Read Komrem JOB 36 Bible Online

JOB 36 - Komrem bible

JOB 36

¹Thōk-hrat inna bongkhat khō rangei roh Pathen kahlanga ke’n ṭong kahri hi rangei roh.

³Kei manhretna hi katam; kamanhretna hi kahmang sik a kha Pathen, kei kasyempa kha kadik tia malârna kanei sik.

⁴Kahri rakip hi akadik mak heite om mak; nahmai kunga kadiktak a mikasing inkhat kha nahmu jo.

⁵Pathen kha heituk a ratha anei mo! Ama’n tûte’m heite sakloa tlodek mak; ama taman hretmak heite om mak.

⁶Ama’n set karônhei kha pha kasôttak man om mak hei, sarahei kha ahei tik a kadik a arazen hei.

⁷Mikadik-hei kha ahrung hei; anmani kha reng kapōa vai amanrôn hei, ahei tik a kajana amanchen hei.

⁸Tâk-kha mihei kha thirhrui vâng ankhit he’nchu, anṭōntlo jâra inrengna kha anchen inchu,

⁹Pathen in ansetna leh an-inlensakna kha amalârpek heia kae.

¹⁰Akaṭhamak a inphut anhong inlena sik a ama gîkna kha anrangeina sik a atlo kae.

¹¹Anmani’n Pathen ṭong kha anjuia asepa antlo’nchu, anmani kamōnga kakhanga ka-om heia kae.

¹²Achangmak inchu, anmani heite manhret loa kathi sik hei, thina raleia kavadung kha re anrakan a kase sik hei.

¹³Khava khōvelhei kha pha rakip a anhnuk kana, karâkna anpek he’num, inthōpuina sik a derna neimak hei.

¹⁴Naipang changlai kathihei, hmaimôkna hringkhōa invōia ka-om hei.

¹⁵Tâk-kha Pathen in mihring hi khōdeng theina vânga mansena anei hei inrengna hi anhmit mahlangna sik a ahmanga kae.

¹⁶Pathen in inrengna inphut akeisōt che, khana inhukna apek che; nadokhâng kha sâk leh in amanbukpek che.

¹⁷Tâk-kha tûnchu narahōia karâkna kha apek jo che.

¹⁸Sêrmarûk sâk in akaletting aṭhōi makna sik che, achangmak leh neina haona’n aṭhōi manvet makna sik che insing thei roh.

¹⁹Inthōpuina sik naṭapna khan hnemna om mak ning; tûnchu naratha neina rakip khan a’nthōpui tor mak jo tin.

²⁰Jât-hei inhmangna sik pha, jân kha ahongna sik a madu mak roh.

²¹Akaṭhamak a inhe makna sik a insing thei roh, khanna inphut ṭhensōtna sik chea na-inrengna kha ajōngtir kae.

²²Pathen ratha neina hi heituk a akalen mo ti hi mandon roh; ama khahei rakip a akalenpen oja kha kae.

²³Tûte’num Pathen kha heimo tlo sik tia manthei tor mak achangmak leh ṭhatmak atlo tia maher tor mak.

²⁴Aṭōn tlona hei jâra ahei tik a manpâk a ka-om ṭhak a kae; nang inum namanpâk nger sik kae.

²⁵Ama tatlo kha mi rakip in anhmu; tâk-kha eini’nchu kahlajap a inphut ni-en ravet hnâm tora kae.

²⁶Eini’n ama lenna hi pui katluk a achangmak leh akum aja kha manhret tor mak me.

²⁷Raleichunga inphut tui akakei manke kha khana khavakha khōtui rahmea insûr kha Pathen kae.

²⁸Ama’n sumtuk a inphut mihring jât rakip sik a khō amansûr.

²⁹Pathen omna chungvâna heikhonga mo sumtuk in a’nhling a-emak leh khō inphe khan khō ahong inri ti kha tûte’n manhret mak hei.

³⁰Ama’n marvân katlung bit a khō amanphe tâk-kha tuipui thōi khachu inthima khanga laka-oma kae.

³¹Hing’hin mipuihei kha avei hei sâk leh in katamtak apek hei.

³²Akut in khō inphe kha asur, aradinna hmun a avadengna sik a ṭong apek a kae.

³³Akahong sik thlisip kha khō inri khan aphôngsōt, kahong sik jo ti kha ranhring he’n anmanhret a kae.