Read Komrem JOB 1 Bible Online

JOB 1 - Komrem bible

JOB 1

¹Ram a Pathen inmuk leh ahnenga taksenthei kachang, pase arahming Job inti inkhat leika-om. Ama kha mikaṭha kae, akaṭhamak tlomakna sik insing theitak a leika-om.

²Ama’n sapa 7 leh sanu 3 anei hei,

³khana kemōng 7,000, sharîngsei 3,000, sehratche 1,000, shakōrtung 500 anei hei. Ama’n sōk hingja aneisa hei khana nisō intonga akaneipen leikachang.

⁴Job sapa he’n sâktlâng abân bâna anleitlo khana khan alak sōpui rakip kahong ri hei khana ansernu 3 hei kha anbek ṭhak hei.

⁵Revei kahnunga jîngkâr kataia, Job hmatak a kathōia asahei mantheng sōtna sik a inthoina tōkna anei ria kae. Ama’n hivahi atlo ṭhak ajârchu asahei kâra inkhat in manhret theiloa Pathen hnōisena atloa leikaset-thei tia amandona kae.

⁶Marvân ngeva he’n RŌNGPU hnenga anhong inlârna sik kani kha ahong tlung jo pha, Seitan um ankâra le’nveisa a kae.

⁷RŌNGPU’n ahnenga ader, “Heiralam mo nalatlo?” Seitan in amasôn, “Kei hinting sonting kalônle eng, raleichung hmuntina kase lele eng.”

⁸RŌNGPU’n ader, “Kasōkpa Job kha namanhret mo? Raleichunga ama kapō taksenthei kachang, akaṭha mi inkhatbek um om mak. Ama’n kei akamuk eng khana akadik mak inkhatbek tlomakna sik ama insing theitak a ka-om.”

⁹Seitan in amasôn, “Nanga inphut heikhat achen mak inchu akamuk sik che mo?

¹⁰Nang in ama leh a-innshunghei khana anei rakip nahrung hei. Atlona rakip a vâng napek, khana aranhei ram shung sipna sik katluk a napek jo.

¹¹Tâk-kha nang in ama tanei heirakip hi nalosōt pek inchu, nahmai kungtak a ahâksêr sik chea kae!”

¹²RŌNGPU’n Seitan hneng, “Kaṭha jo, ama tanei rakip nang ratha neina thōia ka-om jo, tâk-kha Job chu natôn mak sik kae do,” ati. Khava sōa Seitan kha kasesōt jo.

¹³Ni khat chu Job sahe’n an-upapen inna revei antlo laitak,

¹⁴Job hnenga ṭongkarôn mi inkhat hong katlâna kae. Ama’n ati, “Keini’n sehratche vânga hlei kankhōia ka-om ung, shakōrtung he’n kanhnenga ramhânga phi ansâk a ka-om hei.

¹⁵Sōkphutrōia Sabea mihe’n anhei buhlu unga ranhei ankhenga anmarûk jo hei. Kei tei loa nasōk rakip anthatpet jo hei. Nahnenga thangkakōi sik a kei rōk hi ahei katlânsōt eng kae.”

¹⁶Aṭong hri kha achaimak hma, asōk hlop inkhat kahonga ahei hri nôk, “Maṭek jōngkatla a kemōng leh ankakhemhei ankhenga athatpet jo hei. Kei rōk hi ṭongkarôn sik a ahei katlânsōt eng kae.”

¹⁷Aṭong hri kha achaimak hma, sōk hlop inkhat um kahonga ahei hri nôk, “Chaldea rup 3 he’n anbuhlu unga sharîngsei hei kha anṭhōi jo hei, khana kei tei loa nasōk-hei kha ankhenga anthatpet jo hei. Kei rōk hi ṭongkarôn sik a ahei katlânsōt eng kae.”

¹⁸Aṭong hri kha achaimak hma, sōk hlop inkhat kahonga ahei hri nôk, “Nasapa upapa inna nasahei sâktlâng antloa ka-om hei,

¹⁹khava pha nêrdiram a inphut thlipui hong kahrâng inhlut a inn kha asêm maphûr a anmani ankhenga kathi jo hei. Nahnenga thangkakōi sik a kei rōk ahei katlânsōt eng kae.”

²⁰Khava sōa Job kha kangirsōt a inreng reia apōnsi akeihler. Alu avo mankek a raleia ahmai amakhup a katlua ka-om jo.

²¹Ama’n ahri, “Kei karōksaia hong inte eng, karōksaia kathi sik eng. RŌNGPU’n apek eng, khana tûn alosōt jo. Ama rahming kha manpâk a om rasoh!”

²²Omchen rakip aleisōk jo’num, Job in Pathen kha mô apek a setna leitlo mak a kae.