Read Komrem JOB 14 Bible Online

JOB 14 - Komrem bible

JOB 14

¹Eini nikhenga akatlasama leh inthōpui kasea jōng injōr me. Mi rakip akatoi leh inrengna hringkhō kha nisor et.

²Reipâr kapōa hong kakhang mea inranga invōi ri mea kae; daihlim kapōa inhmang bât ri me.

³Pathen, nahei en sik nâk eng mo, achangmak leh enmansinna leh ṭong tanna nanei sik eng mo?

⁴Mihring a’nthengmak kapōa heite inkhat a inphut a’ntheng kha heisōk tor mak.

⁵Anhringkhō seina kha hma a inphut mantluksa jo kae, anhringna sik kani leh thla hei anja katlunga. Nang in namantluksa jo kae, inthleng tor mak ning.

⁶Anmania inphut inhe roh, anbinga dahlon hei roh; Antora achang inchu anchâmna hringkhō kha kahōia hmang hei rasoh.

⁷A’ntuktan jo thingkung chunga’m inhōrna ka-om; hongkahring nôk thei khana hong indôn nôk theia kae.

⁸Arajung kha ater jo’num khana akungmui kha raleia athi jo’num,

⁹khōtui ahei sûr pha thingdông kapōa adôn heikasōk sik.

¹⁰Tâk-kha mihringhei chu kathi hei khana khavakha an-inchaina kachang jo; anmani kathihei, khana khava sōa khon mo aka-om jo hei?

¹¹Akatlân mak jo tuidunghei kapōa khana akachâr jo thampui hei kapōa

¹²mihring kha kathihei, area akathō mak sik a. Chungvân kha a-om kârseng anmani thōitet mak jo hei ning; anjena inphut avea hong inthing mak jo hei ning.

¹³Akathihei ram a nathup sik enga kamadu; nahnuknat kha abângmak kârseng athup roh, khana khava sōa kei mandonsōtna sik pha inkhat ṭhensōt roh.

¹⁴Mihring in anthi’nchu, alahong kahring nôk sik hei mo? Tâk-kha kei chu pha kaṭha kalahngâk sik, khōdeng theina pha hi a’nchaimak kârseng.

¹⁵Khava sōa nang in nabek sik eng, khana ke’n kamasôn sik che, khana nakutsyem kei chunga namalung katlâi sik jo.

¹⁶Khava sōa kakethon rakip a na-ensui sik eng, tâk-kha kasetna hei chu atei pek mak jo che ning.

¹⁷Khahei kha narangei mandam enga natetsōt pek sik eng; kaṭhena rakip hei kha nang in nahnisō pek sik eng.

¹⁸Tlânghei tlâksukna sik pha kahong jo khana kare hlungpum hei inthonna pha kha kahong jo.

¹⁹Tui in hlungpuihei asuk manṭhum sik, khō rahnak a akasûr khan ralei atlensōt sik; khava kapōa kan-inhōrna kha nasuk manset heia kae.

²⁰Nang in mi inkhat kha natora, are-rea sik a natirsōt; thina khan ahmai kha amahe pek a kae.

²¹Asapa he’n kajana anchen, tâk-kha ama’n chu heite manhret tet mak, anhmai amôk phale’m ama’n heite hrimak a kae.

²²Ama chu abing taksa nat rōk kha amanhret khana amalung châmna rōk kha ahmu.