Read Komrem JOB 21 Bible Online

JOB 21 - Komrem bible

JOB 21

¹Kei tahri hi rangei roh; ke’n kader che lungngamna kha hivahi kae.

³Ke’m ṭong hrina sik pha apek roh, khava sōa kahrisō tak leh natlo hnōm inchu amanuisō jo roh.

⁴Kei ta’nnâkpui hi akathithei hei leh changmak; ke’n dehlana kanei hichu ajâr akaṭhatak ka-om.

⁵Kei a-en roh. Malung katôna kadai hngera na-en eng hi latluk mak chea mo?

⁶Kei hnenga akasōk hi kamandon phat a, kakaphuk insam eng, innok eng khana inthing eng.

⁷Mikaṭhamak-hei hi Pathen in heijâra mo aman om hei, amankhang heia amanhao hei?

⁸Anmani’n tu leh sa annei hei, khahei hong kalen kha an-enna kahring hei.

⁹Pathen in an-innshunga khōdengthei man om pek mak hei; anmani ṭit inpirpuma om hêrmak hei.

¹⁰Ôk, anmani ran he’n te anneipek hei, inrengna omloa te annei hei.

¹¹Kemōngte kapōa ansahei katlân heia indei hei

¹²khana bunglir leh pengkun mahringa kalâm hei.

¹³Anhringkhō kamōng tak a ka-om hei thōk hlana omloa kadai hngera kathihei.

¹⁴Mikaṭhamak he’n Pathen hneng anbinga amasō heina sik ander, anhringkhō shunga Pathen lungdo manhret hnōm mak hei.

¹⁵Anmani’n Pathen razen sik hi rangei mak khana ahnenga derna hi ahnemna om mak tia anmandon.

¹⁶Anmani’n anrahnak tlo vâng rōk a hme ansō anti, tâk-kha anmani mandonna hichu ke’n hnōm tor mak eng.

¹⁷Mikaṭhamak-hei vâr kha antahipthat phung jo mo? Ankâra inkhat in khōdengthei aratō jo mo? Pathen in mikaṭhamak-hei kha hnuknat a akarâk jo hei mo?

¹⁸Achangmak leh thli tatlen sapôt kapōa atlensōt jo hei mo, khana thlipui kahrâng in achoisōt vaiphin kapōa achoisōt jo hei mo?

¹⁹Apa setna jâra Pathen in asa chunga karâkna apek nanti. Kha changmak! Mikaset-hei kha Pathen in karâk hei rasoh; ansetna jâra karâkna apek hei kae ti kha malâr rasoh.

²⁰Mikaset he’n anchunga karâkna kha inrôn hei rasoh; Akahratpen Pathen hnuk natna kha anmani’n manhret hei rasoh.

²¹Nihringkhō hi a’nchai pha leh, nisahei a’npâk hei mo ti hi eini’n takkhet a nimandon mo?

²²Hmun inshânga aka-om hei kapha ṭongkatan Pathen kha, mi inkhat in amanthei tor sik mo?

²³Mi ṭhahrep chu anthi mak kârsenga taksa kadam senga ka-om hei; inpâktak leh kayâng senga kathihei, antaksa hei kha anmanṭhat hei.

²⁵Ṭhahrep he’nchu akahōi inti hi chenhêr mak hei; malung inrengtak a kahring hei khana kathihei.

²⁶Tâk-kha mi rakip in-angtlinga kathi hei khana invûm hei; ankhenga rahlung in akatōm sō hei.

²⁷Nang in heituk mater ka-om mandonna nanei mo ti hi kamanhret.

²⁸Nang in nader, “Tûnchu mikalenhei inn kha khon mo aka-om jo, khava ṭhatmak katlohei kha?”

²⁹Ramkase lele hei leh inbek mak chei mo? Anmani’n anta heirôn ṭonghei kha manhret mak che mo?

³⁰Pathen in ahnuk anat a karâkna apek ning hei khan, aṭhensōt hei khachu mikaṭhamak rōk hei kha kae.

³¹Mikaṭhamak-hei themmô kapek tor tûte om mak, achangmak leh anmani tatlo jâra kut inletor tûte om mak.

³²Anmani thlâna anṭhōi hei pha kaṭhatak a antahrung thlân heia khan,

³³mi lishing lishing in ankahre sik a injôk a inveisa hei, khana ralei inum kadai hngera amanje hei.

³⁴Khana nang chu! Akae makjen vânga lungngamna nathlâk eng! Nata masôn eng rakip hi maleisei rōk kae!