Read Komrem HLAHEI 22 Bible Online

HLAHEI 22 - Komrem bible

HLAHEI 22

¹Ka-Pathen, ka-Pathen, heisa mo nadahlon eng? Inthōpuina rangei jâra inrengtak a kaṭap jo eng, tâk tûn katlung inthōpui kha lahong mak!

²Ka-Pathen, sûn pha kabek che, tâk amasôn mak che; jân pha kabek che, tâk châm inhngatna om mak.

³Tâk-kha A’ntheng Inkhat kapōa in-ong che; Israelhei tamanpâk inkhat che kha kae.

⁴Kanpu kanpa he’n anleitaksen che; anmani’n antaksen che, khana naleihuk hei.

⁵Anmani’n anleibek che khana thina theia inphut le’nphesōt hei; anmani’n antaksen che khana anmalung tlâksam mak.

⁶Tâk-kha kei chu mihring changmak jo eng; mi rakip tahnōise leh tamater, rahlung hrep eng kae.

⁷Ani kahmu rakip in sem tlona annei eng; anmani’n anmalei anpher thlōn enga anlu ankachuk khum eng.

⁸Anmani’n anhri, “Nang RŌNGPU a in-ngai che, heisa mo ahuk mak che? RŌNGPU’n alungset che’nchu heisa mo a’nthōpui mak che?”

⁹Ka’ntet bia inphut anilei kahuk inhring kha nang che kae, khan chu naidông kachanglai nang in kadam a naleida eng.

¹⁰Kaho’ntet bia inphut nachunga ahon’ngai eng kae, khana ahei tik a ka-Pathen hongkachang ṭhak che.

¹¹Kahnenga inphut asesōt pek mak roh! Inrim khōdengthei hong kahnai jo; ani’nthōpui sik tûte om mak a kae.

¹²Ka’nrepui katamtak he’n sehratchehei kapōa ankimve eng. Anmani’n kakimvea ankakursi eng, Bashana sehratche kakhôk hei kapōa.

¹³Anmani shabakkai kapōa anbei anman-âng, inhrung heia ankeihler eng.

¹⁴Karatha nei katlang jo raleia tui nikathing kapōa katlang jo. Karu kachâng rakip akhenga inthlotsō jo; kamalung kha khōihnât kapōa kajor jo.

¹⁵Karehrok hi ravut kachâr kapōa kachâr jo, kamalei hi kakadanga kakop jo. Nang in kei hi vaiphin kâra akathi sik a nadahlon jo eng.

¹⁶Mikaṭhamak rup inkhat in ankatōm eng; uire hei kapōa kahnenga anhonghnai jo eng; anmani’n kakut leh kake hei ankeihler jo hei.

¹⁷Karu rakip indang jo hei. Ka’nrepui he’n ani-en eng, kasang kanga.

¹⁸Anmani’n kapōnsia vâng-enna annei ankâra insem hei.

¹⁹O RŌNGPU kahnenga inphut sesōt mak roh! Kakahuk sik a inrangtak a jōng roh.

²⁰Chemjâma inphut ahuk roh; hiva ui heia inphut ahuk roh.

²¹Hiva shabakkai heia inphut asansōt roh; hiva ram sehratchehei hmaikunga inthōpui kase jo eng kae.

²²Na’n naleitlo hei kha kamihei kamanthei sik hei; an-intûpna shunga nang kachoi ka-ân sik che.

²³“RŌNGPU sōk nangni’n, ama kha manpâk ruh! Jacob sōnhei ama kha kaja ruh! Israel mihei ama kha kamuk ruh.

²⁴Ama’n misarahei donmak tlomak, a-emak leh an-inrengna heisakmak tlomak; anmania inphut sesōt mak, tâk inthōpuina sik anbek pha amasôn hei.”

²⁵Nang in naleitlo ṭōnhei jâra mi katam intûpna hmun a khan kamanpâk sik che; na’nmuk hei hmaikunga kale’ntepna tōkna kha kapek sik che.

²⁶Sara he’n anmadu chen a ansâk sik; RŌNGPU hneng akahong hei khan ama anchoi ka-ân sik; Anmani are-rea akahao chang hei rasoh!

²⁷Jât rakip in RŌNGPU kha anmandonsōt sik. Raleichung hmun rakip a inphut ahnengting hong inhe sik hei; jât leh phung rakip in ama ankamuk sik.

²⁸RŌNGPU chu reng kae, khana jât-hlop hei chunga vai arôn.

²⁹Mi inlensak rakip ahnenga inkun sik hei; akathithei rakip in ahmai kunga inkun sik hei.

³⁰Hnunga khangther he’n ama anrazen sik; anmani’n akahong sik khanghei hneng RŌNGPU ṭong anhri sik.

³¹RŌNGPU’n amihei aleihuk hei tia ala’nte mak mihei hneng anhri pek sik hei.