Read Komrem HLAHEI 107 Bible Online

HLAHEI 107 - Komrem bible

HLAHEI 107

¹“Nan-RŌNGPU aṭhat jâra manpâkna nei ruh, ama lungsetna kha ahei tik a sik a kae!”

²Achunga ṭonghei hi, ama tahuk manhring nangni’n, RŌNGPU choi ka-ânna sik ave-avea hrisōt ruh. Nan-inrepui heia inphut ama’n ahuksōt chei kae,

³nisō tlaitlâk, sak leh thlang, miram a inphut aheiṭhōi male jo chei.

⁴Mi ṭhahrep chu hlam om makna nêrdiram a kalôn inhmak jo hei; khana an-omna sik khōpui jōnna hlam kha hmutor mak hei.

⁵Anmani anvon kaṭâm, antui kahre, an-inhōrna rakip kha katlang jo.

⁶Khava pha khōdeng antheia RŌNGPU kha anbek, khana an-inrengna inphut ahuk hei.

⁷An-om theina sik khōpui inkhat a, hlam intlunhrek a aleiṭhōisōt hei.

⁸Alungset inthlengmak leh ṭōn-inlak aleitlo pek hei jâra anmani’n RŌNGPU kha antamanpâk nger sik kae.

⁹Tui kahre hei tuihre amanchim pek hei, khana von kaṭâm hei kha akaṭha sâk thei vâng amankhop hei.

¹⁰Ṭhahrep khat lungjîng leh inthima kurkhum a khit karâk a khōdeng anthei,

¹¹ajârchu anmani’n Akahratpen Pathen ṭongpek kha andōi khana amansena kha lohnōm mak hei.

¹²Ṭōn inhnak tlo jâra anratha katlang reng jo; anmani katlu sik hei, tûte’n inthōpui mak hei ning.

¹³Khan chu khōdeng anthei jâra RŌNGPU kha anbek, khana an-inrengna inphut khan ama’n ahuk hei.

¹⁴Anmani kha inrengna leh inthimna inphut aheiṭhōisōt hei khana anthirhrui hei kha asuk manchip pek jo hei.

¹⁵Alungset inthlengmak leh ṭōn-inlak aleitlo pek hei jâra, RŌNGPU kha antamanpâk nger sik kae.

¹⁶Ama’n sum-êng kot khârhei kha asuk khōia, khana thir-rake hei kha asuk manchip heia kae.

¹⁷Anmani ṭhahrep anset jâra kamohei, anṭhatmak jâra khōdeng anthei;

¹⁸Anmani thlaisâk um enhnōm mak jo hei, khana thina kha anhnai jo.

¹⁹Khōdeng anthei pha RŌNGPU kha anbek, khana an-inrengna inphut RŌNGPU’n ahuk hei.

²⁰Aṭongpek a khan anmani amandam hei khana thlâna inphut a ahuk manhring hei.

²¹Anmani sik a ṭōn-inlak aleitlo pek hei jâra leh alungset inthlengmak jâra khan RŌNGPU kha antamanpâk nger sik kae.

²²Neitōk pum a antamanpâk nger sik kae, aṭōn leitlo rakip kha inpâkna hla sakpuma antahrisōt nger sik kae.

²³Ṭhahrep in tui-ôngpui chunga rakōng antôra anhringna sik tui chunga inveina anjong.

²⁴RŌNGPU’n heimo atlo tor, tuipui chunga aṭōn inlak-hei kha anmani’n anhmua kae.

²⁵Ama’n ṭong apek a, thlipui inhnak kha kahrâng inphut jo, khana tui in-nông kha akachok manhnak a kae.

²⁶Rakōnghei kha chungting akalâng heia, khana tui inthûkna shunga amathlâk manhlut hei. Khang khava ṭitna chunga khan rakōng katôrhei malung ngamna kha inhmang jo.

²⁷Anmani ju inrui kapōa invet invai heia inpai inthlûk hei; anthemna rakip kha hnemna kase leikachang jo.

²⁸Khōdeng anthei pha anmani’n RŌNGPU kha anbek, khana anmani inrengna inphut ama’n ahuksōt hei.

²⁹Ama’n thlipui kha amandâi, tui in-nông kha amanbâng.

³⁰Adai hnger jo jâra anmani inpâk jo hei, antamadu ṭhumhmuna ama’n kahringa ajōngṭhōi hei.

³¹Alungset inthlengmak leh ansik a ṭōn-inlak aleitlo jâra anmani’n RŌNGPU kha antamanpâk nger sik kae.

³²Mipui intûpna khan ama lenna kha antamanthang nger sik kae khana hlamkakei Sehmang-Pachonghei intûpna khan antamanpâk nger sik kae.

³³RŌNGPU’n tuisam kapût hei kha amanchâra, khana tuidunghei kha amanchâr hei.

³⁴Khava hmun a ka-om mihei kha anṭhatmak jâra anram ralei thai omna kha chi ramthōi amanchang pek hei.

³⁵Ama’n ramthōi kha tuisam amanpût a, Nêrdiram kha tuisam pûtna amanchang jo.

³⁶Ama’n vonṭâm kade hei kha khava hmun a aman om hei, khana an-omna sik khōpui kalen an-insak a kae.

³⁷Anmani’n hleia hmuchi anvora, khana vomhrui anling, khana khan kara hingja ankhôma kae.

³⁸Ama’n amihei kha vâng apek hei, khana anmani’n sa leh nai hingja anleinei; khana anserup hei kha anpungna sik adapek hei.

³⁹Akakhôk suk manrimna leh khōdeng mantheina vâng khan Pathen mihei kha antor heia inzak anmanchen hei pha

⁴⁰Ama’n ankasuk inrim hei hneng ahnōm makna kha amalâr, khana nêrdiram thōia hlam kasea amanlôn heia kae.

⁴¹Tâk-kha akatlasam hei khachu anchâmna inphut ahuk hei khana an-innshung mihei kha kemōng rup kapōa amanpung pek hei.

⁴²Mikadik he’n khavakha anhmua inpâk hei, tâk mikaṭhamak seng chu amandai hnger hei.

⁴³Mikasing he’n hivahei hi mandon hei rasoh; RŌNGPU lungset inthlengmak kha manhret hei rasoh.