Read Komrem JOB 38 Bible Online

JOB 38 - Komrem bible

JOB 38

¹Hivasōa thlipui kâra inphut RŌNGPU’n Job hneng ṭong ahei hri.

²Namôna leh lothei lo naṭong vânga kei singna chunga ṭongderna kanei nang kha tu che mo?

³Tûnchu intlunhrek a ngir roh kaṭongder che hi amasôn roh.

⁴Raleichung kasyemlai khan nang aleika-om che mo? Nang in namanhretna katamtak nanei inchu, khava chungchânga ahri pek roh.

⁵Hivahi heituk mo manlen sik tia tu’n mo aleimandon? Hiva chunga tena kha tu’n mo aleiting? Hihei rakip masônna hi namanhret jo mo?

⁶Raleichung matungna kachohei kha hei-inmo asur manhnet hei? Raleichung rakir hlunghei kha tu tamatung hei mo?

⁷Khava kani jîngkâra khan ârsihei kha inchun heia hla ansak sōm, marvân mihring he’n inpâk a ka-ông hei.

⁸Tuipui kha aheilen makna sik ralei von shunga inphut aheipût pha tu’n mo kot kha akhâr?

⁹Tuipui chunga sumphai inkhu kha khana inthimna vânga intōm kha kei eng kae.

¹⁰Tuipui ramri kha ke’n kamatung khana akot kha kakir tlit a kada.

¹¹Ke’n kati, “Hiva katlunga sik kae, khava kakhea lensa yamak ning! Hinahin ratha kaneitak tui in-nông nang a’nhnga sik che.”

¹²Job, nahringkhō shung senga ni khat a jîngkâr heisōkna sik ṭong pekna nanei tor jo mo?

¹³Jîng khōvâr hnenga raleichung hi asur manhnetna sik khana mikaṭhamak-hei kha an-inthupna inphut akanokna sik hei ṭong napek jo mo?

¹⁴Kanivâr khan ching leh phaichamhei kha pōn inthlep kapōa amanngir hei, khana matlak chunga mêrchîkna katatna kapōa amanlârsenga kae.

¹⁵Akaṭhamak-hei sik a kanivâr hi kavâr rei, anmani innâk-inse ṭōn tlo sik kha akhâr pek hei.

¹⁶Tuipui shunga tuiripût kha nahmu jo mo? Tuipui hmaia akase jo che mo?

¹⁷Kathihei ralei inthim hngâkna, kot-hei kha tu inkhat in amanhmu jo che mo?

¹⁸Raleichung hi heituk akalen namanhret mo? Namanhret inchu amasôn roh.

¹⁹Vâr hi khona inphut mo akahong achangmak leh inthim inphutna kha heimo, namanhret mo?

²⁰Khova pha katlung mo alaka-om sik hei, achangmak leh aka-om mak sik hei, nahri tor mo?

²¹Nang nater jo jâra khana ralei insyemlai naleiom jo jâra, nang in nahri tor sik tia inhōr eng!

²²Kavur leh kahre kamanbukna karōiden kha nava-en jo mo?

²³Khahei kha ke’n khōdengthei pha, re leh sha asōk pha sik a mantluk dek a kada hei kae.

²⁴Kani heisōkna hmun a, achangmak leh nisōtinga thli heihrângna hmun a, avakase jo che mo?

²⁵Khōsûr lōngna lângkhông tu’n mo acho, thlipui hlam kha tu’n mo amanhleng?

²⁶Mihring omakna hmun a tu’n mo khō amansûr?

²⁷Ram kachâr, tui hrena ram a phi akek theina sik tu’n mo khō amansûr?

²⁸Khōsûr achangmak leh radaitui he’n pa antanei mo?

²⁹Kavur leh vurha hei nu,

³⁰tui kha hlung inchang tor, tuipui hmai inhlom tor kha, tu mo kae?

³¹Nang in ârsi rup-hei kha ankhenga nakhit tor mo achangmak leh si-karup khitna hrui kha nasōt tor mo?

³²Nang in ârsihei kum leh thla dungjuia anhlam nakei tor mo khana ârsi Rup Kalen leh Rup Kasinhei kha anhlam namanthei tor hei mo?

³³Chungvân inrônna chôndânhei kha namanhret mo, khahei kha raleichunga’m nahmang tor mo?

³⁴Sumtuk hnenga aka-ông chea ṭong napek tor mo nang sik khō namansûr tor mo?

³⁵Nang in khō inphe kha avâr rik-rakna sik ṭong napek inchu, ama akahonga nahnenga, “Naṭōn katlo sik a hin ka-om eng,” ati sik mo?

³⁶Ibis inti vate hneng Nile tuidung kalen sik tia tu’n mo amanthei, achangmak leh khō heikasûr sik jo tia ârkhōng hnenga tu’n mo amanthei?

³⁷Mikasing tu’n mo sumtuk hi atei tor khō heisûrna sik a tu’n mo sumtuk kha avasuk manhek hei,

³⁸khava vaiphinhei pitlang inchang tor khōsûr hei kha.

³⁹Shabakkai samsâk sik najong tor mo, von kaṭâm shabakkai namankhop tor hei mo,

⁴⁰ankhura inbok a an-omlai, achangmak leh sâk kahngâk a anrōng shunga an-omlai khan?

⁴¹Va-âk he’n vonṭâma anjōnglele pha, ante he’n kahnenga ansamsâk ander eng pha, ansâk kavei kha tu mo kae?