Read Komrem JOB 32 Bible Online

JOB 32 - Komrem bible

JOB 32

¹Job khan abinga ṭhena kaneimak inkhat a a’nlo jo jâra, pase 3 hei khan masôn mak jo hei.

²Tâk-kha ahnenga akangir Elihu khachu ahnuknat inkhâmtor mak jo, ajârchu Job kha abinga indiksak a Pathen kha themmô apek joa kae. (Elihu hi Buz phung hruia Barakel sapa, Ram phungṭhen mi inkhat kae.)

³Ama hi Job ṭhōn 3 hei hneng um ahnuk leikana. Anmani’n Job masônna sik hlam hmumak jo hei, hivahin Pathen kha akadik mak apō joa kae.

⁴Ajârchu Elihu hi ankâra naipangpen kae, ama’n ankhenga ṭong anhrisō mak kârseng aleihngâk heia kae.

⁵Mi 3 he’n Job kha antamasôn tor mak kha ahmu pha, ahnuk kana jo

⁶khana ṭonghri aphut jo. Kei naipang eng kae, khana nangni upa chei kae, khava jâra kamandonna akahri sik a kaṭi eng.

⁷Ke’n kabinga hiva hichu nangni tahri hlam kasōk, upaloi chei in nansingna kha nanta hri sik kae tia kaleimandon.

⁸Tâk-kha Akalenpen Pathen rathla khan mihring hnenga akahonga singna hi apek hei kae.

⁹Mihring singna achangmak leh akadik manhretna sik a inthōpuina hi upa chang jâra changdek mak.

¹⁰Khava jâra tûn kei ṭonghri nanta rangei sik a kamadu; kamandonna kha hripek chei rong.

¹¹Nangni’n ṭong nanhrilai ke’n kaṭha karangei chei, singna ṭongrahme hri sik a nanjong pha kahngâk cheia kae.

¹²Ke’n kaṭhatak a karangei cheia nanṭhena kha kathei jo; nangni’n Job tahri ṭong hi hnōm tor mak chei.

¹³Heikhong mo singna kajongsōt ung tia nanta hri tor sik? Nangni’n nanmasôn tor mak jâra, Pathen in Job kha amasôn nger sik jo.

¹⁴Job in nangni hneng ahri kae, kei hneng hrimak, tâk-kha ke’nchu nangni tamasôn kapōa masôn hêrmak ning.

¹⁵Job, anmani ṭonghri sik neimak jo hei; nahnenga ṭong masônna neimak jo hei.

¹⁶Anmani sip anti lai hin ke’n kahngâk ṭhak sik hei mo? Anmani hi ahri sik manhret loa khan kangir jo hei.

¹⁷Changmak, tûnchu kabinga masônna kha kapek sik che, kei mandonna kha kahri pek sik che.

¹⁸Ṭong hrina sik a kahngâk hla jo. Ṭonghri loa om tor mak jo eng.

¹⁹Ke’n ṭong hrina pha kahmu tor mak inchu, juther bun mansiptak jupeng kapōk-khōi kha ka-ang sik jo eng.

²⁰Kei ngir tor mak jo eng; akaṭong sik jo eng kae.

²¹Hiva inkhena shunga ôtum neimak ning; ke’n tûte inkhat hrimanṭhat mak ning.

²²Heikhonga hrimanṭhat sik manhret mak eng, khanga katlo’nchu inrangtak a Pathen in karâkna apek sik eng kae.