Read Komrem SŌKSŌT 39 Bible Online

SŌKSŌT 39 - Komrem bible

SŌKSŌT 39

¹Hmun Inthenga razenna ṭōn antlo pha thempuhei invonna sik von kalûrhei kha rahmurei, vapuirei, sahme pōnsen vânga anleisyem. RŌNGPU’n Moses hneng ṭong apek dungjuia anmani’n Aaron sik a thempu invonna anleisyem.

²Zakkō bong kha hruipōn innem rahmurei, vapuirei, shahme pōnsen, khana sana pat-hrui vâng ankhônga ansyem.

³Sana kha sek vânga anhem manpek a, inmidâk a pat-hrui kapōa adung kaseia an-eptan a khavakha hruipōn innem khôngna leh rahmurei, vapuirei khana sahme patsen kahrena anmanveisa.

⁴Zakkō kabong sik a dârhrui 2 ansyem, ansur manhnetna sik a asir heia ahmor hei kha ankir mankop hei.

⁵Hmangchâk mama khana a’nkhông akaṭhatak khōnkir kha RŌNGPU’n Moses hneng ṭong aleipek dungjuia zakkō bong kha leh pumkhat changna sik a anmankop hei.

⁶Anmani’n Carnelia hlung mankatam kha anmantluk a sana kekimte shunga khan anmankop hei, khahei chunga khan Jacob sapa 12 hei rahming kha kathemtak a anmanchōng heia kae.

⁷Anmani’n zakkō bong dârhruia khan Israel phung 12 hei kahlânga anlei mankop hei, RŌNGPU’n Moses hnenga ṭong aleipek dungjuia.

⁸Anmani’n zakkō bong hmangchâk leh aret hei kapōtak a ôm-mârsha kha’m ansyem.

⁹Khavakha adung avai a’n-anghrep, thlep hnia a’nthlep, adung avai centimetre 22 kae.

¹⁰Khava ôm-mârsha chunga hlung mankatam agôr manlia anmankop hei: agôr inkhatna rubi, topaz, leh garnet hei hi kae;

¹¹agôr inhnina emerald, sapphir leh mukta hei hi kae.

¹²agôr inthumna turquoise, agat leh amethist hei hi kae;

¹³khana agôr manlina beryl, carnelian leh jasperhei hi kae. Hihei hi sana kekimte shunga anmankop hei.

¹⁴Khava hlung 12 chunga khan Jacob sa 12 hei rahming inkha-khat anmazet, Israel phung 12 hei kahlânga manhretna kae.

¹⁵Ôm-mârsha sik a hrui kapōa maher mankop sana intheng hrui anleisyem hei.

¹⁶Sana kekimte 2 leh sana kōr 2 ansyema khava sana kōr 2 hei kha ôm-mârsha chungtinga arakira anmankop heia kae.

¹⁷Khava sana kōr 2 a khan sana hrui 2 kha ankhit a kae,

¹⁸khana alak ahmor 2 hei kha kekimte inhnia anva khit hei khang’khan hmatinga zakkō bong dârhruia anmankop hei.

¹⁹Sana kōr 2 ansyema khahei kha ôm-mârsha thōitinga arakira, zakkō bong hnengtak a, ashungtinga ahmora anmankop hei.

²⁰Sana kōr 2 a’nsyemsa hei kha zakkō bong dârhrui 2 hei hmatinga athōi intonga anmankop hei, akaṭhuina dung hnenga khana kaṭhatak a antakhông jo khōnkir chungdet a kae.

²¹Moses hneng RŌNGPU’n ṭong aleipek kapōa, ôm-mârsha a kōr kakop hei kha zakkō bonga kōrhei kha leh rahmurei pat-hrui vânga ankhit hei, ôm-mârsha kha khōnkhitna chungdet a a’ntunga a’nthe makna sik a kae.

²²Zakkō bong shungting inhak sik Zakkō inse kha rahmurei shahmepōn rōk a ansyem kae.

²³Zakkō rîng kha a’nhlerthei makna sik pat inhre vâng ankaṭhui mankima kae.

²⁴RŌNGPU’n Moses hneng ṭong aleipek kapōa, Zakkō inse thōitinga ahmor kimve katlung bit a hruipōn innem rahmurei, vapuirei leh sahme patsen vâng kapothei lim ansyema paisereng leh inkâr ralak a amazet hei.

²⁷Anmani’n Aaron leh asahei sik zakkō ansyempek hei,

²⁸lukôm, lukhu leh hruipōn tōka katôi,

²⁹khōnkhit tumsui hei rahmurei, vapuirei, sahme patsen vâng limret anmankop a, RŌNGPU ṭongpek dungjuia ansyempek hei.

³⁰Anmani’n sana intheng vâng ret ansyem, inthenga inpek inhlutna mêrchîkna sik a khahei chunga, “RŌNGPU hneng tōksōt” tia anmazet a kae.

³¹Khavakha ahmatinga lukôm chunga khan RŌNGPU’n Moses hneng ṭong aleipek kapōa, rahmurei pat-hrui vâng ankhit mankop a kae.

³²RŌNGPU omna sik Pōn-inn sakna ṭōn rakip antorsō pet jo. RŌNGPU’n Moses hneng ṭong aleipek kapōhrep a Israel he’n heirakip ansyem jo.

³³Pōn-inn leh ahmangchâk rakip Moses hneng anheichoi jo, akōikim, akekim, abang rape, akacho, kacho matungna;

³⁴achung makhuna sik kemōng vun akasen a’nno; achung makhuna sik shavun innem, pinden;

³⁵hlungpek 2 dana Inntepna Bôm, akadomna sungtlōn 2, khana asing;

³⁶dokhâng leh ahmangchâk hei, khana Pathen hneng a’ntōk buhlom;

³⁷sana intheng vânga antasyem thaihmei kung, athaihmei, thaihmei leh ahmangchâk seng, thaihmei sik a thai;

³⁸sana maichâm; manthi sik thai, marim katui ro mankhutna; Pōn-inn hlutna pinden;

³⁹sum-êng maichâm leh akahrâng, akacho, ahmangchâk rakip hei, thlengkông leh amatungna thirpek;

⁴⁰akakurna pindenhei leh akacho khana amatungna hei; akakurna shunga hlutna pinden leh ahrui hei; Pōn-inn mankeina uchup hei, Pōn-inna hmangchâk rakip;

⁴¹khana Hmun Inthenga thempuhei ta’nvon sik ret kalûrhei, thempu Aaron leh asapahei sik a pōn intheng hei seng.

⁴²RŌNGPU’n Moses hneng ṭong aleipek dungjuia Israel sahe’n heirakip kha antlosōt jo.

⁴³Moses’n heirakip a-entetōk hei khana RŌNGPU ṭongpek dungjuia heirakip antasyem kha ahmu jo. Khava jâra Moses’n mahâmṭhat aleipek hei.