Read Komrem SŌKSŌT 8 Bible Online

SŌKSŌT 8 - Komrem bible

SŌKSŌT 8

¹Khava sōa RŌNGPU’n Moses hneng, “Reng hneng se roh khana manthei roh, RŌNGPU’n hinga ati, ‘Kami he’n ankamuk theina sik eng, anmani mansesōt heiroh.

²Nahnōm mak inchu, ke’n naram shunga uṭok kamansip a karâkna kapek sik che kae.

³Nile tuidung kha uṭok hongkasip sik khana tuidung kha anhong dahlona na-innpui, najena den, najekhum, naṭōn karônhei inn leh namipuihei inn, khana naratap leh nabuhlom syemna khângbe hei kasip sō sik hei.

⁴Khahei kha nachunga, namipuihei leh naṭōn karônhei chunga kachōng sik hei,’ vati roh,” ati.

⁵RŌNGPU’n Moses hneng, “Aaron kha akhōnghre kha tuidung, tuikhông, khana, tuikhurhei chunga ava kalekna sik manthei roh, khana uṭok hei kha hongsōk hei sona Egypt ram shung hlōsō hei rasoh,” ati.

⁶Khang’khan Aaron in tui rakip chunga akhōnghre ahei kalâng jo, uṭok hong kasōk heia Egypt ram kha anhlōsō jo.

⁷Tâk-kha hmitphedôi kathem he’n dôi anhmanga anmani’num uṭok ansyema ram kachâra heikasōk hei.

⁸Rengpa’n Moses leh Aaron abek heia, “Hiva uṭok hei hi alosōtna sik RŌNGPU hneng der ruh, khana nanmi he’n RŌNGPU hneng inthoina anneitheina sik kamansesōt sik jo hei,” ati.

⁹Moses’n amasôna, “Nang sik a der sik hi inpâk eng. Nang leh naṭōn karônhei leh namipuihei sik a kader pekna sik chei pha kha tep roh. Khava sōa chu uṭok hei kha hmumak jo tin che, khana Nile tuidunga tei loa heite om mak jo hei ning,” ati.

¹⁰Rengpa’n amasôn, “Jîng kania aderpek roh.” Moses’n ati, “Nangekna eng dungjuia katlo sik, khava pha RŌNGPU kan-Pathen tei loa Pathen alak tûte om mak ti kha nang in namanhret sik jo.

¹¹Nang leh naṭōn karônhei, khanna namipui he’n uṭok hmumak jo tin chei, Nile tuidunga tei loa heite inhmu mak jo ning,” ati.

¹²Khava sōa Moses leh Aaron in rengpa andahlon jo, khana RŌNGPU’n rengpa chunga uṭok amasō hei kha alosōtna sik Moses’n ader joa kae.

¹³RŌNGPU’n Moses derna dungjuia atlopek jo, khana uṭok hei kha innshunga, telaia, hleipuk heia kathisō jo hei.

¹⁴Egypt he’n uṭok kathi hei kha abuk kalen tatak a anchom mantûp hei, aram kha anmarim kasip phet jo.

¹⁵Rengpa’n uṭok kathisō jo hei ti ahmu pha, RŌNGPU’n aleihri kapōa amalung kangar nôk jo, Moses leh Aaron tahri kha rangei nôk mak jo.

¹⁶RŌNGPU’n Moses hneng, “Aaron hneng manthei roh, akhōnghre vâng khan ralei kha vōk rasoh, Egypt ram pumpuia vaiphin khan thōidi hongkachang sik hei,” ati.

¹⁷Khava jâra Aaron in akhōnghre vâng ralei kha avōk jo, khana Egypt ram vaiphin rakip kha thōidi hongkachang jo, khahei khan mihei leh ranhei anhong katōm jo hei.

¹⁸Hmitphedôi kathemhei khan andôi vâng thōidi masōna sik antlo, tâk tor mak jo hei. Hmun rakip a thōidi leikasip sō jo.

¹⁹khana hmitphedôi kathem he’n reng hnenga anhria, “Hivahi Pathen tatlo kae!” anti. Tâk-kha rengpa kha amalung kangara kae, RŌNGPU’n aleihri kapōa, Rengpa khan Moses leh Aaron tahri kha heite rangei mak a kae.

²⁰RŌNGPU’n Moses hneng ahri, “Jîngkâr hmatak se ina rengpa kha tuidunga asena hong inhmupui roh, khana RŌNGPU’n hinga ati, ‘Kami he’n ankamuk theina sik eng, anmani mansesōt heiroh.

²¹Nahnōm mak inchu, gîkna kapek sik che kae, ke’n nang leh naṭōn karônhei khana namihei chunga mathōi kajōng tira karâkna kapek sik che Egypt hei inn rakip mathōi akasip sik kae, khana ralei hi antadapsō sik kae.

²²Tâk-kha kamihei omna Goshen chu kaṭhen sik, mathōi man om mak ning. Hiva ram a RŌNGPU ke’n ṭōn katlo ti hi manhretna sik hivahi katlo sik kae.

²³Ke’n kamihei leh namihei kâra kakhōiṭhen sik hei kae. Hiva ṭōn-inlak hi jînga kasōk sik jo,’ vati roh,” ati.

²⁴RŌNGPU’n mathōi katamtak reng-innpuia khana aṭōn karônhei inna ahei tir jo hei. Egypt ram pumpui kadâpsō hêr sik ajōngtir jo hei. Egypt ram pumpui mathōi in anhong manhmangsō jo.

²⁵Khava sōa reng in Moses leh Aaron kha abek heia, “Se ruh, hiva ram shunga hin nan-Pathen hneng inthoina kha vatlo jo ruh,” ati.

²⁶Moses’n amasôn, “Khanga tlo sik khachu dikmak ning, ajârchu RŌNGPU kan-Pathen hnenga kanta tōk ran vânga inthoina kha Egypt hei tahōt kachang sik. Keini’n ran kanhong hmanga antahmuna theia inthoina kanhong tloa Egypt hei malung hōimakna achang inchu, hlung vâng andenghlon sik ung.

²⁷Ama ṭongpek ung kapōtak a, keini RŌNGPU kan-Pathen hneng inthoi tōkna sik a ni 3 hlam a nêrdiram thōia akase sik ung kae.”

²⁸Rengpa’n, “Nangni ram kahlatak a nanse mak sik achang inchu, ke’n ram thōia RŌNGPU nan-Pathen hneng inthoina tōkna sik a kamansesōt sik chei. Kei sik aderpek ruh,” ati.

²⁹Moses’n, “Ke’n kadahlonsō lim che leh ke’n RŌNGPU hneng kader sik a kha jîng leh chu mathōi he’n nang leh naṭōn karônhei khana namihei andahlon sik jo chei. Tâk-kha keini hi nahōn nôk mak sik ung kae khana mipui he’n RŌNGPU hneng inthoina antatōk sik kha nakhâm mak sik hei kae,” ati.

³⁰Moses’n rengpa kha adahlona, khana RŌNGPU hneng derna anei jo,

³¹khana Moses derna kapōa RŌNGPU’n atlopek jo. Mathōi he’n rengpa leh aṭōn karônhei, khana amipuihei andahlon jo hei; inkhatbek om mak jo hei.

³²Tâk-kha hiva pha katlunga hin rengpa malung lakangara mipuihei kha mansesōt nôk mak jo heia kae.