Read Komrem SŌKSŌT 30 Bible Online

SŌKSŌT 30 - Komrem bible

SŌKSŌT 30

¹“Marim katui ro mankhutna sik maichâm inkhat acacia thing vâng syem roh.

²Khavakha adung avai a’n-anghrep centimetre 45 et sik kae, khana a’nshâng centimetre 90 sik kae. Arakir 4 a ahmor kasonghei kha leh maichâm kha inkhat akachang sik hei kae.

³Maichâm achung, asir 4, khana arakir hmor kasonghei kha sana intheng vâng katōm roh. Akimvea sana hrui rabek inna ahmor-ri syem roh.

⁴Khana akadomna sik sana kōr kave 2 syem roh, asir 2 a sana hmor-ri thōia akadomna thingtlōn thōnna sik rabek hei roh.

⁵Khava sungtlōn kha acacia thing vânga syem roh, sana vâng katōm hei roh.

⁶Hiva maichâm hi pinden inkheina vângting, Intepna Bôm hma khan da roh. Ke’n nang ka’nhmupui sik che kha khava hmun a kae.

⁷Aaron in jîngkâr kataia thaihmei det mantluk sik a ahong pha, khava maichâm chunga marim katui aro mankhut ri sik kae.

⁸Khang’khan khōhleia thaihmei adet phale’m atlo nger sik kae. Hiva marim katui ro-inthoina hi injônjet a bânglo jena atlo sik kae.

⁹Hiva maichâm chunga tōk theimak sik bero, ranhring khana kara inthoina nanta tlomak sik kae, khana ju inthoina sunthlōn mak sik kae.

¹⁰Hiva maichâm hi kum khat shunga vōi khat Aaron in manthengna rōi atlo sik kae. Maichâm rakira araki 4 kasonghei kha set-inthoina thisen kha akano sik kae. Hiva rōi hi pha rakip a akum kataia atlo sik kae. Hiva maichâm hi RŌNGPU kei hneng a’ntōksōt pui katluk a a’ntheng akachang sik kae.”

¹¹RŌNGPU’n Moses hneng ahri,

¹²“Nang in Israel mipuihei mija natei pha, mi inkhat et in ahringkhō man apek sik eng kae, mija teina shunga achunga natna heite anei makna sik a.

¹³Mija tei mannhlut jo rakip in rahōi kasōk sêrja kha apek nger sik kae; inrônna pek ngai dungjuia.

¹⁴Mija a’ntei jo hei, ti chu, pase rakip kum 20 katluk leh akakhe jo mi khan hivaja hrep hi apek sik eng kae.

¹⁵Anmani’n anhringna man anpek pha mikanei khan tamdet mak ning, misara khan tlômdet mak ning.

¹⁶Sêr kha Israel mipuihei hnenga ṭhei roh, ka-omna Pōn-inn ensuina nahmang sik kae. Hiva ramsêrṭhei hi ahringkhō man pekna kha kae, khana anmani hrungna sik kha kamandonsōt ṭhak sik.”

¹⁷RŌNGPU’n Moses hneng ati,

¹⁸“Sum-êng thlengkông kalen inkhat, sum-êng vânga a’ntungna inkhat syem hei roh. Pōn-inn leh maichâm kâra da roh.

¹⁹Aaron leh asa he’n tui kha anke ankut sôpna antahmang sik kae,

²⁰Pōn-inna thlai katōk sik anhlut mak hma a-emak leh maichâm kha ansor pha. Khan chu anmani thimak hei ning.

²¹Anmani anthi makna sik ankut anke antasôp nger sik kae. Hivahi anmani leh ansōn he’n ahei tik a antajui sik dân kae.”

²² RŌNGPU’n Moses hneng ati,

²³“Marim katui pen thingdi rōdi hei inlo roh - myrrh atui kilograme 6, ṭhingṭhe kilograme 3, phikung marim katui kilograme 3,

²⁴khana tespât kilograme 6 (akhenga atena châng hrep a). Olive thai litre 4 hapsa roh,

²⁵sahrik intheng marim katui kapōa manhei roh.

²⁶Khavakha ka-omna Pōn-inn, Intepna Bôm,

²⁷dokhâng leh hmangchâk seng, thaihmei matungna leh hmangchâk seng, marim katui ro-inthoina maichâm,

²⁸ro-inthoina ahmangchâk rakip leh, insôp inthengna thleng rakōng leh amatungna ankhenga kano hei roh.

²⁹Hing’hin sukmantheng hei roh, anmani pui katluk a intheng sik jo hei, khana tu inkhat, hei-inkhat in atôn inchu, an-inthengna rathahrat khan asukset sik kae.

³⁰Khava sōa Aaron leh asapahei kha thai manthi hei roh, khana kaṭōn katlo thempu kachang sik a thai kha kano hei ina ṭōnhmun kha pek jo hei roh.

³¹Israel mipui hneng hripek hei roh, ‘Hiva thai intheng kano hi kei razenna, akahong sik pha rakip a, hmang sik kae.

³²Micham chunga hiva thaitui hi insun theimak ning, khana hiva sahrik syemdân hi leh in-angtlinga manheia alak syemthei mak ning. Hivahi a’ntheng kae, inthenga nantahmang sik kae.

³³Tu achang inum hinghiva kapō kasyem, thempu a-emak leh thempu changlo mi inkhat chunga akahmang hei kha kami inkhat a inlomak ning.’ ”

³⁴RŌNGPU’n Moses hneng ahri, “Hiva marim katui maru-marâng hei hi aṭhen in-ang et a lo roh — stacte, onycha, Galbanum, khana bero intheng.

³⁵Hihei hi hmang inna ro-inthoina sik kha syem hei roh, marim katui kapōa manhei roh. Innim loa inthenga da theina sik chi ajing phi roh.

³⁶Ṭhahrep lo ina suk mandi neng roh, ka-omna Pōn-inna choi roh, Intepna Bôm hma a kathek roh. Hiva ro-inthoina hi pui katluk a inthenga hmang roh.

³⁷Nabinga sik hiva kapō ro mankhutna heikhat syemna khan hiva dân hi hmangmak roh. Hivahi kei hnenga tōksōt jo a’ntheng neinâk inkhat a hmang roh.

³⁸Tu mo inkhat in hiva kapōa marim katui hmang sik a aleisyem jo’nchu, ama kha kei mi inkhat a lomak sik kae.”