Read Komrem SŌKSŌT 14 Bible Online

SŌKSŌT 14 - Komrem bible

SŌKSŌT 14

¹Khava sōa RŌNGPU’n Moses hneng,

²“Israelhei hneng hri roh, he’nle hei sona Pi Hahiroth hma a Migdol leh Tuipui Kasen kâra Baal Zephon hnenga rephōr syem hei rasoh.

³Egypt rengpa’n Israelhei kha ramhânga inhmak a kalôn-invai jo hei, nêrdiramhâng anhnai jo tia amandon sik.

⁴Ke’n amalung kamanngar pek sik, ama’n nangni ahnong sik chei, khana rengpa leh aremihei chunga Kei retorna khan ke’n mihei kajana kha kachen sik kae. Khana Egypt he’n kei RŌNGPU eng kae tia anmanhret sik jo eng,” ati. Israel he’n antamanthei hei kapōa anleitlo jo.

⁵Egypt rengpa hneng Israel mipuihei kha katlânsō jo hei ti anhri pek pha, ama leh aṭōn karônhei anmalung anthlenga hing’hin, “Heimo nitlo jo? Israelhei nimantlânsōt jo hei, Nisōk hei nimanhmang jo hei,” anti.

⁶Khang’khan rengpa’n ashakor gâri achōnga aremi amantluk jo hei.

⁷Anṭōn karôn he’n hlam ankeia, akathem pen sepei 600 hei leh, ashakor gârihei seng leh ama kha leikasesōt jo

⁸RŌNGPU’n rengpa malung kha amanngarpek, torna leh inṭhōia aleikasesōt jo hei Israelhei kha ahei hnong jo hei

⁹Egypt remihei, shakor, shakor gâri, ankatôr hei leh inṭhōia anhei hnong heia anṭhumhmun Tuipui Kasen hnenga Pi Hahiroth leh Baal Zephon hnenga anvaphâk jo hei.

¹⁰Israel sahe’n reng leh aremihei anmani inrepui sik a anhong injôk anhmu pha, kaṭi jo heia RŌNGPU inṭangpuina sik ka-ông jo hei.

¹¹Anmani’n Moses hneng, “Egypt a khan thlân hmun aka-om mak mo? Hiva nêrdiram a hin akathi sik a nahong ṭhōi ung mo? Egypt a inphut nahong ṭhōisōt unga heimo natlo jo, enroh!?

¹²Hing’hin kasōk sik tia nisesōt mak hma nahnenga leihri mak ung mo? Kanbinga nadahlona sik ung leh Egypt hei sōk changa omṭhakna sik a nahnenga kanleiti che. Nêrdiram a thi kanek a sona son sōk vachang sik kha kaṭha jôk sik,” anti.

¹³Moses’n amasôn hei, “Ṭitmak ruh! Nan-omna hmun a khan ngir et ruh, RŌNGPU’n nangni hukna sik a heimo atlo ti kha tuning nanhmu sik; hiva Egypt hei hi hmuhêr nôk mak jo tin chei.

¹⁴RŌNGPU’n nangnihei sik re atuk sik, nangni’n heite nantatlo sik rangei mak.”

¹⁵RŌNGPU’n Moses hneng, “Heisa mo nang in inṭangpuina sik a aka-ông che? Mipuihei kha anhmating ansena sik manthei heiroh.

¹⁶Nakhōnghre kha nakut a matu inna, tuipui chunga khan kalâng roh. Tui kha alang-langa inṭhen sik, khana Israel he’n tui shunga khan kahi senga hlam anhro tor sik.

¹⁷Ke’n Egypt hei malung kamanngar pek sik hei, ashunga kahei manjui sik hei, khan rengpa leh aremihei, ashakor gârihei, ankatôr hei chunga re kha kator jâr heia khan kajana kachen sik kae.

¹⁸Ke’n anmani katortak hei pha khan Egypt he’n kei “RŌNGPU kae tia anmanhret sik jo eng,” ati.

¹⁹Pathen ngeva Israel remihei hma a aleika-om khan he’nsônna ankahnungting vaka-om jo. Sumtuk chopui kha’m insôna

²⁰Egypt hei leh Israelhei kâra vaka-om jo. Sumtuk khan Egypt hei sik a amanthim pek jo hei, tâk Israelhei hnenga chu vâr apek jo hei. Khava jâra remihei kha jânsôt khat leh khat inhnai tor mak heia kae.

²¹Moses’n akut kha tui chunga akalânga khana RŌNGPU’n nisōtinga thlipui inhnaktak ahei manhrânga tui kha asêm manle joa kae. Jân kathang thlipui khan asêm pha tuipui thōi kha ralei kachâr amanchang jo. Khang’khan tui kha inṭhen jo,

²²khana Israelhei kha ralei kahi senga kase jo hei, tuipui inṭhen kha vei leh changa bang matung kapōa ka-oma kae.

²³Egypt he’n ankahnung anhei hnong heia tuipui shunga khan anshakor, anshakor gâri leh ankatôr hei leh hongkahlut jo hei.

²⁴Jîngkâr khō avâr hma RŌNGPU’n hmei leh sumtuk kachô khana inphut Egypt remihei kha ahong en heia Egypt remihei kha ṭit inhmakna amannei jo hei.

²⁵An-inhling inkai a’ntakna sik a anshakor gârihei kâng aman-ôk pek jo hei. Egypt hei khan anhri, “RŌNGPU’n Israelhei sik a inṭanga nichunga re atlo jo. Hina inphut sōksōt jo rih.”

²⁶RŌNGPU’n Moses hneng, “Nakut kha tuipui chunga kalâng roh, Egypt hei leh anshakor gâri leh ankatôr hei manvûr sina sik tui kha he’nvō inmattō nôk sik a kae,” ati.

²⁷Khava jâra Moses’n akut kha tuipui chunga khan ahei kalâng jo, khana jîngkhō ahong vâr pha tui kha angaia hong inshâng jo. Egypt hei khan tuipui shunga inphut sōkna sik tak antlo, tâk, RŌNGPU’n anmani kha tuipui shunga ahlon manhlut heia kae.

²⁸Tui kha he’nle jo khana anshakor gâri leh akatôrhei khana tui shunga Israelhei kahnong Egypt remi rakip avûrsi jo hei; inkhatbek ṭhenmak jo hei.

²⁹Tâk-kha Israelhei chu tui shunga hlam kachâra kase hei, vei leh changa tui in bang kapōa intung pek heia kae.

³⁰RŌNGPU’n khava ning Israelhei kha Egypt hei kut a inphut alei huksōt hei khana Israelhei khan Egypt hei tui shunga ankathi kha anleihmu hei.

³¹RŌNGPU’n Egypt mihei atorna hei rathahrat kha Israel he’n anhmu pha anmani’n RŌNGPU kha anṭit joa kae; khana RŌNGPU leh asōkpa Moses kha antaksen jo heia kae.