Read Komrem HLAHEI 145 Bible Online

HLAHEI 145 - Komrem bible

HLAHEI 145

¹Ka-Pathen leh kareng, nalenna kha kaphôngsōt sik; are-rea kamanpâk sik che.

²Ani katai kamanpâk sik che; are-rea kachoi ka-ân sik che.

³RŌNGPU chu kalen khana inshângpena choi ka-ân sik kae; alendân hi mihring tamanhret tor emak.

⁴Naṭōn leitlo hei kha khang inkhat a inphut abâna katlung choi ka-ân kachang sik; anmani’n nang rathahrat ṭōnhei kha anphông sik.

⁵Anmani’n nalûrna leh nakajana ṭong anhri sik, khana ke’n naṭōntlo inlak kha malunga kamandon sik.

⁶Mihe’n naṭōntlo rathanei kha anhri sik; khana ke’n nalenna kha kaphôngsōt sik.

⁷Anmani’n naṭhatna rakip hei kha mihei anmanthei sik hei khana nalum lona kha hla vâng ansak sik.

⁸RŌNGPU hi lungset leh marit kae, Ahnuk nabeimak khana alungset injôn kha kasiptak a kae.

⁹Ama kha mi rakip hnenga kaṭha akutsyem rakip chunga lum alo hei.

¹⁰Naranhring rakip in anchoi ka-ân sik che, RŌNGPU, khana namipui rakip in anmanpâk sik che.

¹¹Anmani’n nareng rathahrat lûrna kha anhri sik khana nahratna ṭong kha anhri sik,

¹²khan chu nahratna ṭōntlo leh narengram kalûrtak a kajana kha mi rakip in anmanhret sik jo.

¹³Nareng vairônna kha kumleikōa kae, khana nang ahei tik a reng che kha kae. RŌNGPU chu aṭong tepna kha ajuia kae; khan aṭōntlo rakip a maritna’n kasip.

¹⁴Khōdeng katheia ka-om rakip a’nthōpui hei; akatlu jo hei rakip akei mathō hei.

¹⁵Akahring rakip in inhōrpuitak a an-en che, khana sâk sik annei mak pha leh napek hei.

¹⁶Katluk a napek hei khana mi rakip rangeina namankhop hei.

¹⁷RŌNGPU chu aṭōn tlona rakip a kadik, a’nhlingna rakip a maritna kasip.

¹⁸Ahnenga malung intheng senga, akabek hei hneng ama kha ka-om.

¹⁹Ama kajana kapek hei tarangei rakip apek hei; anṭap rasa athei pek hei khana ahuk hei.

²⁰Ama inlungset rakip hei kha ahrung hei, tâk akaṭhamak-hei khachu asukset sik hei.

²¹Ke’n RŌNGPU kha kachoi ka-ân ṭhak sik; ama ranhring rakip in arahming intheng kha are-rea choi ka-ân hei rasoh!.