Read Komrem JOB 33 Bible Online

JOB 33 - Komrem bible

JOB 33

¹Tûnchu Job, ke’n kahri sik ṭong rakip hi malung kahlut a rangei roh.

²Kamalunga aka-om kha hri sik a intluk jo eng.

³Kahri rakip hi ṭong intheng kae, akadik rōk kahri kae.

⁴Pathen rathla’n asyem eng khana hringkhō apek eng.

⁵Nator inchu amasôn roh. Naṭong maherna sik kha syem jo roh.

⁶Nang leh kei hi Pathen hmaikunga thakhat me kae, ni inhnia matlak a inphut asyem me kae.

⁷Khava jâra nang in kei naṭitna sik eng ahlam om mak; ke’n nang nam mathlâk mak che ning.

⁸Tûnchu hinga nang in nahri kha kalei thei:

⁹“Kei ṭhena neimak eng; akadik mak heite tlomak eng. Kei ṭhenakase eng kae khana setna inphut masō eng kae.

¹⁰Tâk-kha Pathen in kei chunga buhluna sik a ahlam ajong ama inrepui inkhat a atlo eng.

¹¹Ama’n kakea thirhrui akhōp pek eng; kase kahongna rakip a a-enmansin eng.”

¹²Tâk-kha Job, ke’n kahri pek che hi kae, nang naṭhe. Mihring rakip kanek a Pathen kha kalen jôk.

¹³Niṭong inphinna eimasôn mak ti jâra heisa mo Pathen kha mô napek?

¹⁴Pathen in ave-avea ahri tâk inum aṭong hri kha tûte inkhat in malung kahlut a rangei mak hei?

¹⁵Jâna mihring in anje pha rahmanga leh hmangtalâra Pathen in amanhmu hei.

¹⁶Aṭong hri kha amanthei hei, hiva ama gîkna hin anmani ṭit-inpirna annei.

¹⁷Pathen in ansetna tlo anbângna sik a, inlensakna inphut hukna sik heia ṭong kha ahri.

¹⁸Anmani ama’n suk manhmang mak hei ning; ama’n anthina sik a inphut ahuk hei.

¹⁹Pathen in natna kha ajōng tira antaksa kha amannat pek hei, khan vâng khan mihringhei kha mandikna amannei hei.

²⁰Akana mihe’n bu sâk hnōm mak hei, akatuipen sâk leh in kapha’m an-en kada.

²¹Antaksa kha heite kaemak a amanhmangsō; ansaru rakip kha nahmu tor hei;

²²anmani kha kathi raleia akase sik a ka-om jo hei.

²³Pathen ngeva lishing raja kâra inphut ngeva inkhat einihei tlohlam kasōk mandonsōtna anikape khan anmani kabôm sik a kajōng theia kae.

²⁴Ngeva khan marittak a ajōng ti sik, “Anmani masō hei roh! Anmani kha kathirama akase sik changmak hei. Anmani masōna sik a ankatlenna kha hin ka-om jo.”

²⁵Antaksa kha vōi khat hong kakhanga hong kahrat nôk sik hei;

²⁶anmani’n ander pha, Pathen in amasôn sik hei; inpâktak a Pathen kha ankamuk sik; Pathen in neinâk rakip kadik a amantluk pek sik hei.

²⁷Inkhat et in mipui hnenga ahri sik, “Kei kaset jo eng. Akadik kha ke’n tlomak jo eng, tâk-kha Pathen inchu aṭhensōt eng.

²⁸Ama’n kei kathiram sena sik a inphut ating eng, khana tûn katlung lakahring eng.”

²⁹Hiva kapō hi Pathen in ave-avea atloa kae;

³⁰mi inkhat hringkhō hi ahuk a, khana raleichunga hin kahringa omna leh hōina kha apek a kae.

³¹Tûnchu Job, ke’n kahri hi rangei roh; sip ti roh, ke’n ṭonghri hi rong.

³²Khana nang in hrihnōm heikhat nanei inchu, ke’num rangei rong; khan chu nang kadik che ti kha inpâktak a kahnōm sik eng.

³³Kha achangmak inchu sip ti inna kaṭong rangei roh, heikhonga mo mikasing chang sik ti kha kamanthei sik che.