Read Komrem HLAHEI 136 Bible Online

HLAHEI 136 - Komrem bible

HLAHEI 136

¹RŌNGPU kha manpâk ruh, ajârchu ama hi akaṭha kae, alungsetna hi kumleikōa kae.

²Pathen rakip chunga akalenpen hnenga manpâk ruh; alungsetna kha kumleikōa kae.

³RŌNGPU rakip chunga akahratpen hneng manpâkna pek ruh; alungsetna kha kumleikōa kae.

⁴Ama rōk in ṭōn-inlak kalen atlo kae; alungsetna kha kumleikōa kae.

⁵Asingna vâng khan marvânhei asyem; alungsetna kha kumleikōa kae;

⁶ama’n tui inthûktak hei chunga ralei hi asyem, alungsetna kha kumleikōa kae.

⁷Ama’n kani leh thla asyem hei; alungsetna kha kumleikōa kae;

⁸kani kha sûna vai amanrôn; alungsetna kha kumleikōa kae;

⁹thla leh ârsihei kha jân a vai amanrôn hei, alungsetna kha kumleikōa kae.

¹⁰Egypt hei sapase a’nte hma inkeipen hei kha aleithat pek hei, alungsetna kha kumleikōa kae.

¹¹Ama’n Israelhei kha Egypt a inphut aṭhōisōt hei; alungsetna kha kumleikōa kae;

¹²akut rathahrat vâng leh abân rathahrat vânga aheiṭhōi hei; alungsetna kha kumleikōa kae.

¹³Ama’n Tuipui Kasen kha akhōiṭhen; alungsetna kha kumleikōa kae;

¹⁴ama’n amihei kha khava rekhat a aheiṭhōi hei; alungsetna kha kumleikōa kae;

¹⁵tâk Egypt rengpa leh aremihei kha tui amanchûm hei, alungsetna kha kumleikōa kae.

¹⁶Amihei kha nêrdiram a ajōngṭhōi hei; alungsetna kha kumleikōa kae.

¹⁷Ama’n ratha kaneitak renghei kha athat hei; alungsetna kha kumleikōa kae;

¹⁸ama’n rahming inthang renghei kha athat hei; alungsetna kha kumleikōa kae;

¹⁹Amorhei reng, Sihon kha aleithat, alungsetna kha kumleikōa kae;

²⁰khana Bashan hei reng, Og kha aleithat; alungsetna kha kumleikōa kae.

²¹Anmani ramhei kha amihei hneng aleipek hei; alungsetna kha kumleikōa kae;

²²khahei kha asōk Israel hneng aleipek hei; alungsetna kha kumleikōa kae.

²³Mi’n anitor phale’m eini amahngi mak; alungsetna kha kumleikōa kae;

²⁴inrepui heia inphut amasō me; alungsetna kha kumleikōa kae.

²⁵Hringkhō kanei rakip hnenga sâk sik apek hei; alungsetna kha kumleikōa kae.

²⁶Marvân Pathen kha manpâk ruh; alungsetna kha kumleikōa kae.