Read Komrem SŌKSŌT 40 Bible Online

SŌKSŌT 40 - Komrem bible

SŌKSŌT 40

¹RŌNGPU’n Moses hneng ahri,

²“Thla ahma inkeipena kani ahma inkeipen ning RŌNGPU omna Pōn-inn kha matungsōt roh.

³Ashunga khan Ṭongpek Sôm omna Intepna Bôm kha da roh khana ahmating khan pinden kha zâr roh.

⁴Dokhâng kha heichoi roh, achunga hmangchâk-hei kha da hei roh. Thaihmei matungna kha’m heichoi roh, achunga khan thaihmei hei kha damantōk roh.

⁵Marim katui ro mankhutna sana maichâm kha Intepna Bôm hma khan da roh khana Pōn-inn honghlutna tak a khan pinden makhei roh.

⁶Pōn-inn hmatak a khan romanvâm inthoina maichâm kha da roh.

⁷Thlengkông kha Pōn-inn leh maichâm kâra khan tui mansiptak ina da roh.

⁸Akimvea akur khumna hei kha matung roh khava ahong hlutna khan pinden makhei roh.

⁹“Khava sōa Pōn-inn leh ashunga hmangchâk rakip kha a’ntheng thaitui kano hei ina tōksōt hei roh, khan chu intheng sik jo hei.

¹⁰Abâna, maichâm leh ahmangchâk heirakip kha’m thai intheng kano hei ina tōksōt roh, khan chu pui katluk a intheng sik jo hei.

¹¹Insina thlengkông leh amatungna kha’m khanga mantheng ina tōksōt roh.

¹²“Aaron leh asapahei seng kha Pōn-inn hlutna khan heiṭhōi hei roh, rōi inkhat a an-insina sik hripek hei roh.

¹³Aaron kha thempu von kha manvon roh, thai kano roh, thempu inkhat a kasepa arazen theina sik khang’khan sukmantheng roh.

¹⁴Asahei kha heiṭhōi hei roh, anzakkō manhak hei roh.

¹⁵Khan chu anpa thaitui nakano kapōa, anmani kha’m thai kano hei roh; thempu kapōa kasepa antlo theina sik a. Hiva thai kano hin anmani ahei tik a thempu amanchang sik jo hei kae.”

¹⁶RŌNGPU’n ṭong apek kapōhrep a Moses’n heirakip atlo jo.

¹⁷Khang’khan Egypt anhong dahlona kum 2 changna thla hma inkeia kani hma-inkei ning RŌNGPU omna Pōn-inn kha anlei matungsōt a kae.

¹⁸Moses’n akacho matungna hei ada heia akekim hei amatung jo hei, abang rape amansur jo hei.

¹⁹RŌNGPU’n Moses ṭong aleipek kapōa, Pōn-inn chunga amakhuna amazer jo, khava chunga avâng intong makhuna kha ada jo.

²⁰Khava sōa hlungpek 2 kha aloa Intepna Bôm shunga khan ada jo. Bôm a akōr insyema khan sungtlōn hei kha anmando khana asingna vâng achung kha asing jo.

²¹Khava sōa khava bôm kha Pōn-inn shunga khan ada manhlut a pinden amakhei khum jo. Khang’khan khava Intepna Bôm kha RŌNGPU ṭongpek dungjuia a-en mantōk joa kae.

²²Dokhâng kha Pōn-inn shunga ada jo, sak intonga pinden vângting khan,

²³khava chunga RŌNGPU ṭongpek dungjuia RŌNGPU hneng a’ntōk buhlom kha ada jo.

²⁴Thaihmei kung kha Pōn-inn shunga ada jo, dokhâng kha leh inhngetchak a, thlâng intong panga.

²⁵Khana khan RŌNGPU ṭongpek dungjuia, RŌNGPU omna khan thaihmei adet jo hei.

²⁶Sana maichâm kha Pōn-inn shunga ada jo, pinden hmatak a khan.

²⁷RŌNGPU ṭongpek dungjuia, khava hmun a khan marim katui aro mankhut jo.

²⁸Pōn-inn hlutna kot kunga khan pinden amakhei jo,

²⁹khava pinden hmatak a khan ro-inthoina maichâm kha ada jo. Khava chunga khan RŌNGPU ṭongpek dungjuia ro-inthoina leh kara inthoina atlosōt jo.

³⁰Pōn-inn leh maichâm kâra khan thlengkông kha tui kasiptak a ada.

³¹Moses, Aaron, khana asahei kha khana khan ankut anke ansôp

³²RŌNGPU ṭongpek dungjuia, Pōn-inn leh maichâm anhlut sik kataia ansôp ri.

³³Moses’n Pōn-inn leh maichâm akimvea akakurna kha amatung jo, akakurna hlutna kot kunga khan pinden kha amakhei jo. Khang’khan ṭōn rakip atlosō jo.

³⁴Khava sōa Pōn-inn kha sumtuk in amakhusi jo khana RŌNGPU omna vâr kadi rik-rak kha kasip jo.

³⁵Khava jâra khan Moses kha Pōn-inn shunga hlut tor mak jo.

³⁶Pōn-inn chunga sumtuk kha a’nhliksōt pha leh rōk Israel sahei khan an-omna hmun kha inthon ri heia kae.

³⁷Khana khan sumtuk kha a-omlai seng anṭhumhmun kha thonmak hei.

³⁸Ankhōhme hlam hro kârseng, RŌNGPU ka-om kha sûn leh sumtuk hloma jân leh hmei hloma Pōn-inn chunga aka-om kha anmani’n anleihmu.