Read Komrem SŌKSŌT 6 Bible Online

SŌKSŌT 6 - Komrem bible

SŌKSŌT 6

¹Khava sōa RŌNGPU’n Moses hneng, “Tûnchu rengpa hneng heimo katlo ti kha nang in nahmu sik jo. Kamihei aman sesōtna sik hei ke’n ama rumhrat a katlo sik kae. Kadiktak a ama’n aram shunga inphut anmani ahnong sōtna sik hei rumhrat a katlo sik,” ati.

²Pathen in Moses a’nbekpuia ahri, “Kei RŌNGPU eng kae.

³Kei Abraham, Isaac leh Jacob hneng Chunghnung Pathen inkhat a le’nlâr eng, tâk ke’n anmani hneng karahming intheng RŌNGPU hi manthei mak hei eng.

⁴Khōhme kapōa anleiomna Canaan ram kha kapek sik hei tia ke’n anmani leh intepna kha’m kaleinei jo.

⁵Tûn ke’n Egypt hei sōk hmang hei Israel sahei inkōi rasa kathei jo, khana ke’n kale’ntepna kha kahong mandonsōt jo.

⁶Achang jâra kaṭong hi Israelhei hneng hripek heiroh, “Kei hi RŌNGPU eng kae; ke’n nangni kahuk sik chei, Egypt hei hneng nansōk changna inphut ning leh hnōma kamasō sik chei. Ke’n kabân rathahrat kakalânga anchunga ṭit ka-om tak karâkna kapek sik hei, khana ke’n nangni kahuk sik chei.

⁷Ke’n nangni hi kei khet mi sik a kasyem sik chei, khana kei nan-Pathen kachang sik eng. Nangni Egypt a nansōk changna inphut kamasōsōt chei pha kei hi RŌNGPU nan-Pathen kachangna nanmanhret sik eng.

⁸Ke’n Abraham, Isaac leh Jacob hei hneng pek sik a kalei intepna ram a khan nangni kaṭhōi sik chei; khana khavakha nanta-akachang sik a kapek sik jo chei. Kei RŌNGPU eng kae.”

⁹Moses’n hivahi Israelhei hneng ahri pek hei, tâk aṭong hri kha leirangei pek mak hei, ajârchu êngkase mihei sōk changna thōia anmalung kakōisō joa kae.

¹⁰Khava sōa RŌNGPU’n Moses hneng,

¹¹“Se roh khana ama’n Israelhei kha aram amandahlon nger sik hei kae tia Egypt rengpa hnenga vahri roh,” ati.

¹²Tâk-kha Moses’n amasôn, “Israel-hei kapha’m kaṭong rangei mak hei ning, Rengpa hrep chu heisik a mo arangei sik? Kei chu hing’hin ṭonghri kathem mak eng kae.”

¹³RŌNGPU’n Moses leh Aaron ṭong apek heia, “Egypt ram a inphut Israelhei kaṭhōisōt sik a ke’n nangni ṭong kapek chei ti hi Israelhei leh Egypt renghei hneng vahri ruh,” ati.

¹⁴Jacob sapa upapen Reuben in sapa 4 aleinei hei: Hanoch, Pallu, Hezron, khana Carmi; anmani hei hi anrahming et karôn phunghei pusōnhei kae.

¹⁵Simeon in sapa karuk aleinei hei: Jemuel, Jamin, Ohad, Jachin, Zohar, khana Shaul, Canaan jōrnu sapa hi kae; anmani hei hi anrahming et karôn phunghei pusōnhei kae.

¹⁶Levi’n sapa 3 aleinei hei: Gershon, Kohath, khana Merari kae. Anmani hi anrahming et karôn phunghei pusōnhei kae. Levi hi kum 137 kahringa kae.

¹⁷Gershon khan sapa 2 aleinei hei: Libni leh Shimei kae, anmani sōn katamtak anleinei hei.

¹⁸Kohath in sapa 4 aleinei hei: Amram, Izhar, Hebron, khana Uzziel kae. Kohath hi kum 133 kahringa kae.

¹⁹Merari hin sapa 2 aleinei hei: Mahli leh Mushi kae. Anmani hi ansōn anpârhei leh Levi phunghei kae.

²⁰Amram hin apa sernu Jochebed a-ompuia Moses leh Aaron hi amatet pek hei. Amram hi kum 137 kahringa kae.

²¹Izhar in sapa 3 aleinei hei: Korah, Nepheg, khana Zichri kae.

²²Uzziel hi’m sapa 3 aleinei hei: Mishael, Elzaphan, khana Shithri kae.

²³Aaron in Amminadab sanu khana Nahshon sernu Elisheba a-ompui. Amanu hin Nadab, Abihu, Eleazar khana Ithamar anei hei

²⁴Korah in sapa 3 aleinei hei: Assir, Elkana, khana Abiasaph hi kae. Anmani hi Korah phung bâk-hei pusōnhei kae.

²⁵Aaron sapa Eleazar in Putiel sanu inkhat aleiompui, ama hin Phinehas amatet. Anmani hi Levi phung shunga innshung upahei kae.

²⁶“Egypt a inphut Israel jât-hei ṭhōisōtna sik a hlam kei hei ruh,” tia RŌNGPU’n ṭong aleihrina hei kha Aaron leh Moses hei hi kae,

²⁷Egypt rengpa hnenga Israelhei masōna sik ṭong avakahri hei kha anmani kae.

²⁸Egypt ram a RŌNGPU’n Moses hneng ṭong ahri pha,

²⁹ama’n, “Kei RŌNGPU eng kae. Ke’n kahri pek che rakip kha, rengpa hneng vahri pek roh,” ati.

³⁰Tâk-kha Moses’n amasôna, “Kei ṭonghria akatlasam eng inkhat kachang hi namanhret; heisik a mo rengpa’n kaṭong arangei sik eng?” ati.