Read Komrem JOB 24 Bible Online

JOB 24 - Komrem bible

JOB 24

¹Pathen in heijâra mo ṭong tanna pha, ama sepa katlo rakip sik a ṭongdik malârna kani atep mak?

²Ram kakhe chet a chenna sik a mihe’n ramri hlung anthon hei; kemōng anmarûk a ankemōng rup kâra anṭhōi manhlut hei.

³Nu leh pa kaneimak hei shakōrtung anlo hei, khana hmeithainu sehratche kha asêrbat apek male mak kârseng ansur pek.

⁴Sarahei ratha neina kha ankhâr pek hei akaneimak hei tlânna sik leh inthupna sik a rumhrat antlo.

⁵Khava jâra sarahei kha, ram shakōrtung kapōa, ramhânga sâk kajōnga kalôn hei; khava hmun a ansahei sâk sik kha hmumak hei.

⁶Anhlei kachangmak a sâng antakhôm sik kasōk, khana mikaṭhamak-hei vomhrui kara anmanṭhōt hei.

⁷Jâna antak makhuna pōn neiloa kaje hei khōsik a inphut manlumna sik neimak hei.

⁸Tlânga khō kasûr khan amanchorsō hei, hlungpui hnenga in-ungna sik a katlân inhlut hei.

⁹Mikaṭhamak he’n nu leh pa kaneimak naipanghei kha sōk anmanchang hei sêrbat malena ansahei kha anlopek hei.

¹⁰Tâk-kha misara kha ataksa intōmna pōn kasea akalônle sik kasōk; sakhôm pha’m vonṭâm pum a akase sik hei kasōk jo.

¹¹Thai sik a olive an-ep, khana ju sik a vomhrui kha an-ep, tâk-kha anmani chu antui kahre ṭhak.

¹²Khōpui heia a’ntôn leh thi rong kati jo hei khan kaṭap hei, tâk-kha Pathen in anderna kha donpek mak hei.

¹³Vâr kahōt hei kha khan ka-om hei; khavakha anmani’n manhret mak hei khana ama ṭhōina heia juimak hei.

¹⁴Jîngkâr hmatak a mikathatpa kha kaṭhōisōt, sarahei that sik a kasōksōt, jân nôk a inru atloa kae.

¹⁵Nuhmei kahlō mi khan kani katla ahngâk a ka-om; mi’n anmanhret makna sik ahmai amakhu.

¹⁶Jân a inru he’n inn anvōkkhōi, tâk-kha sûn pha chu inthup heia vâr kha anhōt.

¹⁷Khōvâr kha anṭit, tâk-kha inthim kâra chu ṭitna neimak hei.

¹⁸Mikaṭhamak-hei kha tuikalen in atlen hei, khana anram hlō kha Pathen in ahâksêr pek hei; anvomhrui rahōnna avea semak jo hei.

¹⁹Kavur in alum leh achâr leh akajor kapōa, mikaset-hei khan akahring hei kâra inphut inhmang sik hei.

²⁰Tûnchu annuhei kapha’num mandonsōt mak hei ning; anmani rahlung in asâk sik hei khana thingkung katlu kapōa inhmang sik jo hei.

²¹Hmeithai hei kha êngset a antlo hei jâra khana sa kaneimak hei chunga lungset anmalâr mak jâra khanga kasōk sik a kae.

²²Pathen in arathahrat vânga ratha kaneihei kha amanhmang hei; Pathen in ṭōn atlo pha, mikaṭhamak kathi hei.

²³Pathen in inhuktak a amanhring thei hei, tâk-kha anchunga ahmit abâng ṭhak a kae.

²⁴Pha chomkhat sik a mikaṭhamak-hei kakhangsōt hei, tâk-kha phi kapōa chomkhat sōa invōi hei, a’n-âttan jo savui ka-ang hei.

²⁵Hinga kachang ti hi tu inkhat in ahnōm tor mak sik mo? Kei ṭong hi dikmak tia tu inkhat in ahri manchên tor sik mo?