Read Komrem SŌKSŌT 33 Bible Online

SŌKSŌT 33 - Komrem bible

SŌKSŌT 33

¹RŌNGPU’n Moses hneng ahri, “Hiva hmun hi nang leh Egypt a inphut nahong ṭhōisōt mipuihei leh dahlon jo ruh, khana ke’n Abraham, Isaac khana Jacob leh asōnhei kapek sik tia kaleitep ram kajōna se jo ruh.

²Nangni kaṭhōi sik ngeva inkhat kajōngtir sik, khana Canaanhei, Amorhei, Hit-hei, Periz hei, Hivhei, khana Jebush-hei, kahnong sōt pek sik chei.

³Nangni ralei thai ṭhatna leh kara kanei ram a akase sik chei kae. Tâk kei khet chu nangni leh inṭhōia semak ning, ajârchu nangni rahe kase mi chei kae, akinchu hlam kâra kasuk manramsō sik chei.”

⁴Khava ṭong kha mipui he’n anthei pha, kaṭap inphut jo heia sanaret hei kha in-or nôk mak jo hei.

⁵Mipuihei hneng hri sik a RŌNGPU’n Moses hneng ṭong aleipek, “Nangni racham kase mi chei kae. Ke’n pha bongkhat rōk ka’nṭhōipui chei inchu, kasuk manhmang pet sik chei. Tûn nan-inretna sanahei kha losōt ruh, khan nangni leh heimo tlo sik kha kamandon sik.”

⁶Khang’khan Sinai tlâng kha andahlon jo, Israel mipui he’n inretna sana avea in-or mak jo hei.

⁷Israel mipuihei ṭhumhmun syemna rakip a Moses’n Pōn-inn intheng kha inkârdet a amatung sik kae. Khavakha RŌNGPU omna Pōn-inn inti khana tu achang inum RŌNGPU hneng derhnōm kanei rakip in khana khan akase sik kae.

⁸Khana khan Moses ase kataia, mihei khan ankot kung et a akangir heia Moses khan Pōn-inn ahlutmak hma seng anta-en sik kae.

⁹Moses kha ahlutsō jo’nchu sumtuk kacho kha kajōng sik, Pōn-inn kot kunga kangir sik, RŌNGPU’n sumtuk kâra inphut Moses hneng ṭong ajōng hri sik.

¹⁰Pōn-inn kot kunga sumtuk kacho kha angîr kha anhmu lim leh mipuihei kha’n antakamuk sik kae.

¹¹RŌNGPU’n Moses leh hmai leh hmai inhnget a, mi inkhat in aṭhōnpa a’nbekpui kapōa, ṭong ahri sik kae. Khava sōa Moses chu ṭhumhmuna he’nle sik. Tâk, khangdông inkhat, ama inṭangpui, Nun sapa Joshua khachu, Pōn-inna khan ka-om jo.

¹²Moses’n RŌNGPU hneng ahri, “Sova ram a hiva mipuihei kaṭhōi sik a nang in adik khet a kahnenga naleihri, tâk kei inṭhōipui sik tu mo najōngtir sik ahri pek mak che. Kei hi kaṭha nani manhret khana kachunga namalung katlâi tia kahnenga naleihri pek eng.

¹³Tûn khanga achang inchu, nasepa katloa namalung tlaina manjôn theina sik, naṭōn mantluk hei kha amanthei roh. Hiva jât-hei hi nami sik a nakadeina hei kha’m mandonsōt roh.”

¹⁴RŌNGPU’n amasôn, “Ka’nṭhōipui sik che, khana re kamantor sik che.”

¹⁵Moses’n amasôn, “Nang in nasepui mak ung inchu hiva hmun hi amandahlon mak roh.

¹⁶Nang in nasepui mak ung inchu heikhong mo namipui leh kei chunga namalung katlâi ti mi inkhat in amanhret thei sik? Kankâra na-om hin raleichunga mi ralak-heia inphut ahlop a aṭhen sik ung kae.”

¹⁷RŌNGPU’n Moses hneng ahri, “Naderna kapōa ke’n katlo pek sik che, ajârchu ke’n nang kaṭhatak a kamanhret che khana nachunga kamalung katlâi.”

¹⁸Khava sōa Moses’n ahnenga angek, “Lungsettak a na-omna vâr kadi rik-rak kha eiman hmu roh.”

¹⁹ RŌNGPU’n amasôn, “Kalûrna hei seng nahmai kunga kamalâr sik khana nahmai kunga a’ntheng karahming kahrisōt sik. Kei RŌNGPU eng kae, ke’n kakadei hei hneng kamaritna leh kamalungsetna hei kamalâr.

²⁰Kahmai chu manhmu mak che ning, ajârchu tu inkhat in ahmutor mak ning khana ani kahmu kha’m hringmak ning,

²¹tâk-kha kasira hmun inkhat ka-om khana khan hlung chunga kangir thei sik che.

²²Kalûrna vâr kha ahong sōk pha hlung kakik-khōi shunga kada sik che khana kasesōt mak hma seng kakut vâng kazâr khum sik che.

²³Khava sōa kakut kazâr khumna che kha kalosōt sik, nang in kakahnung ting chu nahmu sik eng, tâk kahmai chu hmumak tin che.”