Read Komrem JOB 10 Bible Online

JOB 10 - Komrem bible

JOB 10

¹Kei kahring sik hi kadet-hla jo. Kathangkōi kakhôk hi rangei roh.

²Pathen, masetna apek mak roh. Amanthei roh! Kei dōina ṭong kha heimo kae?

³Nang in hingtuk hrep a akakhôk che hi akadik nâk mo? Nangkhet kutsyem nadonmak hi akadik nâk mo? Khava sōa mikaṭhamak-hei ṭōn mantlukna chunga namanui hi akadik tâk mo?

⁴Keini ṭōntlohei hi nahmu mo?

⁵Nang hringkhō kha keini kapōa akabong mo?

⁶Khan chu heisik a mo kasetna rakip najōngsōt hei, khana kaṭhena rakip najōngsui hei?

⁷Kei kaṭhena om mak ti, leh tûte’num nanga inphut anikasen tor sik om mak ti hi namanhret.

⁸Nakut he’n kalim leh kachâng nasyem eng, khana tûnchu khava kut khet hei khan ansuk manhmang jo eng.

⁹Matlak a inphut nasyem eng ti hi mandonsōt roh; vaiphina kahnur rabun male sik a mo namandon eng?

¹⁰Kei aninei torna sik a kapa chunga ratha naleipek; kanu nairabu shunga nahei manlen eng.

¹¹Nang in kataksa hi karu leh karatha hrui vânga naleisyem eng, khana karu hei kha taksa ravōi leh, vun vânga namakhu pek eng.

¹²Nang in hringna leh lungsetna injônjet kha napek eng, nalum lona khan kei kahringa ada eng.

¹³Tâk-kha tûnchu khava pha shung senga khan kei inhmangna sik marûk a ṭōn naleimantluk ti hi kamanhret jo.

¹⁴Nang in narangei mandam tor makna sik enga, ke’n setna katlo khâk sik mo tia na-enravet eng.

¹⁵Ke’n kaset lim bât leh nanga inphut inrimna kachenbât ri, tâk-kha ke’n akadik katlo pha leh chu manpâkna chentet mak eng. Kei hi inreng jo eng khana inzakna’n amakhu jo eng.

¹⁶Ke’n chung sōkna heikhat kavanei inchu, shabakkai kapōa nahnong ri eng; kei suksetna sik a ṭōn-inlak kapha natlosōt heia kae.

¹⁷Pha rakip a kei dōina sâkhi nada hei; kei chunga nahnuk natna kha hong inhnak chet-chet; pha rakip a avea athera buhluna sik namantluk ri.

¹⁸Pathen, heisik a mo nalei mantet eng? Tûte’n anhmumak lai eng aleikathi sik eng kae.

¹⁹Nairabua inphut thlânkhur jōn sik kha kaleiom hêrmak inchu leikaṭha chet sik.

²⁰Kahringkhō hi a’nchai kapō jo changmak a mo? Kabinga adahlon jo roh! Kapha alaka-om hi kahōia hmang jo rong.

²¹Kei inranga kase sik jo eng khana he’nle nôk mak jo ning, khava ram inthim leh inrengna hmun a khan kase sik jo eng,

²²khava inthimna, rahle leh inhmakna hmun a khan, khava vâr kapha’m a’nthimna hmun a khan.