Read Komrem JOB 11 Bible Online

JOB 11 - Komrem bible

JOB 11

¹Hiva ṭong kanimak hei seng hi tûte’n masôn mak hei ning mo? Ṭong katamtak hrina hin amandik sik che mo?

³Job, keini’n amasôntor mak hei ning tia namandon mo? Nang in na-ê sena ung khan sip katia aman omhnâm sik ung tia namandon mo?

⁴Naṭong hri hi kadik tia ka-om che; Pathen hmit-enna intheng eng tia ka-om che.

⁵Pathen in amasôn che’nchu kahōi sik kati!

⁶Ama’n singna je hi athō katam tia amanthei sik che; mihring themna’n amanhret tor mak, a’nthuk hêr neinâk hingja ka-om hei. Nathōk sik rahōi kasōk kanek a katla det a Pathen in akarâk che kae.

⁷Pathen lenna leh ahratna kha nang ahmor leh arichin kha nahmu tor mo?

⁸Pathen sik a chungvân so abângna changmak, tâk-kha nang tlungtorna rekhat a khavakha ka-oma kae. Pathen in kathiram kha amanhret, tâk-kha nang chu manhret mak che.

⁹Pathen lenna chu raleichung kanek a arōng kalen chet, tuipui kanek a avai kalen chet.

¹⁰Pathen in nang asur chea ṭongtan hmun a aṭhōi che’nchu tu mo ama kakhâm sik?

¹¹Pathen in hnemna kasehei kha tuhei mo ti amanhret, anṭōntlo kaṭhamak rakip ahmu sō.

¹²Mikamo he’n insingsak anphut sik, ram a shakōrtung dôn sik a a’nte hei kapōa.

¹³Job, namalung mandik roh, Pathen hneng hlut roh.

¹⁴Akaṭhamak leh akadik mak na-inna inphut hlonsōt roh.

¹⁵Khava sōa vânhnōi hi kahnet leh kangamtak a avea intōpui roh.

¹⁶Khan chu nachâmna rakip namahngi pet sik jo, akathlengsa tuilen kapōa avea mandonna om mak jo ning.

¹⁷Nahringkhō kha Sûnṭim laia kanivâr kanek a kavâr chet sik, hringkhōa a’nthimpen phahei kha jîng khōvâr kapōhrep a kavâr sik.

¹⁸Inhukna leh inhōrna kasip a ka-om sik che; Pathen in ahrung sik che khana châmhngatna apek sik che.

¹⁹Nakadōihei ṭitmak jo tin; mi katamtak in inṭangpui kader sik a nahnenga kahong sik hei.

²⁰Tâk-kha mikaṭhamak-hei khachu kachâm renga khō anthlir lele sik khana inpesōtna sik ahlam om mak ti kha anmanhret sik jo. Anmani inhōrna inkhat rōk khachu thina ahong katlung sik kha kae.