Read Komrem JOB 17 Bible Online

JOB 17 - Komrem bible

JOB 17

¹Kahringkhō inchaina sik hi hong kahnai jo. Kakaphuk sân tlungtor mak jo; thlânkhur tei loa kei sik alak heite om mak jo.

²Mi rakip in heituk a êng kasetak a antamanuisō eng mo, ka-en hnâm jo.

³Pathen, kei chu kamalung intheng. Kaṭong hi alopek roh. Kei ṭonghri ani kabôm sik a tûte inkhat om mak jo.

⁴Nang in anmandonna kha nakhâr pek jo hei; tûnhin kei chunga anmani torna mannei mak hei roh.

⁵Ṭongchîk marōa mi inkhat in sêr jâra aloihei aleihōn hei, khana asa he’n khava jâra inrengna thōkna annei.

⁶Tûnchu mihe’n hiva ṭongchîk hi kei hneng anhmang jo; anmani kahong heia kahmaia anmachi thlōn jo eng.

⁷Kamalung inrimna khan kahmit amancho vet jo; Kakut bân leh kake hei hi rahle kapōhrep a kakong jo hei.

⁸Malung intheng ung kati hei kha anmalung atôn joa, ankhenga kei hi Pathen kaneimak tia anmaset jo eng.

⁹Kajathei ung kati hei khan anmani kadik ung tia indon chet-chet jo hei.

¹⁰Tâk-kha anmani ankhenga kahma anhonga anngir inchu, anmani inkhatbek mikasinga hmumak hei ning.

¹¹Kakanikhō hong katlang jo; kaṭōn mantluk rakip hmesōna om mak jo; ka’nhōrna rakip um hong katlang jo.

¹²Tâk-kha kaṭhōn he’n jân kha sûn vâr anti; vâr kha hong kahnai jo anti, tâk-kha inthima ka-om eng ti hi kamanhret a kae.

¹³Kei inhōrna inkhat rōk khachu kathi kha kae, inthima kajena sik hmun rōk kha kae.

¹⁴Thlân kha kapa tia ke’n kabek sik, rahlung anikasâk sik hei kha kanu leh kaser hei tia kabek sik hei.

¹⁵Kei sik a khon mo inhōrna alaka-om? Tu’n mo ahmu sōt aka-om?

¹⁶Thina raleichunga kase phat a inhōrna khan kei leh asepui mak jo ning.