Read Komrem JOB 2 Bible Online

JOB 2 - Komrem bible

JOB 2

¹Marvân ngeva he’n RŌNGPU hmaikunga anhong nôkna sik kani ahong tlung jo pha, Seitan um ankâra le’nvei.

²RŌNGPU’n ahnenga ader, “Nang khon mo avakase che?” Seitan in amasôn, “Kei hinting sonting kalônle eng, raleichung hmuntina kalôn lele eng.”

³RŌNGPU’n ader, “Kasōk, Job kha namanhret mo? Raleichunga ama kapō taksenthei leh akaṭha inkhatbek om mak. Ama’n kei akamuk eng khana akadik mak tlomakna sik a insing theitak a ka-om.”

⁴Seitan in amasôn, “Mi inkhat in kahringa omtheina sik a heirakip amasōtor sik.

⁵Tâk-kha tûnchu nang in ataksa namantôn inchu ama’n nahmai kunga ahâksêr sik chea kae.”

⁶Khava jâra RŌNGPU’n Seitan hneng ahri, “Kaṭha jo, ama kha nakut chunga kapek jo che, tâk-kha thatchu nathat mak sik kae.”

⁷Hivasōa Seitan khan RŌNGPU hmaikunga inphut kasesōt jo, khana Job taksa pumpuia khōihli nat heikasōk jo.

⁸Job in akabōk anhlonna khan kasea behar aloa anat akahōttan heia kae.

⁹Anuhmei in ahnenga ahri, “Tûn kapha’m taksenthei lakachang ṭhak che, changmak che mo? Heisik a mo Pathen kha nahâksêr mak khana akathi mak che?”

¹⁰Job in amasôn, “Nang in akae makjen nahri! Pathen in akaṭha hei kha apek me pha, inpâk a nirahlâng. Ama’n inrengna ahei tir pha, heisik a mo a’nphin sik me?” Job in inrengna heijalai aleide inum Pathen dōina ṭong heite leihri mak.

¹¹Job ṭhōn 3 hei kha Teman khōpuia inphut Eliphaz, Shuah ram a inphut Bildad, khana Naamah ram a inphut Zophar hei hi kae. Job in khangtuk hrep a khōdeng athei jo kha anthei pha, anmani khan ahnenga vasea lungmōng thlâk sik a intluk jo hei.

¹²Anmani’n kahlajap a Job kha anheihmu, tâk ahme kha manhret tor mak jo hei. Anhei manhret pha, anmani ṭajai ansuia kaṭap jo hei, inrim heia anpōnsi ankeihler hei khana thli chunga leh anlu chunga vaiphin ankathek thlōna kae.

¹³Khava sōa ama leh raleia sûn 7 leh jân 7 ṭong heite hriloa le’n ong hei, ajârchu ama kha heituk a a’nreng jo mo ti kha anmani’n anhmua kae.