Read Komrem HLAHEI 132 Bible Online

HLAHEI 132 - Komrem bible

HLAHEI 132

¹RŌNGPU, David leh athōkna rakip hei kha mahngi mak roh.

²Akahratpen Jacob Pathen nahnenga heimo ale’ntep RŌNGPU, ama’n heimo ale’ntep hei kha mandonsōt roh:

³“Kei inna vase mak ning a-emak leh jekhuma vajemak ning,

⁴kei châm inhnga mak ning, je’m jemak ning,

⁵RŌNGPU sik hmun kasyem mak kârseng, akahratpen Jacob Pathen inn kasyem mak kârseng.”

⁶Bethlehema Intepna bôm chungchânga kanthei, khana Jearim hleipuk a khavakha kanvahmu.

⁷Keini’n, “RŌNGPU inna vase rih, alen in-ongna hmaikunga vakamuk rih,” kanti.

⁸RŌNGPU, narathahrat manhmuna, naṭongtep thingrakōng kha leh inṭhōia nakamukna inna hin ahongpek roh, khana hinahin ahei tik a omṭhak jo roh.

⁹Nathempu he’n akadik kha ahei tik a tlo hei rasoh; namipui he’n inpâk a ông hei rasoh!

¹⁰Nang in nasōk David hneng ṭong naleitep; nakadei rengpa kha hlonsōt mak roh, RŌNGPU!

¹¹Nalosōt nôk mak sik jo intepna kha David hneng ka-ôrtak a le’ntep che: “Nasahei kâra inkhat reng kamanchang sik, ama’n nakahnunga vai arôn sik.

¹²Nasa he’n ka ṭongtep a leh kaṭong pek a khan kadik a an-om inchu, ansahei khan nangni anthleng sik chei, pha rakip a reng hongkachang sik hei.”

¹³RŌNGPU’n Zion kha akadeisōt jo; ama’n khavakha a-inn amanchang hnōm:

¹⁴“Kumleikōa ka-omna sik kha hi kae; hinna inphut vaikarôn hnōm.

¹⁵Atlâksamna rakip a Zion kha pui katluk a kapek sik; asara changna kha sâk leh in vâng kamankhop sik.

¹⁶Athempuhei kha antlona rakip a mahâmṭhat kapek sik hei, khana amipuihei kha hla ansak a inpâk a ka-ông sik hei.

¹⁷Hinahin David sōn leh pâr kâra inkhat rengkalen kasyem sik; hinahin kakadeisōt rengpa vairônna kha kakahuk pek sik.

¹⁸A’nrepuihei kha inzakna’n kamakhu sik hei, tâk ama rengram chu kakhang sik, kahao sik.”