Read Komrem JOB 39 Bible Online

JOB 39 - Komrem bible

JOB 39

¹Tlânga kehei intet pha nang in namanhret mo? Ram shakhi intet na-enravet phung mo?

²Ante kadông hei kha heituk kasôt mo anta’nṭhōipui hei namanhret mo? An-intetna sik pha kha namanhret mo?

³Anmani’n heitik chenmo a’nkun heia antak antakanôt, khana ante kha raleichunga anta hongmatet namanhret mo?

⁴Ramhânga ante hei kha hong kakhang hei; kasesōt hei khana he’nle nôk mak jo hei.

⁵Tu’n mo shakōrtung hei kha ning leh hnōm apek hei? Tu’n mo amasō heia amanlôn lele hei?

⁶Ke’n nêrdiramhâng kha an-inn sik a kapek hei, khana chikhur phaichama kaman om hei.

⁷Rasa tamna khōpuia inphut kahlatak a ka-om hei, tûte inkhat in lâkmak hei khana ṭōn mantlotor mak hei.

⁸Chingbung hei kha anphi sâkna ramhâng kae, khana khan sâk sik a thingbō in-êm anjonga kae.

⁹Ram a sehratche inkhat in naṭōn atlo sik mo? Naserōnga jân khat akarek hnōm sik mo?

¹⁰Khava inkhat kha hrui inkhat a nakhit a hlei nakhōina tor sik mo? Achangmak leh nahleia ukai-samchet namankei tor sik mo?

¹¹Aratha kahrattak chunga inngamna nanei tor mo, naṭōn kakhôk kha atlopek sik chea inhōrna nanei tor mo?

¹²Nasâng khôm kha inna ahei choi pek sik chea nasaphōr hmuchi kha akhôm mantûp sik a na’nhōrpui mo?

¹³Valen ostrich inkhat in amathla kha heituk inranga ajâp mo! Tâk-kha ostrich inkhatbek in urôk kapōa jōng tor mak.

¹⁴Valen in aratui raleichunga ada hei, ralei kalum in amanlumna sik heia.

¹⁵Ranhringhei ke tachōn khōi sik a achangmak leh ramshahei tatamkhōi sik a khôk sakmak.

¹⁶Ratuihei kha ama ratui mak kapōa, a-inṭangna kha môk a inhmang sik jo tia heite mankhôksak mak.

¹⁷Ama manmona katlo kha, singna akapek mak kha, kei eng kae.

¹⁸Tâk-kha ama’n tlân aphut pha chu, shakor leh akachōngpa kha amanuisō tor heia kae.

¹⁹Shakorhei ratha kahrattak a kasyem kha khana anrînga sam kasei kha tu tapek hei mo?

²⁰Khaikhu kapōa a’nthok hei anhnâr rasa’n mi antamanpir heiso nang tamantlo hei mo?

²¹Anmani’n ratha kahroktak a phaicham ankahōt; anratha nei rakip leh rehmun a katlân inhlut hei.

²²Anmani’n ṭit inti hi manhret mak hei, chemjâm inum ankahnung manletor mak hei.

²³Anchunga akachōng hei hmangchâk-hei kha kani vâra inthle rik-rak hei.

²⁴Ratha kahrok a inthing heia, shakorhei kha hmating katlân hei; pengkun anheitum pha, ngir hnâm theimak hei.

²⁵Pengkun aheitum manhring akaia anhnar anrakhōng ri; rehmun anhnai jo pha re marim kha anmarimdek, rehlam kakeihei ṭongpek rasa kha antheidek a kae.

²⁶Hmukhai inkhat in thlâng ting amathla azerlai heikhonga mo akajōng sik kha nahnenga a’nchû mo?

²⁷Hmuvânlai inkhat in tlâng inshâng chunga rabu achom sik pha nang ṭongpekna ahngâk nâk mo?

²⁸Ama’n hlungkare inshângpen chunga rabu kha achom hlung bilik kasonghei kha arekur amanchang hei.

²⁹Khana inphut akahla leh akahnaia heikhat that sik leh sâk sik a a-en ravet hei.

³⁰Kathi kalōnghei kâra khan hmuvânlai hei kha intûp hei, ante he’n thisen kha an-ina kae.