Read Komrem SŌKSŌT 38 Bible Online

SŌKSŌT 38 - Komrem bible

SŌKSŌT 38

¹Romanvâm inthoina sik a maichâm inkhat acacia thing vâng aleisyem. Adung avai in-anghrep, metre 2.2 kasei khana metre 2.2 inpek, metre 1.3 inshâng.

²Arakir 4 chungting ahmor amansong hei, maichâm kha leh pumkhat anchangna sik a kae. Akhengpet a khan sum-êng vânga amakhu hei.

³Ama’n maichâm sik a hmangchâk asyemsa hei: khâng, vutlōk, kōklei, kōikim, hmei thlenghei seng. Hiva hmangchâk-hei hi sum-êng vânga asyem hei.

⁴Sum-êng vânga kahrang asyema maichâm hmor thōia ada, khava khan maichâm alai atlungna sik a.

⁵Akadomna kōr 4 asyema arakir manlia amankop hei.

⁶Akadomna thingtlōn acacia vânga asyema sum-êng vânga akatōm hei,

⁷khahei kha maichâm sira akōr kakop heia khan akathihei. Maichâm hi abang inkhâr, ashung kavea asyem kae.

⁸Sum-êng thlengkông leh amatungna sum-êng kōklei kha RŌNGPU omna Pōn-inn hlutna hmun a a’njen nuhmeihei tahei choi thle-en vânga aleisyem.

⁹RŌNGPU omna Pōn-inn khârna kha hruipōn pinden vânga aleisyem. Thlâng ting asira sik a pinden kha metre 44 kasei,

¹⁰akarôn sik a sum-êng kacho 20, anmatungna thirpek 20, inṭhōia akōr leh sungtlōn asyem hei.

¹¹Sak tinga akhârna hi’m hivahi leh in-angtling hei.

¹²Tlaitlâk tinga pinden hi metre 22 kasei, dangka kacho 10, amatungna thirpek 10, akōrhei leh sungtlōn asyem hei.

¹³Ahlutna ting, nisō langa amakhuna kha metre 22 kasei.

¹⁴Asir inhnia hlutna pindenhei kha metre 6.6 kasei hei, akarôn sik kacho 3 leh anmatungna kōklei 3 et asyem hei.

¹⁶Akimvea akakurna kha hruipōn innem vânga aleisyem hei.

¹⁷Kacho matungna hei kha sum-êng vânga asyem hei, khana akōr, sungtlōn, kacho chunga ahmor makhuna hei kha dangka vânga aleisyem hei. Pōn-inn kimvea akhârna kachohei kha dangka sungtlōn vânga amansur hei.

¹⁸Akakurna shunga hlutna pinden kha hruipōn innem: rahmurei, vapuirei, shahme kasen vânga ankhônga a’nsyem kae khana kut thema aret aleisyem. Akakurna pinden kapōhrep a hivahi’m metre 9 kasei metre 2 inshâng.

¹⁹Hivahi sum-êng apâk chunga matungsōt kacho 4 he’n anrôna kae. Khahei kha ankōr, anchung makhuna, ansungtlōn seng kha dangka vânga asyem hei.

²⁰Pōn-inn leh akimvea khârna, ahrui keina sik uchup hei kha sum-êng vânga asyem hei.

²¹Ṭongpek Sôm a’nzetna hlungpheng 2 hei dana RŌNGPU omna Pōn-inn shunga thir leh hlung antahmang hei aja kha hihei hi kae. Aja man-gôrna kha Moses’n ṭong apek heia Aaron thempu sapa Ithamar mantheina thōia ṭōnkatlo Levihei anleisyema kae.

²²Judah phunga Hur tupa, Uri sapa, Bezalel in RŌNGPU ṭongpek dungjuia heirakip aleisyem jo.

²³Ama inthōpui, Dan phunga Ahisamak sapa Oholiab kha kut kathem lim inzet, ret kasyem, hruipōn innem rahmurei, vapuirei, khana shahme kasen vânga akakhông thei mi kae.

²⁴Pōn-inn intheng sik a RŌNGPU hnenga sana a’ntōk seng kha atedân dungjuia kilograme 1,000 kae.

²⁵Dangka kha atedân dungjuia, mija teina inphut intōk a a’nhmu kha kilograme 3,430 kae.

²⁶Hiva aja hi mija a’nzet mi rakip hei tapek dôr kasōk kha leh a’ntōk jo kae, mi inkhat et in pek sik dôr kha anpek a, sedân dungjuia antea kae. Pase kum 20 leh achung seng kha mija teina anneia mi 603,550 hei kae.

²⁷Dangka kha kilograme 3,400 chu Pōn-inn intheng matungna kōklei 100 leh pinden matungna inkhat et sik a kilograme 34 anleihmang jo.

²⁸A’nhlei kilograme 30 kha Bezalel in sungtlōn, kachoa kakop kōikim, anchunga ahmor makhuna heia aleihmang jo.

²⁹RŌNGPU hnenga a’ntōksōt sum-êng kha kilograme 2,425 katluk.

³⁰Khan vâng khan RŌNGPU omna Pōn-inn hlutna kot matungna kōklei, sum-êng maichâm leh sum-êng kahrâng, khana maichâma hmangchâk rakip,

³¹akimvea akakurna pinden khana akakurna shunga hlutna kot-hei intungna kōklei, khana Pōn-inn leh akimve kakurna hrui keina uchup hei aleisyemna hei.