Read Komrem JOB 42 Bible Online

JOB 42 - Komrem bible

JOB 42

¹Khava sōa Job in RŌNGPU kha amasôn.

²RŌNGPU nang ratha kaneipen che kae, namadu rakip natlo tor ti hi kamanhret.

³Kei heite inhret mak eng hin nasingna chunga heikhonga mo ke’n ṭong kader ngam che tia nang in nader eng. Ke’n kamanhret phâk tor mak ṭonghei kha kaleihri jo, kei tamanhret tor mak sik a’nlak tatak hei chungchânga.

⁴Nang in ṭong nahrilai karangeina sik a, khana naṭongder hei kha kamasônna sik chea namanthei eng.

⁵Hmalai khan chu mihlop-hei tamanthei eng rōk kha kalei manhret, tak tûnchu, kahmit khet a kahmu jo che.

⁶Khava jâra kaṭong leihri hei seng chunga inzak jo eng ravut leh vaiphin shunga kamalung kathleng jo.

⁷RŌNGPU’n Job hnenga aṭong hri kha achai pha, ama’n Eliphaz hneng ati, “Kei, nang leh naṭhōn 2 hei chunga kahnuk kana, ajârchu kasōk Job tahri kapōa, nangni’n kei chungchânga akadik kha hrimak chei.

⁸Tûn nangni’n sehratche 7 leh kemōngche 7 Job hneng heikei ruh, nanbing sik a inthoina vatōk ruh. Job in nangni sik a aderpek sik chei, ke’n ama derna kha kamasôn sik, khana nanrahōi kasōk inzakna kha pek mak chei ning. Kei chungchânga ama’n ṭongdik ahri kapōa, nangni hrimak cheia kae.”

⁹Eliphaz, Bildad, khana Zophar he’n RŌNGPU tamanthei hei kha antloa, RŌNGPU’n Job derna kha arahlâng pek jo.

¹⁰Khava sōa, Job in aṭhōn 3 hei sik a adersōpek hei pha, RŌNGPU’n ama kha amanhao nôk jo, ama’n hma a aleinei kanek a chen hnia apeksa jo.

¹¹Job sōpui pase leh nuhmeihei khana aṭhōn marō hei seng kahong heia anhong phâk jo khana a-inna rehōi sâktlâng antlo joa kae. Anmani’n ama chunga inreng khōdeng theinahei seng RŌNGPU’n alei mathlungna jâra anmalung natna ṭong leh lungmōng thlâkna anleihri pek a kae. Anmani inkhat et in ahnenga sêr ṭhahrep leh sana kutkhi anleipek a kae.

¹²RŌNGPU’n Job hringkhō hnung intong kha ahma inkei kanek a mahâmṭhat apeksa chet jo. Job in kemōng 14,000, sharîngsei 6,000, sehrat 2,000, khana shakōrtung 1,000 aleinei hei.

¹³Ama kha sapase 7 leh sanuhngâk 3 pa kae.

¹⁴Ama’n asanu upapen kha Jimima, 2 tlukna kha Keziah, khana mathlum pen kha Keren Happuch tia anrahming aphō hei.

¹⁵Job sanuhei kapōa hme kaṭha raleichung pumpuia tûte leiom mak. Anpa khan asanuhei kha asapahei leh inṭhōia anei karōi kha anchen et aleipek hei.

¹⁶Job kha hivasōa kum 140 kahringa, atu hei leh, atusōn hei ahmu heia kae.

¹⁷Ama kha kum kasôttak ahringsōa kathia kae.