Read Komrem JOB 37 Bible Online

JOB 37 - Komrem bible

JOB 37

¹Thlipui in kamalung amandong hêr jo.

²Nangni nankhenga Pathen rasa kha rangei ruh, abeia inphut khō inri ahei kasōk kha.

³Ama’n khō inphe kha bōirōk a ajōng kakhô, ralei rakir inkhat a inphut inkhat a amanthleng.

⁴Khan chu arasa inhrung kha inthei, alûrna rasa inri kha, khava shung senga khō inphe liplep a kae.

⁵Pathen ṭongpek a ṭōn-inlak kasōk hei, eini tamanhret tor mak omchen inlak kasōk hei.

⁶Ama’n kavur kha raleichunga atlâkna sik a ṭong apek, khan khōsûr inhnak kha ajōngtir.

⁷Einihei ṭōntlo amanhai me; ama tlotorna kha eini amanhmu me.

⁸Ramshahei khan an-in-ungna hmun a kase hei.

⁹Thlipui kha thlang tinga inphut kahong, thli kadaitak khan sak tinga inphut hong kahrâng.

¹⁰Pathen kaphuk masa khan tuihei kha atlang amanchang, khana kavur kangar amasō.

¹¹Sumtuk a inphut khō jōng inphe,

¹²khahei khan Pathen lungdo dungjuia khanga anjōnglai. Khahei khan raleichung hmun rakip a Pathen ṭongpek rakip kha antlosōt a kae.

¹³Pathen in raleia tui manchorna sik a khō ajōng mansûr; khavakha einihei karâkna sik ajōngtir thei, achangmak leh eini chunga lum lona malârna inkhat a ajōngtir theia kae.

¹⁴Job, bongkhat inhnga ina, rangei roh; Pathen in ṭōn-inlak atlo hei kha mandon hei roh.

¹⁵Pathen in heikhonga mo ṭong apek a sumtuk a inphut khō amanphe kha namanhret mo?

¹⁶Chung bōirōk a sumtuk he’n heikhonga mo intôra aka-om hei, Pathen ṭōn-inlak tlotheina hei kha namanhret mo?

¹⁷Changmak, nang chu thlanga thli kahrâng in ram kha asêm manhnak pha, akalum nade hrep sik kha kae.

¹⁸Pathen in bōirōk aleisyemlai khan khana suk manne thir kangar kapōa asyem lai khan nale’nthōpui tor mo?

¹⁹Pathen hneng hri sik kha amanthei roh; kanmalung hi karōk a ka-om; ahri sik heite neimak ung.

²⁰Ke’n Pathen inbek puina sik a dermak ning; heisik a mo kei suk manhmangna sik pha kha kapek sik?

²¹Khana tûn bōirōk a vâr hi inthle rik-rak, kavâr reia entor mak me; bōirōk kha’m thli’n aphet mantheng seng jo.

²²Sak ting sana ra-âng kapōa inhmu, Pathen lûrna khan nimalunga ṭitna amansip.

²³Pathen ratha hratna kha hingtuk kalen, ahnenga hnaitor mak me; ama chu akadik atlo khana einihei chunga aṭong tanna kha kadik.

²⁴Ama hmaikunga mi rakip in ṭittak a anngirna leh kasing ung kati hei hneng ama’n heitea asakmakna hei hi ngak sakna sik om mak a kae.