Read Komrem SŌKSŌT 21 Bible Online

SŌKSŌT 21 - Komrem bible

SŌKSŌT 21

¹“Israelhei hneng dânhei hi pek heiroh:

²Nang in Hebrew mi sōk sik a narachôk inchu, ama’n kum 6 arazen sik che. Kum 7 changna chu ama kha heite peklo jen a masō akachang sik kae.

³Nasōk ahongchang pha nuhmei neilo aleichang inchu asōksōt phale’m nuhmei inṭhōithei mak ning; tâk nasōk ahongchang pha nuhmei aleinei dek jo achang inchu asōksōt phale’m anuhmei a’nṭhōi thei sik a kae.

⁴Akapu’n nuhmei amanneia, sapa, sanuhei anei jo’nchu, anuhmei leh asahei kha akapu tahei kae, mipa kha abing rōk a akasōksōt sik kae.

⁵Tâk-kha sōkpa khan akapu, anuhmei , khana asahei alungset heia sesōt sik amadu mak inchu,

⁶akapupa khan Pathen kamukna hmun a aṭhōi sik. Khana khan asōkpa kha kot a-emak leh kot kacho kunga in-ngaia amanngir sik, khan akōr kha avit pek sik kae. Khava sōa chu ahringkhō katlung bit a asōk akachang sik jo kae.

⁷“Mi inkhat in asanu sōk changna sik a ajōr jo’nchu, sōk pasehei kapōa masōsōt sik changmak.

⁸Amanu kha mi inkhat hneng anuhmei amanchang sik a a’njōrsōt joa, khana ama’n amadu mak jo achang inchu, apa hneng ajōr male sik kae; akapu khan khōhmehei hneng injōrthei mak ning, ajârchu ama’n amanu chunga dik loa amandon joa kae.

⁹Mipa inkhat in sōknu inkhat asapa pek sik a arachôk inchu, ama’n amanu kha asanu kapōhrep a lum alo sik kae.

¹⁰Mi inkhat in nuhmei 2 changna anei inchu, anuhmei ahma inkei kha sâk leh in, pōnsi derkei chenna sik a ṭong torna ratha amak hma kapōhrep a apek sik kae.

¹¹Hiva tlohlam kasōk hei hi atlo mathluk mak inchu, ama’n amanu kha ning leh hnōma atirsōt sik kae, khana leichoi pekna heite rahlâng mak jo ning.

¹²“Tu inkhat in mi inkhat avōk a athat jo’nchu, ama kha’m that sik kae.

¹³Tâk-kha khavakha manhret lo theiloa, thatmông rong ati achangmak inchu, ke’n nangnihei sik kakadei sik hmun a khan ama va’nthup thei sik, khana khan ama inhukthei sik.

¹⁴Tâk-kha mi inkhat in ahnuknat jâra tu mo inkhat athat jo’nchu ama khan inhukna sik a kamaichâma atlân inhlut inum ama kha’m that sik kae.

¹⁵“Tu achang inum apa leh anu kavōk kha that sik kae.

¹⁶“Tu achang inum mihring kasur, jōr sik a a-emak leh sōk a nei sik a katlo mi kha that sik kae.

¹⁷“Tu achang inum anu mo, apa mo, ahâksêr inchu ama kha that sik kae.

¹⁸“Innâkna akai inchu, mi in-khat leh inkhat hlungpum a-emak leh ankuttum vânga an-insuk a, an-inthat mak inchu, anmani kha karâkna pek mak sik hei kae. Antasukpa kha ajekhuma a’nte hêra, kha’num akathōi theia khōnghre vâng asōk lele thei inchu, anpha inhmangna man inkhatpa khan apek sik kae khana adammak lai seng a-en kaṭha sik kae.

²⁰“Sōk kanei inkhat in asōkpa mo, asōknu mo, sung vâng vōk jo sona, asōk kha ahmun a khan athi jo’nchu, sōk kapu kha karâkna pek sik kae.

²¹Tâk-kha sōk kha ni khat ni 2 shunga athimak jo’nchu, akapu kha karâkna pek mak sik kae. Aneinâk inhmang kha ama sik a karâkna akatluk hrep jo kha kae.

²²Mi ṭhahrep innâk-insena khan nupui nai karôn inkhat antôn masuk joa, anai kha athi jo’nchu, khana ama chu heite ati mak jo’nchu, nuhmeinu puise tatiti chunga ṭongkatanhei tamanṭhat seng mi katônpa kha hlei manchoi sik kae.

²³Tâk-kha nuhmeinu khet kha antôn jo’nchu, karâkna khachu hringkhō inkhat kahlanga hringkhō inkhat,

²⁴hmit kahlanga hmit, ha kahlanga ha, kut kahlanga kut, ke kahlanga ke,

²⁵hmei ro kahlanga hmei ro, intônna bi kahlanga intônna bi, mankhok kahlanga mankhok sik kae.

²⁶“Mi inkhat in asōkpa mo, asōknu mo, ahmit avōk mancho pek jo’nchu, ahmit man pekna kapōa ning leh hnōma amasōsōt sik kae.

²⁷Aha avōk mathlek inchu, aha man pekna kapōa ning leh hnōma amasōsōt sik kae.

²⁸“Sehratche inkhat in mi asuk hlon jo’nchu, hlung vânga denghlon sik, khana ahme kha sâk mak sik kae; tâk akapupa khachu karâkna pek mak sik kae.

²⁹Tâk-kha sehratche khan mihei ahnong ṭhak a khana akapupa hnenga mihe’n anmanthei jo’nchu, khava katlunga adonmak a ran khan mihei avasuk hlon inchu, hlung vânga denghlon sik kae, khana akapupa kha’m denghlonsa sik kae

³⁰Kachanga, akapupa khan ahringkhō inhukna sik a leichoi sik a hnōmpek achang inchu, a’nngek sêr kha pui katluk a achoi sik kae.

³¹Sehratche inkhat in pase naipang a-emak leh nuhmei naipang athat inchu, a’nhri dân mama kha jui sik kae.

³²Sehratche khan sōk pase a-emak leh sōk nuhmei asuk hlon inchu, se kapupa khan sōk kapu hneng dangka 30 apek sik kae, khana ase kha hlung vâng denghlon sik kae.

³³“Mi inkhat in khur singna kha alosōt a a-emak leh khur acho kha akhâr mak a, khava khura khan seche mo, shakōrtung mo atlâk jo’nchu,

³⁴khava ran man kha apek nger sik kae. Ama’n ran kapupa hnenga sêr kha apek sik khana ran kathi khachu achen thei sik.

³⁵Mi inkhat sehratche khan inkhatpa se kha avasuk hlon jo’nchu se kahring kha anta’njōra aman kha a’nsem sik hei kae; anmani’n se kathi hme kha’m a’nsem sik hei kae.

³⁶Tâk-kha sehratche kha se kabuhlu ṭhak kae tia a’nhret joa, akapupa khan heite adonmak jo achang inchu, mihlop kha aran kahring kha apek a a’nhmang bômna atlo sik kae, tâk se kathi khachu achenthei sik.