Read Komrem SŌKSŌT 37 Bible Online

SŌKSŌT 37 - Komrem bible

SŌKSŌT 37

¹Intepna bôm kha Bezalel in acacia thing vânga centimetre 110 adung kasei centimetre 66 avai, khana centimetre 66 inshânga asyem.

²Ama’n sana inthengtak vânga ashung leh avâng amantōm khana ahmor kimvea sana pek amantlân.

³Akadomna sik akōr 4 sana vânga asyem hei kha ake 4 a amando hei, asir inkhat a akōr 2 et kae.

⁴Akadom lelena sik sungtlōn kha acacia thinga asyem, khahei kha sana vânga akatōm hei,

⁵khana sungtlōn hei kha thingbôm sira akōr indo shunga anthōn hei.

⁶Sana intheng vânga asingna asyem, centimetre 110 adung, centimetre 66 avai kae.

⁷Mathla kanei ranhring 2 sana vânga akhenga asyem hei,

⁸asingna hmor inhnia inkha-khat amankop heia asingna kha leh inkhat kachang hei.

⁹Mathla kanei ranhringhei kha asingna chunga khan hmai inhngettō hei, khana anmathlâ anta heizer khan khavakha anmakhusia kae.

¹⁰Ama’n acacia thing vânga dokhâng kha aleisyem, centimetre 88 adung, centimetre 44 avai, khana centimetre 66 a’nshâng kae.

¹¹Ama’n achunga sana intheng vânga amakhua ahmor kimvea sana pheng amantlân.

¹²Akham kha millimetre 75 inpek a akimve kha asyem khana akhama ahmor kimvea khan sana pheng amantlân bit a kae.

¹³Khava kadomna sik a sana kōr 4 asyem hei kha arakir manlia akehei omna khan amansur hei.

¹⁴Dokhâng kadomna sik sungtlōn hei thōnna sik a akōrhei kha akham hnenga amando hei.

¹⁵Sungtlōn hei kha acacia thing vânga asyem hei khana sana vânga akatōm hei.

¹⁶Dokhâng sik a sana intheng vânga thleng aleisyem hei: thleng, thlengkam, bephu, kōklei, hei kha ju tōkna hmangchâk sik hei kae.

¹⁷Ama’n thaihmei matungna kha sana intheng vâng asyem. Amatungna ngirna kōklei leh abâk-hei kha sana a’nkheng vânga asyem hei; aret reipâr hei, a’nhmōm abōhei leh reibōhei kha khavakha leh amankop heia inkhat a asyem.

¹⁸Alaiṭima inphut asira abâk 6 asyem hei, asir inkhat a abâk 3 et indo hei.

¹⁹Abâk 6 hei inkhat et a almond reipâr kapō adôn leh reibō leh a’nhmōm ret insyem amankopsa hei.

²⁰Thaihmei kung khan ret reipâr 4 anei, almond reipâr abi adôn leh reibō leh a’nhmōm ka-ang.

²¹Asir inhnia abâk kasōksap 3 hei thōi et a anhmôm rei inkha-khat kakop hei.

²²A’nhmōm, abâk, thaihmei kunghei kha sana a’nkheng vânga ansyem neinâk inkhat rōk kachang jo hei.

²³Thaihmei kunga khan thaihmei 7 asyem hei, acheiche leh achekōk dana sik kha sana intheng vâng asyem hei.

²⁴Sana intheng kilograme 35 ahmanga thaihmei kung leh alak hmangchâk-hei seng asyem hei.

²⁵Maichâm inkhat kha marim katui ro mankhutna sik a acacia thing vânga asyem. Khavakha adung avai in-anghrep, centimetre 45 adung leh avai, centimetre 90 a’nshâng kae. Arakir manlia ahmor kasonghei kha hivahi leh pumkhat kachang jo hei.

²⁶Achung kha, asir 4 leh, ahmor kasonghei sana intheng vânga amakhu khana khava akham kimvea sana pheng amantlân.

²⁷Akadomna sungtlōn 2 heithōnna sik akōr alang-langa sana pheng akatlân thōia inkhat et amando hei.

²⁸Sungtlōn kha acacia thing vânga asyem hei khana sana vânga amantōm hei.

²⁹Ama’n inthenga kano sik thai leh ro mankhutna hei kha marim katui kapōhrep a amanhei heia asyemsa hei.