, “Egypt ram a sōk changna hmun a nanhei sōksōtna kani hi mandonsōt ruh. RŌNGPU’n hiva kani ning hin atorna rathahrat vâng aheiṭhōisōt chei kae. Chephi buhlom inkhatbek sâk mak sik kae.

⁴Nangni’n Maṭai inti thla hma inkeipen shunga hiva kani ning hin Egypt nantadahlon kae.

⁵Canaanhei, Hit-hei, Amorhei, Hivhei, khana Jebush-hei omna ram kha kapek sik chei tia RŌNGPU’n nanpa-nanpuhei hneng kalûrtak a ale’ntep kae. Ama’n khava sâng ṭhatna leh athai omna ram khan aṭhōi mathlung chei pha, hiva sâktlâng hi akumtina thla hma inkeia nantanit ṭhak sik kae.

⁶Ni 7 nangni’n che philo buhlom nantasâk sik khana ni 7 tluk ning khan RŌNGPU kajana sâktlâng nantahmang sik kae.

⁷Ni 7 shunga khan chephi buhlom kha nantasâk hêrmak sik kae; khava pha khan nanram shunga chephi buhlom leh che inti nantada hêrmak sik kae.

⁸Sâktlâng hi a’nphut pha, nangni’n Egypt nanhong dahlon pha RŌNGPU’n nangni sik a ṭōn aleitlo jâra khan hihei rakip hi nantatlo kae tia nansapa hei hneng manthei hei ruh.

⁹Hiva nitna hi mandonsōtna sik a kae, nankut bânna a-emak leh nanmachea heikhat a’nkhit kapō jo kha kae; khava khan RŌNGPU dân teina leh inthemchûk ṭhakna sik mandonsōtna amannei sik chei, ajârchu RŌNGPU’n arathahrat vâng Egypt a inphut ahong ṭhōisōt chei.

¹⁰Hiva sâktlâng hi akumtina pha tep una hmang ruh.

¹¹RŌNGPU’n nangni leh nanpu sōnhei hnenga kalûrtak a ale’ntepna Canaan ram a khan aṭhōi manhlut sik chei. Ama’n khavakha apek chei pha,

¹²nangni’n hma inkeipen pase inte rakip RŌNGPU hneng nantapek sik kae. Nanran a’nte hmasapen ache rakip RŌNGPU tahei kae,

¹³tâk shakōrtung a’nte hmakakei ache khachu, khava kahlânga kemōngte tōkna nanneia, rachôk male thei kae. Nanrachôk male hnōm mak inchu shakōrtung kha arîng nantador thlek sik kae. Nansa pase a’nte ahma inkei hei kha nantarachôk male nger sik hei kae.

¹⁴Hnunga, nansa inkhat in hiva nitna intlo hi heitina mo tia ander chei inchu, ‘RŌNGPU’n rathahrat ahmanga keini Egypt a sōk kanchangna inphut ahong ṭhōisōt ung kae,’ tia nanta manthei sik kae.

¹⁵‘Egypt rengpa’n malung kangar tak a keini amasōsōt mak ung pha, RŌNGPU’n Egypt ram mihring leh ran hma-inkei a’nte pase leh ache rakip RŌNGPU’n aleithat hei. Khava jâra a’nte masa ran ache rakip RŌNGPU hneng kanta tōk kae, tâk a’nte masa sapase chu kantarachôk male hei kae.

¹⁶Hiva nitna hi nikut a a-emak leh nimachea heimo inkhat nikhit kapōa mandonsōtna inkhat sik a kae; RŌNGPU’n eini Egypt a inphut arathahrat kalentak vâng aheiṭhōisōtna me kha mandonsōtna amannei sik me.’ ”

¹⁷Egypt rengpa’n mipuihei kha amansesōt jo hei pha, Pathen in anmani kha Philistihei tuipang jōnna hlamlen ting akatoipen hlam aleichang inum leiṭhōi mak hei. Pathen in amandon, “Mipuihei hin re antatuk bât sik hi anhmu pha anmalung anthlenga Egypt ting inle hnōm sik hei; khavakha madu mak eng,” ati.

¹⁸Khava kanek a, ama’n hlam inkôi nêrdiramhâng amanpetan heia Tuipui Kasen ting aṭhōi jo hei. Israelhei kha revonna invon heia kae.

¹⁹Joseph in Israelhei kha kalûrtak a ṭong aleimantep hei kapōa, Moses’n Joseph kalōng kha aleirôn. Joseph in, “Pathen in nangni ahuk chei pha, nangni’n kakalōng hi hiva hmun a inphut nantarôn sik kae,” aleiti.

²⁰Israel he’n Sukkoth andahlona nêrdiramhâng hmora Ethama ṭhum-hmun anleisyem jo.

²¹Khang’khan sûn leh jân anse theina sik a, RŌNGPU kha sûna anhma a sumtuk kacho inkhat a, anhlam intheia, leikase khana jâna hmei kacho inkhat a vâr kapek sik a anhma a leikase.

²²Sûn pha kataia sumtuk kacho kha mipuihei hma a ka-om khana jân pha, hmei kacho kha anhma a ka-om.