Read Komrem SŌKSŌT 3 Bible Online

SŌKSŌT 3 - Komrem bible

SŌKSŌT 3

¹Ni khat Moses’n aterpu Jethro, Midianhei thempupa, kemōng leh ke rup a-ensui pek lai hei, ran rup-hei kha nêrdiram arakanpui heia, Sinai Tlâng intheng katlung jo.

²Khava hmun a khan RŌNGPU ngeva kha hmeimale kasûk kapōa hnômbi kâra inphut hong inlâra kae. Moses’n thingbura hmei kasûk kha ahmu, tâk kâng hêrmak.

³Ama’n amandon, “Hivahi inlak hranghra. Heisa mo thingbur hi akakâng mak? Kei ahnengdet a se eng sona va-en rong,” ati.

⁴Moses’n thingbur ahei hnaidet kha RŌNGPU’n ahmua, thingbur kâra inphut, “Moses! Moses!” tia ahei bek. Ama’n amasôn, “Hôi, kei hin ka-om eng.”

⁵Pathen in, “Heihnai detmak jo roh. Nakekōk kha sōt roh, ajârchu hmun inthenga akangir che kae.

⁶Kei napa-napu Abraham, Isaac leh Jacob hei Pathen eng kae,” ati. Khava jâra Moses kha ahmai amakhu jo, ajârchu Pathen ka-en sik kha aleiṭit a kae.

⁷Khava sōa RŌNGPU’n ahnenga, “Ke’n kamihei Egypt a êng kasetak a antatlo manrim hei kha kahmu jo, sōk a ankarâkna heia inphut hukna sik a an-ông rasa kha kathei jo. Ke’n ankhōdeng theina rakip kha kaman hretsō jo,

⁸khava jâra Egypt miheia inphut ankahuksōt sik a khana Egypt a inphut ram thai omna, khana tuna Canaanhei, Hit-hei, Amor, Periz hei, Hivhei, khana Jebush-hei omna ram son ankaṭhōisōt sik a kei akahong eng kae.

⁹Ke’n kamihei ṭap rasa katheikhet jo, khana Egypt he’n heituk-hrep a khōdeng antamanthei hei mo ti kahmu jo.

¹⁰Anrama inphut kamihei nakeisōt torna sik heia tûn ke’n nang Egypt rengpa hnenga katir che kae,” ati.

¹¹Tâk-kha Moses’n Pathen hneng, “Kei heite emak eng. Heikhong inmo rengpa hneng akase enga, Egypt a inphut Israelhei kaṭhōisōt tor sik hei?” ati.

¹²Pathen in, “Ke’n nang ka’nṭhōipui sik che, nang in mihei kha Egypt a inphut naheiṭhōisōt hei pha hiva tlâng chunga hin nakamuk sik eng kae. Khavakha ke’n nang katirna che manchênna kae,” ati.

¹³Tâk-kha Moses’n amasôn, “Ke’n Israelhei hneng kase pha anhnenga, ‘Nanpu sōnhei Pathen khan kei nanhnenga ajōngtir eng kae,’ kati pha, anmani’n kei anider sik eng, ‘Ama rahming kha heimo?’ tia. Khan chu ke’n heimo kahri pek sik hei.”

¹⁴Pathen in, “Kei kha Kei eng kae,” ati. “Anhnenga nahri pek nger sik hei khachu, ‘Arahming KEI ENG kati inkhat khan nanhnenga ajōngtir eng kae,’ vati roh,” ati

¹⁵Anpu sōnhei Pathen, Abraham, Isaac leh Jacob Pathen RŌNGPU Ke’n nang hi anhnenga katir che kae ti hi Israelhei kha hripek heiroh. Hivahi ahei tik a karahming kha kae; hivahi hnunga khang rakip in antabekna sik eng kha kae.

¹⁶Se roh khana Israel hlamkakeihei kha mantûp heiroh khana anpu sōnhei Pathen, Abraham, Isaac leh Jacob hei Pathen RŌNGPU Ke’n, nahnenga kajōng inlârna hi hripek heiroh. Ke’n anhnenga kahong jo eng khana Egypt he’n anchunga heimo antatlo pek hei kha kahmu jo, tia hripek heiroh.

¹⁷Ke’n anmani Egypt ram a êng kasetak a antlo manrimna heia inphut ṭhōisōt sik heia kamandon jo, khana ram ṭhatna leh ralei thai omna, Canaanhei, Hit-hei, Amorhei, Periz hei, Hivhei leh Jebush-hei ram a kaṭhōi sik jo hei.

¹⁸“Kami he’n anhnenga nahri pek hei ṭong kha anrangei sik. Khava sō leh nang Israel hlamkakeihei leh Egypt rengpa hneng se una hing’hin vahri ruh, ‘RŌNGPU Hebrewhei Pathen kha kanhnenga hong inlâr jo. Tûn ni 3 hlam a nêrdi ramhânga RŌNGPU kan-Pathen hneng inthoina katlo sik a ahnōm pek roh,’ vati ruh.

¹⁹Achunga rumhrat hmang loa chu Egypt rengpa’n mansesōt mak tin chei ti Ke’n kamanhret.

²⁰Tâk-kha Ke’n katlo torna kahmang sik khana ram a khan ṭit ka-om tak omchen katlosōt sik a kha Egypt kha karâkna kapek sik. Khava sō tōa nangni amansesōt sik chei.

²¹“Kami he’n andahlon hei pha kut karōk a anse makna sik, Egypt hei khan nanhnenga kajana ka-man pek sik chei.

²²Israel nuhmei rakip in avena Egypt hei hneng leh a-innshunga ka-om Egypt nuhmeihei hneng kase sik heia kha pōnsi derkei, sana leh dangka inretna hei anvader sik hei. Israel he’n khahei kha ansanu ansapahei anmannei sik hei khana Egypt hei nei rakip khanga antarônsō pet sik kae.