Read Komrem HLAHEI 18 Bible Online

HLAHEI 18 - Komrem bible

HLAHEI 18

¹Heituk-hrep a kalungset che mo, RŌNGPU! Nang ani kasenpa che kae.

²RŌNGPU kha ka’nhrungna kae, ama kha karekur kahnettak kae. Ka-Pathen kha kei inhrungna kae, khana ama hnenga chu inhukna kanei. Ama’n pho inkhat kapōa ahrung eng; ama’n atingpek eng khana ahuk eng.

³Ke’n RŌNGPU kha kabek, khana ka’nrepui heia inphut ahuk eng, RŌNGPU kha manpâk ruh!

⁴Thina lungjîng in akake khumbit eng; insukbōina tui in-nông in anmahersi eng.

⁵Thina lungjîng in akake khum eng, khana thlânkhur khan ka’n-ôkna sik châng akam.

⁶Ka’nrim pha RŌNGPU kha kabek; ka’nthōpui sik a ka-Pathen kha kabek. Abek-inn shunga karasa aleithei; inthōpuina sik a kaṭana rasa kha arangei pek eng.

⁷Khava pha raleichung kha intlira innok; tlângkung hei kha intlira innok hei! Ajârchu RŌNGPU kha ahnuk leikana.

⁸Ahnâra inphut a hmeikhu heikasōk, kângtheina hmeira-ê leh hmei in-ât abeia heikasōk.

⁹Ama’n bōirōk kha akei hlera amahlâng, khana akea sumtuk inthim ajōng chōnga jōng kaṭum.

¹⁰Ama’n mathla kanei ranhring ajōng chōnga inranga heikajōng; ama’n thli mathla vâng ahlam ajōn.

¹¹Ama’n a’nthim sumtuk vâng inkhusi sumtuk insâtak, tui kasip phet khan akimvea aka-unsi.

¹²Kahre akatla leh khō inphe hei kha, ahmai kunga khō inphea inphut jōngkasōk hei khana sumtuk inthim hei kha asuktan hei.

¹³Khava sōa marvâna inphut RŌNGPU kha jōng ka-ông khana Chunghnung rasa kha inthei jo.

¹⁴Ama’n athe hei akâp a, khana a’nrepuihei kha ahnong kachek hei; khō inphe leh inṭhōia ahnong mantlân hei.

¹⁵RŌNGPU, nang in na’nrepuihei narasei hei pha, khana hnuknat a na-ông pha; tui-ôngpui hnōi kha kachâr, khana ralei kung kha makhu loa ka-om.

¹⁶RŌNGPU’n marvâna inphut ajōng kabân enga aleimatu eng, tui inthûktak shunga inphut akeisōt eng.

¹⁷Ka’nrepui ratha kahrattak heia inphut leh ani ka-en kada seng heia inphut, ama’n kei asansōt eng; anmani kei chunga ratha kaneitak hei kae.

¹⁸Ke’n khōdeng kathei pha anbuhlu eng, tâk RŌNGPU’n kei asan eng.

¹⁹Inrimna inphut a’nthōpui eng; kachunga amalung atlai jâra ama’n ahuk eng.

²⁰Ke’n akadik katlo jâra RŌNGPU’n inpâkman apek eng. Ṭhenakase kachang jâra mahâmṭhat apek eng.

²¹RŌNGPU dân kha ke’n kajui jo; ka-Pathen hnenga inphut kahmai mahe mak jo eng.

²²Adân rakip ke’n kajui jo; aṭongpek-hei juimak tlomak eng.

²³Kei ṭhena neimak eng ti hi ama’n amanhret, ti chu akadik mak tlona inphut kei kabinga inphesōt eng.

²⁴Khanga akadik katlo jâra ama’n inpâkman apek eng, ajârchu kei ṭhenakase eng kae ti hi amanhret.

²⁵O RŌNGPU, nahnenga taksenthei kachang hei hnenga taksenthei kachang che, khana pui katluk hei hnenga pui katluk a akaṭha kachang che.

²⁶Malung intheng hei hnenga namalung intheng, tâk mikaṭhamak-hei chu nadōi hei.

²⁷Mi insinsak hei kha nahuk hei, tâk mi inlensak-hei kha nasuk manhnem hei.

²⁸Eh! RŌNGPU, nang in vâr napek eng; ka’nthimna kha namanvâr pek eng.

²⁹Ka’nrepui heibuhlu torna sik ratha napek eng. Anrekurhei torna sik rathahrat napek eng.

³⁰Hiva Pathen hichu aṭōn tlohei hi heituk a pui akatluk jo hei mo! Aṭonghei hi heituk a nganse thei akachang hei mo! Ama hrungpekna kajong hei sik a ama chu pho inkhat kapō kae.

³¹RŌNGPU rōk kha Pathen kae; Pathen rōk hi anikasen kae.

³²Karatha ani inngar kha Pathen kae, kahlam hro inhukna kasyem kha kae.

³³Shakhi kedim kahnet kapōa kahnettak aamanngir eng, tlânghei chunga kamōnga ada eng.

³⁴Ke’n sai kangarpen kha kahmang torna sik ama’n kei retlo amanthem chuk eng.

³⁵Eh! RŌNGPU, nang in kei nahrung eng, khana nahuk eng, natintana eng khan kei amanlen eng, khana narathahrat in inhuk a ada eng.

³⁶Sur sik a inphut naṭhensōt eng, khana latluhêr mak eng.

³⁷Ka’nrepuihei kahnonga kasur hei; ke’n anmani kasuk manhmang mak hei kârseng bângmak eng.

³⁸Ke’n anmani kajem mathlûk hei khana thōisōt tor mak hei; kator heia kahma katlu jo hei.

³⁹Re tlona sik rathahrat napek eng, khana ka’nrepuihei chunga torna kha napek eng.

⁴⁰Ka’nrepuihei kha keia inphut namantlân hei; ani ka-en kadahei kha kasuk manhmang hei.

⁴¹Anmani’n inthōpuina sik a kaṭap hei, tâk tûte’n hukmak hei; anmani’n RŌNGPU anbek, tâk ama’n masôn mak hei.

⁴²Ke’n kakahnur heia anmani kha thli tatlen ravut kapō ka-ang jo hei. Hlamdunga bōnthlōk kapōa kachōn rachi hei.

⁴³Rahe kase heia inphut nahrung eng, khana jât-hei chunga vai karôna namanṭang eng; kalei manhret phungmak mihei kha tûnchu karam mi kachang jo hei.

⁴⁴Ramlak mihe’n kahmai kunga inkun hei; kaṭong anthei pha kaṭong anjui.

⁴⁵Anlei inngamna kha inhmang jo, khana anrekura inphut ratha innok pum a jōngkasōk hei.

⁴⁶RŌNGPU chu kahring ṭhak! Ani kasenpa kha manpâk ruh. Pathen kakahukpa alenna kha hrimanthang ruh!

⁴⁷Ama’n ka’nrepuihei chunga retorna amannei eng; ama’n jât-hei kha kei thōia anam mathlâk hei

⁴⁸khana ka’nrepui heia inphut ahuk eng. Eh RŌNGPU, ka’nrepuihei chunga retorna napek eng khana rahe kase heia inphut nahrung eng.

⁴⁹Khava jâra jât-hlop hei kâra ke’n kachoi ka-ân che; khana nachoi ka-ânna hla kasak.

⁵⁰Pathen in areng kha retorna kalentak apek. ama’n akadeisōt jo David leh asōnhei chunga ahei tik a alungsetna amanhmu ṭhak hei.