Read Komrem JOB 34 Bible Online

JOB 34 - Komrem bible

JOB 34

¹Mihring nangni kasing chei, kalip chei; kei ṭonghri hi rangei ruh.

³Nangni’n bu nanmantam pha atuije kha nanmanhret, tâk-kha akasing ṭong chu nanrangei pha manhret mak chei.

⁴Hiva kapō mandonna hichu eini racham kae.

⁵Job in ṭhenakase eng kae ati, khana Pathen in ama mandik sik khachu hnōmpek mak.

⁶Ama’n ader, “Heikhonga mo akaṭhe akachang sik eng khana kei dikmak eng kati sik? Kei rahnak a intôn jo eng tâk-kha kei setna neimak eng.”

⁷Job kapō mi hi nangni’n nanhmu phung jo mo? Ama’n Pathen kha ahei tik a’m kajana malârmak.

⁸Ama’n mikaṭhamak-hei leh inthlopna amadu mikasehei leh inṭhōi hei.

⁹Pathen lungdo juina hin akaṭha heite heirônsōt mak ati.

¹⁰Manhretna kanei nangni, kaṭong hri hi rangei ruh! Chunghnung Pathen in akadik mak kha atlo sik mo?

¹¹Mihring ṭōntlo dungjuia ama’n tloman kha apek hei anrahōi kasōk dungjuia arazen heia kae.

¹²Chunghnung Pathen in akaṭhamak kha tlomak; tûte inkhat hnenga dikmak kha tlomak.

¹³Pathen ratha neina kha mi ṭhahrep hnenga inphut achen mo? Mi ṭhahrep he’n ralei katinta sik a ama kha antamanṭang mo?

¹⁴Pathen in hringkhō kaphuk kha alomale jo’nchu,

¹⁵akahring rakip kathisō sik hei, khana vaiphin kachang nôk sik jo hei.

¹⁶Tûnchu nansing inchu kaṭong hri hi rangei ruh.

¹⁷Akadik Pathen kha themmô nantapek mo? Ama’n akadik kha amater nantati mo?

¹⁸Pathen in vaikarônhei leh renghei kha hnemna kase ṭōn leh ṭhatmak kha antlo pha themmô apek hei.

¹⁹Ama’n vaikarônhei chunga, khana sarahei dōina sik mikahaohei chunga ôtum heite neimak, ajârchu ama’n mi rakip asyem hei kae.

²⁰Jâna mi inkhat hi hri’n adea kathi thei, Pathen in mi kha avōk mathlûk ning inhmang ri hei; ratha kaneitak hei kha’m intakna heite omloa athat tor hei.

²¹Eini kethon rakip kha ama’n a-en ravet.

²²Pathena inphut setkarôn inkhat a’nthupna sik ama sik a chu inthim kha inthimdek mak a kae.

²³Eini ama ṭongtan hmun a sena sik Pathen in pha khat atep sik kha rangei mak

²⁴Hlamkakei inkhat losōt a ahlop inkhat manṭangna sik a ama’n ṭong ajōng suina sik rangei mak.

²⁵Ajârchu anmani’n heimo antatlo amanhret anmani kha asuk malet heia akahnur heia kae.

²⁶Set karônhei kha mipui hmit hmuna akarâk hei,

²⁷ajârchu anmani’n ama kahnung juina kha kahai hei khana ama ṭongpek donmak heia kae.

²⁸Anmani’n rumhrat antloa sarahei kha Pathen hnenga anman-ông hei, inthōpuina sik a anbêrna kha ama’n athei pek hei.

²⁹Pathen in heite tlomak sik a amadu’num, tûte inkhat in manṭhe tor mak hei. Ama’n ahmaisō kha athup inchu, eini atloje manhret mak mi’n.

³⁰Rahe kase, khōvel he’n anchunga vai antarôn kha manbângna sik a jât he’n antlo themna heite inkhat om mak ning.

³¹Job, nasetnahei kha Pathen hneng naphôngsōt jo mo setna avea tlo nôk mak jo ning tia a’ntep jo che mo?

³²Naṭhena hei amalârpekna sik che Pathen hneng nader jo mo, khana ṭhatmak tlona kha akahai sik a akahnōm jo che mo?

³³Pathen ṭōntlo kha nang in namadu mak jo jâra, nang tamadu kha atlopek sik che tia nahlamrin mo? A’ndon sik kha nang che kae, kei changmak eng, heimo namandon tûnchu amanthei jo ung roh.

³⁴Mikasing inkhat inchu hivahi ahnōm nger sik; kaṭong kathei mikasing khan chu hinga ahri sik

³⁵khachu Job in themna aneimak jâra ahri kae, atahri rakip hi lothei om mak.

³⁶Job tahri rakip chunga mandonna nei ruh; mikaṭhamak inkhat kapōa ṭong ahri kha nanhmu sik.

³⁷Aset tlona chunga re tlo sik um amandonsa; eini nikhenga hmaikunga Pathen kha tuitek asea kae.