Read Komrem JOB 28 Bible Online

JOB 28 - Komrem bible

JOB 28

¹Dangka chosōtna khur ka-om hei; sana suk manthengna hmun ka-om hei.

²Khura ṭōnkatlo he’n raleia inphut thir anchosōt Khana hlunga inphut sumsen anmanjor.

³Anmani’n a’nthimpakna kha anjongsōt. Ralei inthûkna kha anjong, Khana inthimna hmun a hlung anchosōt hei.

⁴Mihring omna inphut kahlatak a A-emak leh mihring kethon phâkna katlunga Raleia hlungkhur anchoa kae. Khana khan anbing rōk a ṭōn anvatlo, Hrui vânga inkhei inthla hei.

⁵Raleichunga sâk sik seng inra hei, Tâk-kha ralei mama khan athōiting chu Heirakip akaṭōi pet a, amanhrop pet a kae.

⁶Ralei hlunga sapphir hlung ka-om, Khana ravut kâra sana inveisa.

⁷Hmukhai in karōi khura khan hlamlen hmumak, Hmuthong in khava chunga jōng phungmak.

⁸Shabakkai, khana ṭit ka-om shahei khan Hlam kadai hnger kha jui phungmak hei.

⁹Ṭōnkatlo he’n hlung kasakpen he’m anchosōt hei, Tlâng thōi hei kha ankhôr heia kae.

¹⁰Tlâng thōia khur ancho lai khan, Hlung mankatam hei kha anhmusōt heia kae.

¹¹Anmani’n tuilōng hnâr heia ancho hei, Khana a’nthup hei kha vânga anheikeisōt hei.

¹²Tâk-kha khon mo singna kha nihmu sik? Khova hmun a mo manhretna kha a’nchû sik me?

¹³Singna inti hi akathithei mihei kâra inhmu tor mak ning; Aman kadiktak kha tûte’n manhret mak hei.

¹⁴Tui-ôngpui leh tuipui inthûk khan Singna kha khana khan inhmu mak ning anti.

¹⁵Sana leh dangka vânga rachôk thei changmak.

¹⁶A’nthengpen sana leh hlung mankatam hei khan Aman kha in-angpui tor mak hei.

¹⁷Sana kanek a aman katam, Sanaret leh likli kaṭhapen kanek a aman katam.

¹⁸Singna man hi coral, crystal, rubi hei kanek a aman katam.

¹⁹Topaz leh sana inthengpen he’n Singna man leh tekâkthei changmak.

²⁰Chu achang inchu singna kung ahnar kha khon mo aka-om? Khon mo manhret theina a’nthemchûk sik me?

²¹Ranhring he’n hmutor mak hei, Chunga va kajōng inum hmuphâk mak.

²²Kathi leh suk manramna kapha’num, Kankōr a kantathei hrep kha kae anti.

²³Pathen rōk in ahlam kha amanhret, Singna hmun a hmun kha amanhret,

²⁴Ajârchu ama’n ralei inchaina kha ahmu, Chungvân thōia heirakip ahmu sō.

²⁵Pathen in thli kha ratha apek pha, Tuipui hmun hlō sik kha atep pha;

²⁶Pathen in khōsûrna hmun, Khana khō inria sumtuk inzerna hlam kha atep pha;

²⁷Khava phatak a khan singna kha ahmua ahnemna kha a-enmansin jo kae, Ama’n achunga manchênna kha apek jo kae.

²⁸Pathen in mihringhei hneng ahri, “Singna sik, RŌNGPU kajana nantanei sik kae. Manhret theina sik, ṭhatmak kha nantadahlon sik kae,” ati.