Read Komrem SŌKSŌT 4 Bible Online

SŌKSŌT 4 - Komrem bible

SŌKSŌT 4

¹Khava sōa Moses’n RŌNGPU kha amasôna, “Tâk-kha ahlam inkhat a Israel he’n kaṭong hri kha taksen mak jo hei, khana rangei mak jo hei. Nang kha kahnenga inlârmak che anti’nchu heimo katlo sik?” ati.

²Khava jâra RŌNGPU’n ader, “Heimo namatu?” “Khōnghre,” tia amasôn.

³RŌNGPU’n, “Raleia hlon mathlâk roh,” ati. Moses’n akhōnghre kha raleia ahlon mathlâk pha, mari hong inchang jo, khana inphut ama katlânsōt jo.

⁴Khava sōa RŌNGPU’n Moses hneng, “Inkun roh khana arahmeia sur roh,” ati. Khava jâra Moses inkuna asur jo khana khōnghre hong inchang nôk jo.

⁵RŌNGPU’n ahria, “RŌNGPU, anpu sōnhei Pathen, Abraham, Isaac leh Jacob hei Pathen kha nahnenga inlâr ti hi a’nchênna sik a hivahi anhnenga tlopek heiroh,” ati.

⁶RŌNGPU’n Moses hneng ahri nôk a, “Nakut kha napōn shunga thōn roh,” ati. Moses’n ṭongpek kha ajuia atlo; khana akut kha vânga ahei keisōt pha, kaphâr nat in akatōmsi jo, kavur kapōa kabang jo.

⁷Khava sōa RŌNGPU’n, “Nakut kha napōn shunga da manhlut nôk roh,” ati. Ama’n khanga aleitlo, ahei keisōt nôk pha atak ralak kapōa leikaṭha jo.

⁸RŌNGPU’n ahria, “Anmani’n nang antaksen mak che’nchu a-emak leh naṭōn inlak hmakakeia khan antaksen mak che’num, hiva inkhat hinchu antaksen sik jo che.

⁹Hiva ṭōn-inlak 2 natlosō hei kapha anlataksen mak che’nchu khana naṭong hripek hei kha anrangei hnōm mak inchu Nile tuidunga tui ajing valōk inna raleia bun mathla roh. Tui kha thisen hongkachang sik,” ati.

¹⁰Tâk-kha Moses’n, “RŌNGPU, kei atir mak roh. Kei chu ṭonghri kathem hongchang hêrmak eng khana ka-hnenga ṭonghri nahei phut khana inphut um ṭonghri lathem mak eng. Kei chu ṭonghri kathem mak, a’n-êng leh a’nphalam thei mi eng kae,” ati.

¹¹RŌNGPU’n ahnenga, “Mihring bei kasyem kha tu mo? Tu mo kōr kaset leh ṭong kasōkmak kasyem kha? Tu mo khō hmuna leh hmit chona kapek kha? Khavakha RŌNGPU kei eng kae.

¹²Tûn, se roh! Ṭong hritheina sik ka’nṭangpui sik che, heimo nahri sik kamanthei sik che,” ati.

¹³Tâk-kha Moses’n amasôn, “Changmak, RŌNGPU, lungsettak a tu mo inkhat tir jo roh,” ati.

¹⁴Khava pha RŌNGPU’n Moses chunga ahnuk kana joa aheiti, “Nasō-puipa Aaron, Levi kha-e heikhonga? Ṭonghri kathem ti ke’n kamanhret. Ama tûn nang intōpui sik a kahong khana nang inhmupui sik kha inpâk sik.

¹⁵Ahnenga ṭong nahri thei khana heimo hri sik kha namanthei theia kae. Ke’n nangni 2 ṭonghri theina sik a kabôm sik chei, khana heimo tlo sik kha nan-inhnia kahri pek sik chei.

¹⁶Ama kha naṭong kahri mi kachang sik khana mipuihei hneng nang sik a ṭong ahri sik. Khava sōa, heimo hri sik kha nang in ama nahong manthei sik a kha nang in Pathen nahongpō sik.

¹⁷Nang in hiva khōnghre hi inchoi roh; ajârchu hin vâng hin ṭōn-inlak natlosōt sik kae.”

¹⁸Khava sōa Moses aterpu Jethro hneng inle jo, ahnenga ati, “Lung-settak a kei Egypt a ka-innkōhei hneng sea alakahring hei mo aka-en sik a inle hi rong.” Jethro’n aleihnōm pek khana mathlâna chibei aleipek.

¹⁹Midian ram a Moses a-omlai khan RŌNGPU’n ahnenga, “Egypt a inle roh, ajârchu nang that sik a anikatup hei kha kathisō jo hei,” ati.

²⁰Khava jâra Moses’n anuhmei leh asahei shakōrtung amanchōng heia, Egypt kajōna kase jo hei, Pathen in achoi sik a amanthei khōnghre kha aleichoia kae.

²¹RŌNGPU’n Moses hneng ahri nôk, “Nang tûn Egypt a inle sik jo che, tlosōt theina sik ratha kapek jo che, ṭōn-inlak rakip hei kha rengpa ângshunga tlo-nger roh. Kha’num rengpa amalung kamanngar pek sik, mipuihei kha manse mak hei ning.

²²Khava pha RŌNGPU, Ke’n hinga ati tia ahnenga hripek roh, “Israel kha kasapa a’nte hma inkeipen kae.

²³Kei anikamuk theina sik a kasapa kha masō roh tia nahnenga kaleihri, tâk nang hnōm mak che. Tûnchu ke’n nasapa a’nte hma-inkei kha kathat sik kae.”

²⁴Egypt jōnna hlam a anrephōr hmun a khan RŌNGPU’n Moses kha ale’ntōpuia that sik a aleitlo joa kae.

²⁵Khava pha anuhmei Zipporah khan, hlung kangei inkhat vâng asapa vun atanpek a, Moses ke kha khan vâng khan aleitôn pek a kae. Vuntan rōi jâra khan amanu’n Moses hneng, “Nang hi thisena kapuise che kae,” ati. Khava jâra RŌNGPU’n Moses hringkhō kha aṭhensōt pek a kae.

²⁷Khava lai khan RŌNGPU’n Aaron hneng, “Moses inhmupui sik a nêrdi ramhânga son se roh,” ati. Khava jâra tlâng inthenga ama inhmupui sik a leikase; ama a’ntōpui pha amajôp jo.

²⁸Khava sōa Moses’n Aaron hneng RŌNGPU’n Egypt a inle roh atilaia aleihri hei kha amanthei jo; RŌNGPU’n tlosōt roh tia ṭong aleipek ṭōn inlak-hei chungchânga amantheisa jo.

²⁹Khava jâra Moses leh Aaron Egypt a kase heia Israel hlamkakeihei seng kha anbek mantûp jo hei.

³⁰RŌNGPU’n Moses hnenga aleihri pek ṭong rakip hei kha Aaron in amanthei jo hei, khana Moses’n ṭōn-inlak rakip mihei hmaikunga atlosōt jo.

³¹RŌNGPU’n anhnenga ajōng phâk heia anmani mihe’n heituk êng kasetak a antatlo manrim hei mo ti kha avahmu jo ti ṭong kha anthei pha anmani’n anleitaksen jo, anmani inkun heia ankamuk jo.