Read Komrem JOB 6 Bible Online

JOB 6 - Komrem bible

JOB 6

¹Kakhōdengthei leh ka’nrengna hei hi akahrik tena vânga nite’nchu,

³Tui-ôngpuia nêrdi kanek a kahrik jôk sik hei, khava jâra hme ṭonga kaṭongna hin nangnihei inlak sakna changmak rasoh.

⁴Chunghnung Pathen in thepui hei vânga akadôt jo eng, khana anthetûr in kataksa ajosō jo. Pathen in ṭit-inpirna hei kha kei dōina aman-gôr jo hei.

⁵Shakōrtung in phi asâk pha amalung kahōi, sehrat in sapôt asâk pha sip ati.

⁶Tâk-kha akatui mak, chi inthlâk lo thlai kha tu’n mo asâk tor sik? Ârtui ada kabanga khan heimo atuina aka-om?

⁷Khava kapō thlai kha sâk hnōm mak eng, khana kathlâi sâk rakip in amannat eng.

⁸Kangekna kha heisa mo Pathen in apek mak sik eng? Kaderna kha heisa mo amasôn mak sik eng?

⁹Ama’n amandon masadek a athat eng inchu inhret mak jo!

¹⁰Ama’n khanga atlo sik tia kalei manhret inchu, inpâk a inthok sik eng, kanat kha akhôk hêr inum heite changmak. Pathen hi a’ntheng kae tia kamanhret; Aṭongpek eng rakip ke’n makhe mak eng.

¹¹Kahring sôtna sik a heiratha mo ke’n kanei? Inhōrna kaneimak jo pha heisik a mo alakahring sôt sik eng?

¹²Kei hlunga ansyem eng mo? Kataksa hi sum-êng thir mo kae?

¹³Kabinga inhuksōtna sik, karatha katlang jo; inthōpuina sik a kahnget sik hmun inkhatbek om mak jo.

¹⁴Hiva kapō inrenglaia hin taksenthei ṭhōn karangei hei, ke’n Pathen kha kadahlona khana kadahlon mak inum.

¹⁵Tâk-kha kaṭhōn nangni’nchu kavadung lōng kapōa nanhōn eng, khōsûr mak pha akachâr kapōhrep a.

¹⁶Tuikông kha kavur leh vurha in akhâr jo hei,

¹⁷tâk-kha akalum in amanjor manhmang ri hei, khana tuikông ashung kha karōk a kachâra ka-om.

¹⁸Nêrdi ramhânga invei katlo he’n tui anjonga inhmangna annei ri; Nêrdiram a kalôn-invai heia kathihei.

¹⁹Sheba leh Temah inphut invei katlo he’n tui anjong,

²⁰tâk-kha akachâr kavadung panga an-inhōrna kha inchai jo.

²¹Nangni hi, kei hnenga chu khava kavadung kapō chei kae. Nangni’n kavângset hi nanhmu khana kaṭi cheia kahnungting intet chei.

²²Kutchoi apek ruh tia kader chei mo, achangmak leh kei kahlanga mi inkhat hneng sêrmarûk pek ruh kati chei mo,

²³achangmak leh ka’nrepui leh mi-êng kase ṭhahrep heia inphut ahuk ruh tia kader chei mo?

²⁴Kaṭha jo, amanthei ruh; kaṭhena hei kha ahri pek ruh. Ke’n kadai hngera rangei chei rong.

²⁵Malung intheng ṭonghri khan, mi asur tor, tâk-kha nangni chu hnemna kase ṭong nanhria kae.

²⁶Kei ṭonghri hi heite kaemak thlihrâng kapōa nanmandon; khan chu heisa mo inhōrna kase kaṭong hri kha nantamasôn eng?

²⁷Nangni’n nu leh pa kase sōk inkhat nanchenna sik jâra vâng-enna nannei khana nanṭhōn marit heia inphut haona leh neina nanjong.

²⁸Kahmaia a-en ruh. Kei kamalei seimak ning.

²⁹Ṭong katamtak katluk a nanhri jo. Akadik mak hrina kha bâng jo ruh. Amaset mak ruh. Kei akadik a ka-om eng.

³⁰Tâk-kha nangni’n kei hi malei kaseia nanmandon eng, akadik mak a inphut akadik hri tor mak ning tia nanmandon eng.