Read Komrem HLAHEI 147 Bible Online

HLAHEI 147 - Komrem bible

HLAHEI 147

¹RŌNGPU kha choi ka-ân ruh! Ni-Pathen choi ka-ânna hla sak hi akaṭha kae; ama choi ka-ân sik hi malung tlaina leh akadik kae.

²RŌNGPU’n Jerusalem kha aphun ther nôk; hnongsōt a leika-om hei kha aheiṭhōi male nôk hei.

³Malung kakōi hei kha amandam pek nôk hei khana annatbi hei kha akatōmpek hei.

⁴Ama’n ârsihei anja kha amanhretsō khana anrahming inkhat sâma abek hei.

⁵Ni-RŌNGPU kha akalen leh akahrat kae; asingna kha tetor emak.

⁶Ama’n malung innem hei kha akadom manshâng hei, tâk akaṭhamak-hei khachu raleia akahnur hei.

⁷RŌNGPU choi ka-ânna hla kha sak ruh, ni-Pathen hneng serângdâr manhring ruh.

⁸Ama’n bōirōk a sumtuk amazer, raleichunga khō amansûr tlâng chung heia kahar amanhmông.

⁹Ramshahei kha antasâk sik apek hei khana va-âkte kadông hei kha anpeng pha leh avei hei.

¹⁰Ama tlaina kha shakor kahrat chunga changmak, amadu kha remi kahrâng chunga changmak;

¹¹tâk ama kajana kapek hei chunga, alungset inthlengmak akataksenhei chunga tlaina anei.

¹²O Jerusalem, RŌNGPU kha choi ka-ân roh! O Zion, na-Pathen kha choi ka-ân roh!

¹³Ama’n nakekot kha amanhnet pek che; namipuihei kha mahâmṭhat apek hei.

¹⁴Ama’n naramri kha ahrung pek che khana gehu kaṭhatak vâng khan avei mankhop che.

¹⁵Ama’n raleichunga ṭong apek, khana ahrisōt kha inrangtak a intlosōt bât.

¹⁶Ama’n kavur kha sahme pōn kapōa amazera khana sumphai kha ravut kapōa akathek.

¹⁷Ama’n kahre kha hlungtlang kapōa ajōngtir; kadai ajōngtir kha tûte’n detor mak hei!

¹⁸Khava sōa ama’n ṭong inkhat ahongpek; khana kavur kha hong kajor jo; ama’n thli atir, khana tui kha kalōng jo.

¹⁹Ama’n amihei hneng ṭong apek hei, Israel hneng mansena leh dân apek hei.

²⁰Ama’n hihei hi jât-hlop hei sik tlomak; jât-hlop he’nchu ama dân kha manhret mak hei. RŌNGPU kha choi ka-ân ruh!