Read Komrem JOB 41 Bible Online

JOB 41 - Komrem bible

JOB 41

¹Nga khōi vânga Leviathan kha nasurtor sik mo, achangmak leh hrui vâng amalei kha nakhit tor sik mo?

²Ahnâra hrui vâng navit tor sik mo achangmak leh arakama khoikim vâng nakei tor sik mo?

³Ama’n nang mansena sik a angek sik che mo? Lungset narônna sik a ader sik che mo?

⁴Ama’n inhnōmtōna inkhat aneipui sik che mo khana ahei tik a nasepa tlona sik a a’ntep sik mo?

⁵Inna vate kapōa ama kha nakhit sik mo, nasōk nuhmeihei inpâkna sik a nada sik mo?

⁶Nga kasur he’n antajōr tor sik mo? Invei katlo he’n antajōr sik a ataksa an-âttan tor sik mo?

⁷Avun kha nga surna kasei vânga nakakhotan tor sik mo khana alu kha akim indo kasei vânga nakakho khui tor sik mo?

⁸Ama kha vōi khat lim vatôn roh, avea tôn hnōm mak tin che; ama dōina nachâmna kha mahngi tor hêrmak tin che.

⁹Leviathan intōpui rakip in anngarna inhmanga raleia katlu heia kae.

¹⁰Ama andeikathok inchu ahnuk kase hêr; tûte’m ahmai kunga ngirngam mak hei.

¹¹Ama inrepui tor tu mo akahringa aka-om jo? Raleichung pumpuia ka-om tu inkhat in tlotor mak ning.

¹²Leviathan ke chungchânga manthei che rong heituk a akahrat leh akalen mo hripek che rong.

¹³Avun kha tûte’num keihler tor mak arevon invon kha sunthlen tor mak a kae.

¹⁴Khava ṭit ka-om aha takakebit jo abei kha tu’n mo akei man-âng tor sik?

¹⁵Akhōn kha pho man-gôr vânga ansyem kae, a’nkhōp manchun hlung kapōa akangar jo kae.

¹⁶Ahlip inkhat kha inkhat bânna inkhat rahnak a rabek manbit jo hei kae, ankâr kavea khan kaphuk sânthei bek um changmak a kae.

¹⁷Ankhenga mansur manhnet jo hei kae heite’num keiṭhen tor mak a kae.

¹⁸Ama kha ahei inṭhîm pha avâr aheikâp rik-rak a kae, ahmit-hei kha kani ahei kasōk bi kapōa kavâr hei.

¹⁹Abeia inphut hmeimale heikasōk, hmei rasidung kapōa kajōng hei.

²⁰Ahnâra inphut hmeikhu heikasōk, bube thōia huisum kakâng hmeikhu kha ka-ang.

²¹Kaphuk asân pha hmei kha insûk ahei phut; abeia inphut hmeimale kha kasōksōt a kae.

²²Arîng kha ratha aneihêr a’ntōpui rakip in ṭit-inpirna annei.

²³Atak vuna a’nnêmna hmun inti kha heite om mak; thir kapōa akangar, innemlo rōk kha kae.

²⁴Hlung kapōa amalung kha ṭitna neimak, Chakri hlung kapōa kangar, innem mak.

²⁵Ama ahei thō pha, akahratpen hei kha’num ṭitna anneia kae; anṭit reia atloje manhret mak hei.

²⁶Ama tuk mankôkna sik a chemjâm om mak; Ama sun mankôkna sik a the, kasei khana thingtlōn om mak.

²⁷Ama hnenga chu thir’um sapôt kapōa innemdâk, sum-êng um thing kaṭop kapōa innem.

²⁸Ama mantlânna sik a the om mak; hlungtlang vâng dengna hi’m sapôt bong tatôn ka-ang.

²⁹Ama hnenga thingbong hi sapôt bongkhat kapō kae, mihring in kasei vânga ankakho pha anmanuisō heia kae.

³⁰Avon intônbi hei kha bephu chunga ret inkeirit kha ka-ang hei, khahei kha sâng manthengna thir-samthi keina kapōa bunthlōk chunga akarit manthûk a kae.

³¹Ama’n tuipui kha tuilum kapōa akahnur mannông, thai be kaphi kapōa amanphi tor.

³²Asena hlam kha akahnung inlârtak a adahlon, tuipui kha tuiphôn amasōk a amanbangsō.

³³Raleichunga ama leh tepui thei inkhatbek om mak; ṭitna kaneimak ranhring kha ama hi kae.

³⁴A’nlensakpen shahei kapha heite donmak hei; ama hi ramsha rakip hei reng kha kae.