Read Komrem SŌKSŌT 28 Bible Online

SŌKSŌT 28 - Komrem bible

SŌKSŌT 28

¹“Nasōpui Aaron leh asapahei, Nadab, Abihu, Eleazar, leh Ithamar bek heiroh. Anmani’n thempu kachang heia anrazenna sik eng, Israel mipuiheia inphut ahlop a ṭhen heiroh.

²Nasōpui Aaron sik a thempu von syem roh, khava khan lûrna leh hmeṭhatna amanneina sik.

³Ke’n tlotorna ratha kapek ṭōntlo kathem rakip bek heiroh, Aaron von ankaṭhuina sik manthei heiroh, ama hi kei ṭōn tlona thempua antōksōt kha achangna sik.

⁴Syem sik hei kha manthei heiroh, ôm-mârsha inkhat, zakkō bong inkhat, zakkō inse inkhat, ret kabek inthlur zakkō inkhat, lukôm inkhat khana tumsui pōn inkhat. Anmani’n thempu kachang heia ani razen theina sik eng, nasōpui Aaron leh asapahei sik a thempuhei invonna hi antasyem pek sik hei kae.

⁵Kut kathem he’n rahmurei, vapuirei, sahme kasen, sana pat, khana hruipōn innem pat antahmang sik kae.

⁶“Zakkō bong kha rahmurei, vapuirei, sahme kasen, sana pat leh hruipōn pat, khana limret mankopna vânga antasyem sik kae.

⁷Dârhrui 2, kir mansur theina alang-langa mankop sik kae.

⁸Hiva neinâk mama hei vânga kaṭhatak a antakhông khōnkir kha zakkō bonga khan mankop sik kae.

⁹Hlung mankatam Carnelian 2 lo ina khava chunga Jacob sapa 12 rahming mazet roh,

¹⁰an-intetna dungjuia, karuk he’n apheng inkhat a karuk inkhat he’n apheng inkhat a.

¹¹Jacob sahei rahming hlung 2 chunga inzet sik a sana kakheng thei hei vaṭhōi heiroh, khana hlung kha sana kekim shunga namantung sik hei kae.

¹²Khahei kha Israel phung 12 hei kahlâng kathlenga zakkō bong dâr kir hruia khan mankop heiroh. Hing’hin Aaron in anrahming hei kha adâr chunga arôn ṭhak sik jo hei, khan chu RŌNGPU ke’n kamihei kamandon ṭhak sik jo hei.

¹³Sana kekim 2 syem roh

¹⁴khana sana intheng hrui 2, sehrui kapōa pher roh khavakha sana kekim khan mansur heiroh.

¹⁵“Thempu Kalen in Pathen lungdo manhretna atlo pha ahmang sik a ôm-mârsha inkhat syem pek ruh. Hivahi zakkō kabong syemna neinâk leh limret mama hei khan syem sik kae.

¹⁶Hivahi adung avai in-ang khana thlep hnia inthlep, centimetre 22 kasei, centimetre 22 inpek.

¹⁷Khava chunga hlung mankatam agôr manlia mankop roh, hmakakei in-gôrna rubi inkhat, topaz inkhat, khana garnet inkhat;

¹⁸2 changna in-gôrna, emerald inkhat, sapphir inkhat, khana mukta inkhat;

¹⁹3 changna in-gôrna, turquoise inkhat, agat inkhat, amethist inkhat;

²⁰4 changna in-gôrna, beryl inkhat, carnelian inkhat, khana jasper inkhat. Hihei hi sana pheng chunga mankop sik hei kae.

²¹Hlung 12 inkha-khat chunga Jacob sapahei rahming inkha-khat a’nzet sik kae, Israel jât-hei kahlânga.

²²Ôm-mârsha sik a khan sehrui kapōa a’npher sana intheng ahrui syem roh.

²³Sana kōr 2 syem roh, khahei kha ôm-mârsha chunga arakir inhnia rabek heiroh,

²⁴sana hrui 2 hei kha akōr 2 heia khan nakhit sik kae.

²⁵Lang khat tinga ahrui hmor 2 hei kha sana kekim inhnia khit heiroh hing’hin hmatinga zakkō bong dârhruia mansur hei roh.

²⁶Khava sōa sana kōr 2 syem inna ôm-mârsha thōitinga arakira, ashungtinga ahmora, zakkō bong hnengbât a rabek hei roh.

²⁷Sana kōr 2 nôk syem roh khahei kha zakkō bong dârhrui 2 hei hmatinga thōi intonga, pōn kaṭhuina hnengtak a khana kaṭha nenga a’nkhông jo khōnkir chungdet a, rabek hei roh.

²⁸Rahmurei pat-hrui vâng ôm-mârsha akōr indo hei leh zakkō bonga akōr indo hei khit heiroh, ôm-mârsha kha khōnkir chunga a’nhngana sik khana a’nṭhe makna sik a kae.

²⁹“Aaron in Hmun Inthenga ahlut pha, hiva Israel phunghei rahming inzet ôm-mârsha hi a’nhak sik kae, RŌNGPU ke’n ahei tik a kamihei kaman donsōtna sik a kae.

³⁰Ôm-mârsha shunga khan Urim leh Thummim neinâk 2 kha da heiroh, inthenga ka-omna shunga Aaron in ahong pha ahei rôn heina sik a. Khang khava pha khan chu hiva ôm-mârsha hi a’nvon ṭhak sik kae, Israel mihei sik kei lungdo kha ajōngsōt theina sik a kae.

³¹“Zakkō bong shungtinga inhak sik, zakkō inse khachu rahmurei sahme pōn rōk a a’nsyem sik kae.

³²Lu thōnna sik a akave syem sik, hiva akave hi a’nhlêr makna sik a’nkhông pōn hrui vâng zakkō lu thōnna kha rabek kaṭhōi manve bit sik kae.

³³Zakkō thōitinga ahmor kimve katlung bit a kapothei limhei rahmurei, vapuirei, khana sahme kasen pat vânga nasyem sik kae, sana paisereng leh inkâr ralak a mazet heiroh.

³⁵Aaron in hiva zakkō inse hi thempu inkhat a razenna anei pha a’nhak sik kae. Hmun Inthenga ka-omna shunga ahong pha a-emak leh ama asesōt pha, paisereng hei rasa kha inthei sik, khana ama kha akathimak sik kae.

³⁶“Sana intheng vânga ret inkhat syem inna achunga ‘RŌNGPU hneng Tōksōt’ tia mazet roh.

³⁷Khavakha rahmurei pat-hrui vânga lukôm hmating khit roh.

³⁸Aaron in khavakha amachea akhit sik kae, Israel sahe’n kahnenga antatōk rakip, mipui he’n ṭhena ṭhahrep anleitlo’num RŌNGPU Ke’n karahlângna sik a kae.

³⁹“Aaron zakkō leh alukôm kha hruipat innem vâng không pek roh, tumsui inkhat limret leh khōp pek roh.

⁴⁰“Zakkō hei, tumsui hei, khana Aaron sahei sik lukhu, lûrna leh hmeṭhatna anchenna sik, syem pek heiroh.

⁴¹Hiva pōnhei hi nasōpui Aaron leh asahei manvon heiroh. Thempu kachang heia kei ani razen theina sik a olive thai kano hei inna ṭōnhmun matungna leh mantheng sōtna nei heiroh.

⁴²Anmani sik a tōka katôi ankhôna inphut anrakō katlung antaksa anmalârsōt makna sik a hruipōn vânga syem pek hei roh.

⁴³Aaron leh asa he’n ka-omna Pōn-inna anhlut pha a-emak leh thempu ṭōn tlona sik a Hmun Inthenga maichâm ansor pha hihei hi anta’nvon ṭhak sik kae, antaksa malâr jâra thina anchen makna sik a kae. Hivahi Aaron leh asōn apârhei sik a a’nhlingmak sik dân kha kae.