Read Komrem HLAHEI 139 Bible Online

HLAHEI 139 - Komrem bible

HLAHEI 139

¹RŌNGPU, nang in na-enmansin eng khana namanhret eng.

²Katlohei rakip um nang in namanhretsō; kamandonna rakip hei kha’m kahlatak a inphut namanhret hei.

³Ṭōn katlo mo a-emak leh a’nhnga eng mo, nang in nahmu sō eng; ka’nhlingna rakip namanhret sōpet eng.

⁴Kaṭongsōt mak hma kapha’m kahri sik rakip nang in nalei manhret sōpet.

⁵Nang kasir kapang kakimvea ka-om che; nahratna vâng khan nahuk eng.

⁶Nang in kei namanhretna eng hi inthûk hêr; hivahi kei manhretna rekhat a jo kae.

⁷Nanga inphut inphesōtna sik khon mo akase sik eng? Nahmai kunga inphut khon mo akatlânsōt sik eng?

⁸Marvân chungting kake’num, khan nang leika-om sik che; kathirama khan kava je’num, khan nang leika-om sik che.

⁹Nisō rekhat ting kajongsōt inum a-emak leh tlaitlâk ting akahlajap hmun a kava om jo’num,

¹⁰khana khan ani kaṭhōile sik a leika-om sik che, ani’nthōpui sik a leika-om sik che.

¹¹Inthim kha anithupna sik kader thei, a-emak leh kakimvea vâr kha jân achang pek roh tia kader thei,

¹²tâk nang sik a chu inthim kha’m a’nthim changmak, jân kha’m nang sik a chu sûn kapōa kavâr. Inthim leh kavâr kha nang sik a chu a’n-angtling kae.

¹³Kataksa bâk heirakip hi’m nang in nasyem hei; kanu von shunga nada manchun enga kae.

¹⁴Kachoi ka-ân che ajârchu ṭit sik khachu nang che kae; naṭōntlo heirakip kha ahlopdet hei kae khana inlak hêr hei. Natlo rakip hei kha kamalung pumpui in kamanhret hei.

¹⁵Karu karâng nasyemlai hei khan kanu von shunga khôk saktak a nada manchun hei, khana khan rirûk a kalei khang sōt pha, nang in khana ka-om kha nalei manhret eng,

¹⁶kalei intetmak lai nang in naleihmu jo eng. Heite inkhat a’nphut mak hma kei sik ale’ntep kanihei kha natintana lekharabua naleikhumsa jo hei kae.

¹⁷Eh Pathen, namandonna kha heituk-hrep manhret intak a kathei jo mo; khang khavahei kha heituk akatam hei mo!

¹⁸Ke’n katei he’nchu nêrdi rahme nek a’m katam sik hei. Kahong inṭhang pha nang leh leika-omsap me.

¹⁹Eh Pathen, mikaṭhamak nathat sik hei kha heituk a kamadu jo mo! Rumhrat katlo he’n kabing rōk a antadahlon sik eng kha heituk a kamadu jo mo!

²⁰Anmani’n nang chunga ṭhatmak anhria kae; narahming kadōia ṭhatmak anhri.

²¹O RŌNGPU, nang kahōt hei kha heituk-hrep a kahōt hei mo! Nang inrepuihei kha heituk a kamater jo hei mo!

²²Anmani kha pui katluk set a kamater hei; anmani kha kei inrepuihei kae tia kalo jo hei.

²³Ei-en mansin roh, Eh Pathen, khana kamalung hi ei-manhret pek roh; a-enmansin ina kamandonna hei hi ahmu sōt pek roh.

²⁴Kashunga ṭhatmak heikhat a-omtâk inchu ajōngsōt pek roh, khana kumleikōa hringna hlam a khan aṭhōi roh.